سۋرەتتى تۇسىرگەن – ەرلان ومار, «EQ»
وقىرمانداردىڭ ەسىنە سالا كەتكەن ءجون, بۇرىن «بولاشاق» باعدارلاماسىمەن باكالاۆرياتتا وقۋعا مۇمكىندىك بار ەدى. الايدا ءالى بۋىنى قاتايماعان جاستاردىڭ شەتەلگە بىردەن كەتۋىنە تەرىس كوزقاراس كوبەيدى, ودان دا بۇرىن شەتەلدەن ماگيستر جانە دوكتور دارەجەسىن الىپ كەلگەن جاستاردىڭ وتاندىق ۋنيۆەرسيتەتتەردى ساپالى كادر دايارلاۋعا جۇمىلدىرۋ ماقساتى العا شىعىپ, باكالاۆريات باعدارلاماسى «بولاشاقتان» الىنىپ تاستالدى.
سوڭعى جىلدارى «بولاشاق» باعدارلاماسىنا قانداي وزگەرىستەر قاجەتتىگى تۋرالى تالقىلاۋلاردا باكالاۆرياتتى قايتارۋ جونىندە ءجيى ايتىلدى.
مىسالى, 2022 جىلعى تالقىلاۋدا ءبىلىم سالاسىنداعى الەۋمەتتانۋشى كاميلا كوۆيازينا «كاراۆان» سايتىنا بەرگەن پىكىرىندە: «ەگەر «بولاشاق» باعدارلاماسىن رەفورمالاۋ تۋرالى ءسوز ەتسەك, وندا باكالاۆرياتتى قايتارۋ ماسەلەسىن كوتەرۋدىڭ ءمانى بار. سەبەبى بۇل – ەڭ الدىمەن, اقشاسى جوق ادامدارعا دا كەرەمەت ءبىلىم الۋ مۇمكىندىگى. «بولاشاق» ستۋدەنتتەرىنىڭ ءبىر بولىگى جاسىنا بايلانىستى وقۋعا بايسالدى قاراماعانىن جوققا شىعارمايمىن, بىراق مۇنى شەشىلمەيتىن ماسەلە دەۋگە كەلمەيدى. ستيپەندياعا ۇمىتكەرلەردىڭ مورالدىق جەتىلۋىن الدىن الا باعالاۋعا, دايىن ەمەس ادامداردى تىزىمگە قوسپاۋعا بولادى», دەگەن بولاتىن. كەيىن 10 جىلدان اسا ۋاقىت بۇرىن جابىلعان باكالاۆريات باعدارلاماسىن قايتارۋ تۋرالى شەشىم شىقتى. جاقىندا وتكەن ءباسپاسوز جيىنىندا عىلىم جانە جوعارى ءبىلىم ءمينيسترى ساياسات نۇربەك تولىعىراق ايتىپ بەردى.
«بۇل شەشىمدى شەتەلدە كادرلار دايارلاۋ جونىندەگى رەسپۋبليكالىق كوميسسيا بىلتىر قابىلدادى. بۇل ءوز كەزەگىندە كەيبىر زاڭناماعا وزگەرىستەر ەنگىزۋدى تالاپ ەتەدى, سوندىقتان ءبىز وتكەن جىلدىڭ سوڭىندا پارلامەنتكە ءتيىستى زاڭ جوباسىن ۇسىندىق, دەپۋتاتتار قولداپ, ءوز ۇسىنىستارىن ەنگىزدى. پارلامەنتتىڭ جاڭا سەسسياسى باستالا سالىسىمەن, ءبىز اتالعان جۇمىسقا بەلسەندى تۇردە ارالاسۋدى جوسپارلاپ وتىرمىز. وزگەرىستەردى بيىل قابىلداپ, «بولاشاق» باعدارلاماسى اياسىندا باكالاۆرلار ساناتىن قالپىنا كەلتىرەمىز. كوپ ادام وسى ماسەلەگە قاتىستى مىقتى, ءبىلىمدى جاستار تاعى شەتكە كەتەتىنى تۋرالى وي ايتادى. بۇل شەشىم كەرىسىنشە ەڭ ۇزدىك مەكتەپ تۇلەكتەرىن مامان بولعاندا ەلگە اكەلۋ ماقساتىندا قابىلداندى. سەبەبى بايقاساڭىزدار, جىل سايىن الەمنىڭ بىرنەشە ەلىنەن, نەبىر بەدەلدى ۋنيۆەرسيتەتتەردەن وقۋعا شاقىرتۋ العان مەكتەپ تۇلەكتەرى تۋرالى ءجيى ەستيمىز, وقيمىز. ولار شەتەلگە كەتسە, كەلۋى ەكىتالاي. ونىڭ ۇستىنە كەيبىرىنە تولىق گرانت بەرىلمەيدى, تولىق گرانت بەرىلسە دە جاتاقحاناسى تولەنبەيدى. ال «بولاشاق» باعدارلاماسىمەن اتتانسا, بارلىق جاعدايى جاساۋلى, اتا-اناسى دا كوپ الاڭدامايدى, ەڭ باستىسى, وقۋىن بىتىرگەن سوڭ ەلگە كەلۋگە مىندەتتەلەدى. ءبىزدىڭ دە كوزدەپ وتىرعانىمىز – وسى», دەدى مينيستر س.نۇربەك.
