ماسەلەن, افريكانىڭ ونتۇستىك-باتىس ايماعىندا وسەتىن اكاتسيا اعاشىنىڭ تامىرى وتە تەرەڭگە بويلايتىن كورىنەدى. عالىمدار بۇل وسىمدىك تامىرىنىڭ 68 مەترگە دەيىن جەتكەنىن انىقتادى. ال يتاليانىڭ پەمونت ايماعىندا Bialbero di Casorzo دەپ اتالاتىن ەرەكشە قوس اعاش بار. ەرەكشەلىگى سول, تۇت اعاشىنىڭ دىڭگەگىنەن ءوتىپ, ونىڭ ۇستىندە شيە اعاشى جايقالىپ تۇر ەكەن.
ءدىڭى مىقتى
باوباب – ەرەكشە اعاش. ونىڭ ۇلكەن ءدىڭى جاۋىن-شاشىن ماۋسىمىندا كوپ مولشەردە سۋ جيناپ الادى. سول سۋدى پايدالانۋ ارقىلى باوباب «ارىقتايدى».
اعاشتىڭ ءدىڭى قۋىستارعا تولى بولعاندىقتان, جانۋارلار مەن قۇستار وزگە جىرتقىشتاردان قورعانىپ, سول جەرلەردە تىعىلادى. قۇشاعى كەڭ اعاشتى اڭ-قۇس تۇگىلى ادامدار دا پانالايدى. ءبىر قىزىعى, افريكا مەن اۋسترالياداعى باوبابتاردىڭ ىشىندە كوفەحانالار دا بولعان. ەگەر ساۆاننالاردا ءورت تۋىنداسا, دىمقىل بولىپ تۇراتىن باوباب وتقا ورانبايدى.
مۇنداي دا بولادى ەكەن-اۋ
توعاي دەگەندى ەستىپ ءجۇرمىز. اعاش دەگەندى بىلەمىز. بىراق توعاي اعاشى دەگەندى ءبىلىپ پە ەدىڭىز؟ ولاي اتالاتىن دا ءجونى بار. ويتكەنى بۇل اعاشتىڭ ءدىڭى بىرەۋ ەمەس, بىرنەشەۋ.
عىلىمي اتاۋى – بانيان. اۋەلدە ونىڭ جاس شىبىعى جان-جاققا بۇتاقتارىن جايادى. ال بۇل بۇتاقتاردان جاپىراقتار عانا ەمەس, تامىرلار دا ءوسىپ شىعىپ, تومەن يىلەدى. مۇنداي تامىر جەرگە جەتىسىمەن-اق جۋاندانىپ, اعاشتىڭ تاعى ءبىر دىڭىنە اينالا باستايدى. ەڭ ۇلكەن بانيان اعاشىنىڭ 4 مىڭنان استام ءدىڭى بار ەكەنى انىقتالعان. بۇل دەگەن ءتىپتى دە توعاي-اعاش ەمەس, ناعىز ورمان-اعاش ەمەس پە!
