فەستيۆالدىڭ اشىلۋ سالتاناتى الدىندا قازاق مەملەكەتتىك تسيركىنىڭ ديرەكتورى ماقسات جايىقوۆ باستاعان قازىلار القاسى ءباسپاسوز ءماسليحاتىن ۇيىمداستىرىپ, بۇگىنگى كەزەڭدەگى ەڭ ۇزدىك تسيرك مەكتەپتەرىنىڭ جەتىستىگى مەن تاجىريبەسى, بيىلعى حالىقارالىق اۋقىمدى شارانىڭ جاڭالىعى تۋرالى جان-جاقتى اقپارات بەردى. ماقسات جايىقوۆتىڭ ايتۋىنشا, وتكەن جىلدان باستاپ الماتى قالاسى اكىمدىگىنىڭ قولداۋىمەن تسيرك ارتىستەرىنىڭ شەتەلگە گاسترولدىك ساپارلارى 35 جىلدان كەيىن قايتا جاندانىپ, الەمدىك فەستيۆالدار مەن بايقاۋلارعا قاتىسىپ, جەتىستىككە جەتىپ, جەڭىس تۇعىرىنان كورىنە باستاعان. «Almaty Circus Festival» سەكىلدى حالىقارالىق دەڭگەيدەگى ىرگەلى جوبانىڭ بيىل ەكىنشى رەت وتكىزىلۋى دە – قالا اكىمدىگى قامقورلىعىنىڭ ناتيجەسى.
سودان بەرى الماتى تسيرك فەستيۆالى ءوزارا قارىم-قاتىناس پەن مادەني ءتۋريزمنىڭ بەلسەندى دامۋ الاڭىنا اينالىپ كەلەدى. فەستيۆالدىڭ ماقساتى – حالىقارالىق مادەني بايلانىستاردى دامىتۋ, الەمدىك ارەنادا وتاندىق تسيرك ونەرىنىڭ دامۋىنا جاڭا سەرپىن بەرۋ, كورەرمەندەردىڭ قازاق مەملەكەتتىك تسيركىنىڭ مۇمكىندىكتەرى تۋرالى تۇسىنىكتەرىن كەڭەيتۋ جانە قوعامداعى حالىقارالىق تسيرك ونەرىنىڭ مارتەبەسىن ارتتىرۋ. «Almaty Circus Festival» الەمنىڭ كوپتەگەن ەلىنەن كەلگەن تسيرك ونەرىنىڭ جانكۇيەرلەرى مەن ۇزدىك وكىلدەرىنىڭ باسىن قوسادى, بۇل ەلىمىزدە مادەني ءتۋريزمنىڭ بەلسەندى دامۋى ءۇشىن ءوز سەپتىگىن تيگىزەدى.
قازاق مەملەكەتتىك تسيركىنىڭ ديرەكتورى جانە فەستيۆال قازىلار القاسىنىڭ توراعاسى ماقسات جايىقوۆ: «فەستيۆال بارىسىندا الماتىلىقتار مەن اسەم قالامىزدىڭ قوناقتارى قازاق مەملەكەتتىك تسيركىنىڭ مانەجىنەن تورتكۇل دۇنيەنىڭ تۇكپىر-تۇكپىرىنەن كەلگەن ۇزدىك تسيرك ارتىستەرىنىڭ ونەرىن تاماشالايدى. ولار فەستيۆالدىڭ جوعارى ماراپاتتارىن يەلەنۋ ءۇشىن بويىنداعى بار تالانتىن جانە كاسىبي شەبەرلىگىن جارقىراتا كورسەتپەك. فەستيۆال قاتىسۋشىلارىنىڭ ونەرىن حالىقارالىق كاسىبي قازىلار القاسى باعالايدى. قازىلار القاسىنىڭ قۇرامىندا قازاقستان جانە شەتەلدىك تسيرك ونەرى مايتالماندارى مەن امباسسادورلارى باس قوسقان», دەدى.
فەستيۆال باعدارلاماسى اسا اۋقىمدى ءارى باي. اتى اڭىزعا اينالعان قازاق مەملەكەتتىك تسيركىنىڭ مانەجىندە تسيرك ونەرىنىڭ بارلىق جانرىندا بىرەگەي نومىرلەر ۇسىنىلدى: قانداي دا ءبىر قولايسىز جاعدايدا تەپە-تەڭدىكتى ۇستاي الاتىن ەكۆيليبريستەر, كەرەمەت ەپتىلىك پەن كۇشتى قاجەت ەتەتىن, كورەرمەندى تاڭعالدىراتىن تريۋكتەر جاسايتىن اكروباتتار, تسيرك كۇمبەزىنىڭ استىندا قۇسشا سامعايتىن تاڭعاجايىپ اۋە گيمناستتارى, ۇيرەتىلگەن يت پەن مىسىقتاردىڭ تابيعي مۇمكىندىگى, ءتىپتى ەڭ تالعامپاز كورەرمەندى دە بەيجاي قالدىرمايتىن شاباندوزدار, ارمەنيا مەن يتاليادان كەلگەن الەمگە ايگىلى سايقىمازاقتار كورەرمەندى ەستەن كەتپەس اسەرگە بولەپ, كۇن سايىن شات-شادىمان قۋانىشقا بولەپ, شىعارىپ سالىپ وتىردى. ءتىپتى ۇمىتىلماس شوۋ جاساپ, كورەرمەندى تاڭعالدىرۋ ءۇشىن كەيبىر مىقتىلار ومىرىنە قاۋىپ تونەتىنىنە قاراماستان, باسىن قاتەرگە تىگە وتىرىپ, نەبىر كۇردەلى تريۋكتەردى ساقتاندىرۋ بەلدىگىنسىز جاساعانى ەرىكسىز باس شايقاتتى. تسيرك ونەرىنىڭ بۇگىنگى الپاۋىتى قىتاي ەلىنەن كەلگەن ۆان مەنچەننىڭ وزىمەن بىرگە الا كەلگەن رەكۆيزيتىنىڭ سالماعى ەكى توننادان اساتىنى دا – بايقاۋداعى قىزىقتى دەرەكتەردىڭ ءبىرى. ۇيىمداستىرۋشىلار بيىلعى فەستيۆالدا اۋە اكروباتتارىنىڭ ونەرىنە مەيلىنشە باسىمدىق بەرگەن.
