قالادا ءدال وسىنداي 38 ءۇي بار. ولاردىڭ ارقايسىسى ءۇش قاباتتان تۇرادى. فيزيكا زاڭدارىنا قايشى كەلەتىن بۇل زاماناۋي ءارى ەرەكشە ءستيلدى عيماراتتار تۋريستەردىڭ نازارىن ەرىكسىز اۋدارادى. ءتىپتى تىزبەكتەلگەن تەكشە ءتارىزدى ۇيلەر ءبىر قاراعاندا جەر ۇستىندە قالقىپ تۇرعانداي كورىنەدى. ساۋلەتشى پيەت بلوم سول سەبەپتى دە ءوز جوباسىن «قالا ىشىندەگى قالا» دەپ اتاعان.
گۋۆەر بوگەتى
كولورادو وزەنى ارقىلى وتەتىن وراسان زور بوگەت 60 قاباتتى عيماراتتىڭ بيىكتىگىندەي دەڭگەيدە ورنالاسقان جانە 1,3 ميلليون تۇرعىن ۇيگە جەتكىلىكتى ەلەكتر ەنەرگياسىن وندىرەدى.
بوگەت سالۋ جۇمىستارى كولورادو وزەنىندە 1931 جىلى باستالىپ, بەس جىلدا اياقتالعان. قۇرىلىستىڭ ۇزىندىعى – 379 مەتر, بيىكتىگى – 221 مەتر. ول 20 جىل بويى الەمدەگى ەڭ بيىك بوگەت بولىپ سانالعان. بۇگىندە الەمدەگى ەڭ بيىك بوگەت – ۆاحش وزەنىندەگى راگۋن بوگەتى. ونىڭ بيىكتىگى – 335 مەتر.
قاراپايىم بولسا دا قادىرلى
ساۋلەت ونەرى نەعۇرلىم ەرەكشە بولسا, سوعۇرلىم تانىمال. بۇعان ساۋلەتشىنىڭ قايتالانباس يدەياسى, ءتىپتى قۇرىلىسشىنىڭ قاتەلىگى سەبەپ بولادى. ال كەيدە قاراپايىم ءارى كرەاتيۆتى ونەر تۋىندىسىنا جۇرتتىڭ ىنتاسى مەن ىقىلاسى ەرەكشە ارتىپ تۇراتىنى تاعى بار.
ماسەلەن, «Hang Nga» قوناقۇيىنە ءبىر قاراعاندا, ول ءوزى وسىنداي بولىپ جەر استىنان وسكەن, ال ادامدار ونى قوناقتار قابىلداۋعا ازداپ قانا بەيىمدەگەن سياقتى اسەر تۋعىزادى. ال شىندىعىندا, عيمارات تولىعىمەن ۆەتنامدىق ساۋلەتشى دانگ ۆەت نگانىڭ قولىنان شىققان. ول قوناقۇيدىڭ ديزاينىن جانۋارلار, ساڭىراۋقۇلاقتار سياقتى تابيعي ەلەمەنتتەرمەن بەزەندىرگەن. قوناقۇي وسىنشالىقتى قاراپايىم بولسا دا, تابيعاتپەن تامىرلاسىپ جاتقانى ءۇشىن مۇندا كەلەتىن تۋريستەردىڭ قاراسى وتە كوپ.
