فوتو: ortcom.kz
ءوتىنىم قابىلداۋعا 1 ايدان دا از ۋاقىت قالدى. دالىرەك ايتقاندا, 1-سىنىپقا قۇجات قابىلداۋ الداعى 31 تامىزعا دەيىن جالعاسادى. بۇگىنگە دەيىن 275 177 ءوتىنىم تۇسكەن. ءبىرىنشى سىنىپقا وقۋشىلاردى قابىلداۋ بويىنشا اقمولا, الماتى, جەتىسۋ, پاۆلودار وبلىستارى 100 پايىز كورسەتكىشكە قول جەتكىزدى. الدىن الا بولجام بويىنشا 2024 جىلدىڭ
31 جەلتوقسانىنا دەيىن 6 جاسقا تولاتىن بالالار سانى 370 مىڭنان اسادى, دەمەك وسىنشاما بالا مەكتەپكە بارادى دەپ بولجانىپ وتىر.
مينيسترلىكتىڭ حابارلاۋىنشا, ازاماتتارعا قولايلى بولۋ ءۇشىن قىزمەت كورسەتۋ تولىعىمەن اۆتوماتتاندىرىلدى. اتا-انالار مەن بالالاردىڭ زاڭدى وكىلدەرى ءوز وتىنىمدەرىن ەgov.kz ەلەكتروندى پورتالىندا, سونداي-اق جەرگىلىكتى اتقارۋشى ورگانداردىڭ اقپاراتتىق جۇيەلەرى ارقىلى تاپسىرا الادى. ءبىرىنشى سىنىپقا بالالار 6 جاستان باستاپ (وسى جىلدىڭ سوڭىنا دەيىن
6 جاسقا تولاتىن 5 جاستاعى بالالار) اتا-اناسىنىڭ نەمەسە بالانىڭ زاڭدى وكىلىنىڭ ءوتىنىشى نەگىزىندە قابىلدانادى. وتىنىمدەردى دەمالىس پەن مەرەكە كۇندەرىنەن باسقا, دۇيسەنبىدەن جۇماعا دەيىن وتكىزۋگە بولادى. ال ليتسەيلەر مەن گيمنازيالارعا بالالار ەمتيحانسىز قابىلدانادى. سونىمەن قاتار مەكتەپتەن مەكتەپكە تەك كانيكۋل كەزىندە عانا اۋىسۋعا رۇقسات ەتىلەتىن شەكتەۋ الىنىپ تاستالدى. ەندى جاڭا ەرەجەلەرگە سايكەس بالالار وقۋ جىلىندا تۇرعىلىقتى جەرى بويىنشا مەكتەپ اۋىستىرۋ مۇمكىندىگىنە يە بولدى.
