ماسەلەن, لوندوننىڭ پادينگتون اۋدانىندا ورنالاسقان روللينگ كوپىرىنىڭ قىزمەتى قاراپايىم بولعانىمەن, قۇرىلىمى وزگەشە.
اپتانىڭ ءار جۇماسىندا سەگىزبۇرىشتى بۇل كوپىر توڭكەرىلىپ جازىلادى دا, جۇرۋگە قولايلى كەيىپكە ەنەدى. بۇل – ونىڭ باسقا كوپىرلەردەن باستى ايىرماشىلىعى. ال كۇن سوڭىندا قايتادان سەگىزبۇرىشقا اينالادى. كوپىر 2004 جىلى گراند-يۋنيون كانالىنا جۇك تاسىمالدايتىن كەمەلەردى وتكىزۋ ماقساتىندا سالىنعان. اۆتورى – توماس حەزەرۆيك.
بيىكتەگى كوپىر
ەيفەل مۇناراسى مەن گيزا پيراميداسىن قوسساڭىز دا, ونىڭ بيىكتىگى قىتايداعى سيدۋ كوپىرىنە جەتە المايدى.
سوندا ونىڭ بيىكتىگى قانشا دەيسىز عوي؟ ايتايىق. بۇل كوپىر جەردەن 496 مەتر بيىكتىكتە ورنالاسقان. ءبىر قىزىعى, قۇرىلىس كەزىندە كوتەرمە كراندار نەمەسە تىكۇشاقتار ەمەس, زىمىراندار نەگىزگى قىزمەتتى اتقارعان. حۋبەي پروۆينتسياسىنداعى وزەن اڭعارىنان وتەتىن كوپىر 2009 جىلى اشىلعان.
ءساندى كوپىر
وڭتۇستىك كورەيادا ورنالاسقان بانپو كوپىرى 1982 جىلى سالىنعان, الايدا 2007 جىلى سول ايماقتى جاڭارتۋ جوباسى قۇرىلىپ, 2009 جىلى تولىق پايدالانۋعا بەرىلەدى. ال ونىڭ ءسانىن كەلتىرىپ, اتاعىن اسپانداتىپ تۇرعان – كوپىر جانىنداعى سۋبۇرقاقتار.
سۋبۇرقاقتار 1 مينۋت ىشىندە 190 توننا سۋ توگەدى. كەشكە 10 مىڭ ءتۇرلى ءتۇستى شام كەمپىرقوساق سەكىلدى جارقىرايدى. ءارتۇرلى سۋرەتكە وزگەرىپ, ءتىپتى مۋزىكاعا سايكەس قوزعالادى. كوپىر سۇلۋلىعىمەن عانا ەمەس, ەكولوگيالىق تازالىعىمەن دە ەرەكشەلەنەدى. ايتا كەتەيىك, 2008 جىلى وسى كوپىردەگى سۋبۇرقاقتار ەڭ بيىك دەگەن اتقا يە بولىپ, گيننەستىڭ رەكوردتار كىتابىنا ەنگەن.
