فوتو: ult.kz
عىلىم جانە جوعارى ءبىلىم مينيسترلىگىنىڭ حابارلاۋىنشا, دوكتورانتۋراعا ءتۇسۋ ءۇشىن ءبىر جوعارى وقۋ ورنى مەن ءبىلىم بەرۋ باعدارلامالارىنىڭ ءبىر عانا توبىن تاڭداۋعا بولادى. تالاپكەر ءوز وتىنىشىنە تەستىلەۋدى تاپسىراتىن قالاسى, ءبىلىم بەرۋ باعدارلامالارىنىڭ توبى, تەستىلەۋدى تاپسىرۋ ءتىلى بويىنشا قۇجات قابىلداۋ مەرزىمى اياقتالعانشا, ناقتىراق ايتقاندا, 3 تامىزعا دەيىن وزگەرىستەر ەنگىزۋگە قۇقىلى. تەستىلەۋدى وتكىزۋ ورنى مەن ۋاقىتى تۋرالى اقپاراتتى ءتۇسۋشى تىركەلگەن سايتتاعى ءوزىنىڭ جەكە كابينەتىندە 9 تامىزدا كورە الادى.
ءتۇسۋ ەمتيحانىنا اڭگىمەلەسۋ, ەسسە جازۋ جانە ءبىلىم بەرۋ باعدارلاماسى توبىنىڭ بەيىنى بويىنشا ەمتيحان كىرەدى. جالپى, ءتۇسۋ ەمتيحانىنىڭ ەڭ جوعارى كورسەتكىشى – 100 بالل, ونىڭ ىشىندە اڭگىمەلەسۋ – 30 بالل, ەسسە – 20 بالل, بەيىنى بويىنشا ەمتيحان – 50 بالل. ال مەملەكەتتىك ءبىلىم بەرۋ تاپسىرىسى بويىنشا كونكۋرسقا قاتىسۋ ءۇشىن جانە اقىلى نەگىزدە دوكتورانتۋراعا ءتۇسۋ ءۇشىن شەكتى بالل 75-ءتى قۇرايدى.
دوكتورانتۋراعا ءتۇسۋ ءۇشىن قازتەست جۇيەسى بويىنشا مەملەكەتتىك ءتىلدى مەڭگەرگەنىن راستايتىن سەرتيفيكات جانە شەت ءتىلىن مەڭگەرگەنىن راستايتىن سەرتيفيكات ۇسىنۋ قاجەت. TOEFL ITP سەرتيفيكاتى بار تۇلعالار تەستىلەۋ باستالعانعا دەيىن اعىلشىن ءتىلىن بىلۋگە ارنالعان قوسىمشا تەستىلەۋدى تاپسىرادى. اتاپ وتسەك, 2024 جىلى شەت ءتىلىن مەڭگەرگەنىن راستايتىن سەرتيفيكاتتاردىڭ شەكتى دەڭگەيلەرى B1-گە دەيىن تومەندەتىلدى جانە تىزىمگە TOEIC جانە Duolingo English Test سەرتيفيكاتتارى ەنگىزىلدى.
بيىلدان باستاپ تۇسۋشىلەردىڭ بەيىنى بويىنشا دوكتورلار باعدارلاماسىنا دوكتورانتۋراعا تۇسۋگە مۇمكىندىك بار. بۇل باعدارلاما ءۇشىن شەت ءتىلىن مەڭگەرگەنىن راستايتىن سەرتيفيكاتتىڭ بەلگىلى ءبىر دەڭگەيى تالاپ ەتىلمەيدى, ەمتيحاندا ەسسە جازبايدى. ەڭ جوعارى كورسەتكىش – 80 بالل, ونىڭ ىشىندە اڭگىمەلەسۋگە – 25 بالل, كاسىپورىندار مەن ۇيىمداردىڭ ۇسىنىس حاتىنا (بولعان جاعدايدا) – 5 بالل جانە بەيىنى بويىنشا ەمتيحان سۇراقتارى – 50 بالدى قۇرايدى. شەكتى دەڭگەي – كەمىندە 50 بالل.
