ماسەلەن, حارريەتت تومپسون ەسىمدى اقش تۇرعىنى مارافون قاشىقتىعىن ءساتتى جۇگىرىپ الەمدىك رەكورد جاڭارتقان. ءيا, ول مارە سىزىعىن ءبىرىنشى بولىپ كەسىپ وتپەسە دە, ونىڭ ەرلىگى تالايلاردىڭ تاڭدايىن تاقىلداتتى. ەندى ول قانداي ەرلىك دەيسىز عوي؟ بۇل كەيۋانانىڭ ەرەكشەلىگى – 92 جاسىندا سان-ديەگو مارافونىن 7 ساعات 24 مينۋت 36 سەكۋندتا جۇگىرىپ وتكەن. ونىڭ جانىندا 56 جاستاعى ۇلى برەنني دە بولعان. ايتا كەتەيىك, بۇعان دەيىن تومپسون اۋىز قۋىسىنىڭ وبىرىمەن ءۇش مارتە كۇرەسىپ, اقىرىندا جازىلىپ كەتكەن.
انتيرەكورد ورناتقان قاقپاشى
الەمدىك دوپ دوداسىندا نەبىر سەنساتسيالار – جانكۇيەرلەر كۇتپەگەن وقيعالار ءجيى بولادى. سونىڭ ەڭ ەرەكشەسى 1995 جىلى «جەرمينال ەكەرەن» مەن «اندەرلەحت» اراسىنداعى ۇلتتىق چەمپيونات ماتچىندا تىركەلدى.
وسى ويىندا بەلگيالىق فۋتبولشى ستان ۆان دەن بۋيس ءوز قاقپاسىنا بايقاماي 3 اۆتوگول سوققان. ارينە, سپورتشى تاپ بۇلاي رەكورد ورناتام دەپ ويلاماعانى انىق. وسىلايشا, اندەرلەحت كومانداسى بىردە-ءبىر گول سوقپاي-اق, 3-2 ەسەبىمەن جەڭىسكە جەتتى.
سەكىرۋدىڭ شەبەرى
رەكوردتىڭ دا ءتۇر-ءتۇرى بار-اۋ. قىتايلىق سپورتشى تسەن سياولين سەكىرگىشپەن سەكىرۋدىڭ سايىپقىرانى اتانىپ, گيننەس رەكوردتار كىتابىنا ەنگەن.
17 جاستاعى بالا 30 سەكۋند ىشىندە 228 رەت سەكىرىپ, الەمدىك رەكورد ورناتقان. وسىلايشا, ول شانحايداعى حالىقارالىق تۋرنيردە كوز ىلەسپەس جىلدامدىعى جانە ەرەك دارىنى ارقىلى بارشا جۇرتتىڭ تاڭدايىن قاقتىرعان. قىتايلىق سپورتشى 30 سەكۋند ىشىندە ەڭ كوپ سەكىرۋ رەكوردىن 2015 جىلى ءوزى جاساعان. ول كەزدە 108 رەت سەكىرگەن ەدى.