وتكەن اپتادا ءماجىلىس دەپۋتاتى اسحات ايماعامبەتوۆ الەۋمەتتىك جەلىدەگى پاراقشاسىندا جاڭا زاڭناماعا ءدال وسى باعدارلاماعا قاتىستى ەنگىزگەن دەپۋتاتتاردىڭ تۇزەتۋلەرى تۋرالى جازدى. ونىڭ پىكىرىنشە, «بولاشاق» باعدارلاماسى اياسىندا دارىندى بالالاردى قولداۋ بويىنشا زاڭناماعا جاڭا تۇزەتۋلەر دايىندالدى. بۇل – مەملەكەتىمىزدىڭ جاس تالانتتاردى قولداۋ ساياساتىنىڭ لوگيكالىق جالعاسى.
«2021 جىلدان باستاپ پرەزيدەنت قاسىم-جومارت توقاەۆتىڭ تاپسىرماسىمەن پاندىك وليمپيادالاردىڭ جەڭىمپازدارى 5 ملن تەڭگەگە دەيىن بىررەتتىك اقشالاي سىياقى, ەلىمىزدىڭ كەز كەلگەن ۋنيۆەرسيتەتىندە تەگىن وقۋعا گرانتتار الادى. ەندىگى ۇسىنىستار قانداي؟ «بولاشاق» باعدارلاماسىن كەڭەيتۋ. ءبىز رەسپۋبليكالىق جانە حالىقارالىق پاندىك وليمپيادالار مەن عىلىمي جوبالار كونكۋرستارىنىڭ جەڭىمپازدارىن «بولاشاقپەن» باكالاۆريات باعدارلامالارى بويىنشا وقىتۋعا مۇمكىندىك بەرەتىن نورمالاردى ۇسىندىق. قازىرگى ۋاقىتتا «بولاشاق» باعدارلاماسى بويىنشا تەك ماگيستراتۋرا, دوكتورانتۋرا جانە تاعىلىمداما باعدارلامالارى بويىنشا وقۋعا بولادى. نەگىزگى شارتتار مىنانداي بولماق: وليمپيادالار مەن كونكۋرستاردىڭ ءتىزىمىن رەسپۋبليكالىق «بولاشاق» باعدارلاماسى كوميسسياسى بەكىتەدى; وقۋ جەڭىمپاز جەڭگەن پروفيل بويىنشا عانا جۇرگىزىلەدى. بۇل شەشىم نەگە ماڭىزدى؟ وليمپيادا جەڭىمپازدارى قازىرگى ۋاقىتتا قازاقستان ۋنيۆەرسيتەتىنە گرانت الۋ قۇقىعىنا يە. الايدا شەتەلدىك جەتەكشى ۋنيۆەرسيتەتتەر ولارعا باكالاۆرياتتا وقۋعا ءوز گرانتتارىن ۇنەمى ۇسىنىپ وتىرادى جانە وسى دارىندى بالالارىمىز شەتەلگە كەتىپ, سوسىن كوبىنە ەلگە ورالمايدى. مەملەكەت بالاباقشا مەن مەكتەپتەن باستاپ, وسىنداي تالانتتى بالالارعا ينۆەستيتسيا جاساعاننان كەيىن, بۇل دارىندى بالالاردى باسقا مەملەكەتتىڭ ەكونوميكاسىنا جۇمىس ىستەۋ ءۇشىن بەرىپ قويماي, ءارى قاراي قولداپ, ەلىمىزدىڭ دامۋىنا جۇمىس ىستەتۋ ماڭىزدى. سوندىقتان شەتەلدە كادرلار دايارلاۋ بويىنشا رەسپۋبليكالىق كوميسسياسىنىڭ وسى جۇمىستى جۇرگىزۋ تۋرالى حاتتاماسى شىققان بولاتىن. ماۋسىم ايىندا ءبىز ۇكىمەتتەن وسى تۇزەتۋلەرىمىز بويىنشا وڭ قورىتىندى الىپ, قازىر جۇمىس توبىندا قاراستىرىلىپ جاتىر. ارىپتەستەرىمىز كەلەسى سەسسيادا بۇل تۇزەتۋدى قولدايدى دەپ سەنەمىن», دەدى ا.ايماعامبەتوۆ.
