مينيسترلىكتىڭ تاراتقان اقپاراتىنا سۇيەنسەك, پەداگوگتەر مەن وقۋشىلار جاساندى ينتەللەكتىنى قولدانۋ جانە باعدارلامالاۋ داعدىلارىن مەڭگەرەدى. مەملەكەت باسشىسىنىڭ تاپسىرماسى بويىنشا وقۋ-اعارتۋ مينيسترلىگى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىمەن, Astana hub حالىقارالىق تەحنوپاركىمەن جانە «ورلەۋ» بىلىكتىلىكتى ارتتىرۋ ۇلتتىق ورتالىعى» اكتسيونەرلىك قوعامىمەن بىرلەسىپ وقۋشىلار مەن پەداگوگتەرگە ارنالعان باعدارلامالاۋ نەگىزدەرىن وقىتاتىن ونلاين-ءبىلىم بەرۋ پلاتفورماسىنىڭ قاناتقاقتى جوباسىن ىسكە قوستى. باستاپقى كەزەڭدە 300 مۇعالىم مەن ترەنەر «جاساندى ينتەللەكت» جانە Game Development باعىتتارى بويىنشا بىلىكتىلىگىن ارتتىرادى. بيىل 31 جەلتوقساندا اياقتالاتىن كۋرستار التى ايعا جوسپارلانعان. كۋرس اياقتالعان سوڭ, ءاربىر قاتىسۋشىعا سەرتيفيكات بەرىلەدى, ولار ءارى قاراي وقۋشىلار مەن پەداگوگتەردى باعدارلامالاۋ نەگىزدەرىنە وقىتا الادى.
ورتا ءبىلىم بەرۋ كوميتەتىنىڭ باسقارما باسشىسى گۇلنار تالاسباەۆا بۇل تۋرالى: «جوباعا قاتىسۋشىلار باعدارلامالاۋ نەگىزدەرى بويىنشا بيىل شىلدە-جەلتوقسان ارالىعىندا ونلاين رەجىمدە «No Code», «Low Code» جانە «Startup Academy» كۋرستارىن جانە وفلاين 2025 جىلدىڭ قاڭتارىنان باستاپ باعدارلامالاۋ نەگىزدەرى بويىنشا وقيدى. قازىر Astana Hub پلاتفورماسىندا ءبىلىم الۋشىلاردى ونلاين تىركەۋ ءجۇرىپ جاتىر. ءار وقۋشىعا قۇپيا ءسوز بەن لوگين بەرىلەدى, ونىڭ كومەگىمەن ولار مودۋلدەردى يگەرىپ, تاپسىرمالاردى ورىنداپ, تەستىلەۋدەن وتە الادى. بارلىق مودۋلدەن ءساتتى وتكەن ءبىلىم الۋشىلارعا كۋرستى اياقتاعانى تۋرالى سەرتيفيكات بەرىلەدى, بۇل IT-ونىمدەردى جاساۋعا مۇمكىندىك بەرەدى», دەپ اتاپ ءوتتى.
ايتا كەتۋ كەرەك, وقۋشىلار وزدەرىنە ىڭعايلى ۋاقىتتا وقي الادى. ءار ساباقتا بەينەدارىس, قوسىمشا ماتەريالدار جانە تەست تاپسىرمالارى بار. سونداي-اق قاتىسۋشىلار قاناتقاقتى جوبا ۇيلەستىرۋشىلەرىنەن كومەك سۇراي الادى. اتالعان جوبا بارلىعى 27 مىڭنان اسا وقۋشىنى قامتيدى.
