فوتو: استانا اكىمدىگى
ەلوردانىڭ ءاربىر اۋدانىندا كۇن سايىن رۇقسات ەتىلمەگەن پوليگونداردىڭ بولۋىنا مونيتورينگ جۇرگىزىلەدى. جىل باسىنان بەرى قالا جانە وعان ىرگەلەس اۋماق بويىنشا 100-دەن استام ۋچاسكە جويىلىپ, 90 مىڭ تونناعا جۋىق قوقىس شىعارىلدى.
مىسالى, الماتى اۋدانى بويىنشا 61 ۋچاسكە جويىلىپ, 23,5 مىڭ توننا قوقىس (3357 رەيس) شىعارىلدى.
بايقوڭىر اۋدانىندا 4 ۋچاسكە جويىلىپ, 5 461 توننا قوقىس شىعارىلدى.
ەسىل اۋدانى بويىنشا 12 نۇكتە جويىلىپ, 12,6 مىڭ توننا قوقىس شىعارىلدى.
سارىارقا اۋدانى بويىنشا 22 ستيحيالىق قوقىس ورنى پىسىقتالىپ, 18 مىڭ توننا قوقىس شىعارىلدى. جۇمىس ءالى دە جالعاسىپ جاتىر.
نۇرا اۋدانىنان جويىلعان 4 نۇكتەدەن 27 مىڭ توننا قوقىس شىعارىلدى.
استانادا رۇقسات ەتىلمەگەن قوقىس ۇيىندىلەرىنەن قوقىس جيناۋعا ارنالعان قالالىق قتق پوليگونىنىڭ جانىندا ۋاقىتشا الاڭ بەلگىلەندى, ول الاش, 64 تاس جولىندا ورنالاسقان.
كۇن سايىن iKomek ارقىلى قۇرىلىس الاڭدارىنان قوقىس شىعارۋ جانە ورىنسىز ورىندارعا قوقىستى ءتۇسىرۋ فاكتىلەرى بەلگىلەنەدى, قۇقىق قورعاۋ ورگاندارىمەن بىرلەسىپ رەيدتىك ءىس-شارالار جۇرگىزىلەدى. جىل باسىنان بەرى 161 اكىمشىلىك قۇقىق بۇزۋشىلىق انىقتالدى, 5 ملن 200 مىڭ تەڭگەدەن استام سوماعا ايىپپۇل سالىندى.
زاڭسىز پوليگونداردى جويۋ جۇمىستارى جالعاسىپ جاتىر. ونىڭ ىشىندە جاڭا وشاقتاردىڭ پايدا بولۋىنا جول بەرمەۋ بويىنشا شارالار قابىلدانۋدا.
ەستەرىڭىزگە سالا كەتەيىك, «تازا قازاقستان. استانا – تازالىق پەن ءتارتىپتىڭ ۇلگىسى» اۋقىمدى ەكولوگيالىق اكتسياسى اياسىندا قالانى سانيتارلىق تازارتۋ, نوسەر جانە ارىق كارىزدەرىن تازارتۋ, كوشەلەردى, تروتۋارلاردى, ورامىشىلىك اۋماقتاردى, قوعامدىق كەڭىستىكتەر مەن اۋلالاردى تازالاۋ جۇمىستارى جۇرگىزىلىپ جاتىر.
سونداي-اق جاسىل جەلەكتەردى كۇتىپ-ۇستاۋ جانە وتىرعىزۋ, ساۋدا وبەكتىلەرىنە ىرگەلەس اۋماقتاردى جيناۋ, كوگالدار مەن گۇلزارلار ورناتۋ, رۇقسات ەتىلمەگەن پوليگونداردى جويۋ جانە ت. ب. جۇمىستار جۇرگىزىلەدى.