قازاق مەملەكەتتىك تسيركىنىڭ جانە «Almaty Circus Festival» جوباسىنىڭ باس قويۋشى رەجيسسەرى مارينا رەدكو: ء«بىز كورەرمەندەر ءۇشىن جاي عانا كونكۋرستىق باعدارلاما ەمەس, ناعىز جاندى, جوعارى دەڭگەيدەگى زاماناۋي تسيرك شوۋىن دايىندادىق. بۇل اسقان باتىلدىقتىڭ, ادامنىڭ فانتاستيكالىق ءابسوليۋتتى مۇمكىندىگىن كورسەتۋدىڭ تاڭعاجايىپ مەرەكەسى بولدى. بيىل فەستيۆالعا ارنايى ەرەكشە جارىقتاندىرۋ شەشىمدەرىمەن ۇيلەسەتىن ۇلتتىق ەتنوستيلدەگى جاڭا ەكسكليۋزيۆتى ديزاينەرلىك كوستيۋمدەر تىگىلدى. بالالار مەن ەرەسەكتەرگە جاعىمدى ەموتسيا مەن ۇمىتىلماس اسەر سىيلايتىن ءتۇرلى ءتۇستى شوۋدىڭ ۇزاق ۋاقىت ەستە قالاتىنى ءسوزسىز», دەيدى.
ءۇش كۇنگە سوزىلعان فەستيۆالدىڭ باس جۇلدەسىن كريستينا ۆوروبەۆانىڭ جەتەكشىلىگىندەگى وزبەكستاننىڭ Sky Angels ارقان بويىمەن جۇرەتىن دارشىلار توبى جەڭىپ الدى. ولار ورىنداعان «ۇشتىكتىڭ دەمى» دەپ اتالاتىن ءنومىر بەدەلدى قازىلار القاسىنىڭ ەڭ بيىك باعاسى مەن دەمىن ىشكە الىپ تاماشالاعان تالعامپاز كورەرمەننىڭ شىن ىقىلاسىن يەلەندى. سونداي-اق وزبەكستاننىڭ ونەرپازدارى تۇركيانىڭ Armoni Organizasyon باس ديرەكتورى احمەت ەكشي مەن قازاق مەملەكەتتىك تسيركى ارداگەرلەرىنىڭ ارنايى جۇلدەسىن دە يەلەنىپ, پەتەربۋرگ قالاسىندا وتەتىن «شەگارادان تىس» حالىقارالىق تسيرك ونەرى فەستيۆالىنە شاقىرۋ الدى. الماتى قالاسى اكىمدىگىنىڭ ارنايى جۇلدەسى كۇلكىلى قويىلىمدارىمەن كورەرمەن كوڭىلىن كوتەرگەن يتاليالىق سايقىمازاق دەۆيس ۆاسسالوعا تابىستالدى. التىندالعان ءمۇسىن ماراپاتىنىڭ يەسى بولىپ رەسەي اۋە گيمناستتارى ماريا تەرەنتەۆا, سۆەتلانا ميحنيۋك, الينا گابباسوۆا, قىتايلىق ۆونگ مەنچەن تانىلدى. قازاقستاننىڭ ەڭبەك سىڭىرگەن قايراتكەرى قۇرمانعالي دوسباتىروۆتىڭ شاكىرتتەرى مارينا ستارودۋبوۆا مەن دايانا جەتپىسوۆا دا جۇلدەسىز قالعان جوق. ولاردىڭ «جاڭبىر استىنداعى سامعاۋ» قويىلىمى كۇمىس جۇلدەگە لايىق دەپ تانىلدى. بۇعان قوسا تۇركيا مەن گرۋزيا قازىلارىنىڭ ارنايى جۇلدەسى مەن يتاليادا وتەتىن حالىقارالىق تسيرك فەستيۆالىنە جولدامانى دا ەنشىلەدى. ەفيوپيادان كەلگەن «قارا بۇركىتتەر» مەن رەسەيلىك يت ۇيرەتۋشى ەۆگەني كوميسارەنكو دا كۇمىس جۇلدەگە يە بولدى. يتاليادان كەلگەن كيمبەرلي دزاۆاتتا, ۋكراينا مىقتىلارى رومان كرونجو مەن انگەلينا پروحوروۆا, سونداي-اق پورتۋگاليالىق گيمناست جوان گودينو قولا جۇلدەگە قول جەتكىزدى. «استانالىق تسيركتەن» كەلگەن نۇرىم كۇلەنباەۆتىڭ باپتاۋىنداعى Virtuoso شاباندوزدار توبىنا قىتاي ۇلتتىق اكروباتيكا ترۋپپاسىنىڭ ارنايى جۇلدەسى تابىستالدى.
«Almaty Circus Festival» مارەسىنە جەتكەن جەڭىمپازدار قاتىساتىن فەستيۆال باعدارلاماسى 24 تامىزعا دەيىن جالعاسادى.
الماتى
