سويتسەك, مۇنداي دا جاعداي بولادى ەكەن. «پيتەربورو نورت ەند» — «رويال مەيل» كوماندالارىنىڭ كەزەكتى ويىنىندا تورەشى ەندي ۋەين قاقپاشىمەن قاقتىعىسىپ, ءوزىن ويىننان شەتتەتكەن. ال «ساۋتگەمپتون ارمس» — «حەرستبورن تاررانت بريتيش لەگيون» كوماندالارىنا تورەلىك ەتكەن مەلۆين سيلۆەستەر فۋتبولشىمەن توبەلەسىپ قالعانى ءۇشىن وزىنە قىزىل قاعاز كورسەتىپتى.
ءۇش قاقپاسى بار فۋتبول
«جۇمىر جەردە تەڭبىل دوپ» دەمەكشى, ونىمەن كاسىبي تۇردە اينالىساتىندار دا, سونداي-اق ونى قىزىقتاۋشىلار دا وتە كوپ. قالىپتى فۋتبول قوس قاقپالى بولاتىنىن جاقسى بىلەمىز. ال اتالعان سپورتتىڭ ءۇش قاقپالى دا ءتۇرى بار ەكەنىن بىلەسىز بە؟
1990 جىلدارى دانيالىق سۋرەتشى اسگەر يورن ءۇش جاقتى فۋتبولدى ويلاپ تاپتى. ياعني التى بۇرىشتى الاڭدا ءۇش بىردەي كوماندا وينايدى. تاعى ءبىر قىزىعى, مۇندا ادەتتەگىدەي كوپ گول سوققان كوماندا ەمەس, ءوز قاقپالارىنا از گول وتكىزگەن كوماندا جەڭىمپاز اتانادى. بۇل سپورت تۇرىنەن قازىرگى كەزدە كوپ فەستيۆال وتكىزىلىپ تۇرادى.
مىقتىنىڭ اتى ء–بارىبىر مىقتى
2010 جىلى 17 مامىردا يسپانيادا وتە ءبىر ەرەكشە فۋتبول ءوتتى. «اتلەتيك بيلباو» فۋتبول كومانداسى ارداگەر ويىنشى حوسەبا ەتبەررياعا ارناپ قايىرىمدىلىق ماتچىن ۇيىمداستىرادى. بۇل دوپ دوداسىنىڭ ەرەكشەلىگى سول – اتالعان كوماندا ءبىر مەزەتتە 200 بالاعا قارسى ويىن وتكىزەدى.
بالالار 66-80-51 تاكتيكاسىن ۇستانادى. ياعني جاس تالانتتار كلۋبىنىڭ قۇرامىندا 66 قورعاۋشى, 80 جارتىلاي قورعاۋشى, 51 شابۋىلشى, سونداي-اق 3 قاقپاشى بولدى. بىراق ولار قانشا كوپ بولسا دا, كاسىپقوي فۋتبولشىلارعا توتەپ بەرە المادى. تارتىستى ويىندا «اتلەتيك بيلباو» 5:3 ەسەبىمەن جەڭىسكە جەتتى.
