بولاشاق مۇعالىم
ەلىمىزدە نەگىزگى ۇبت-نىڭ باستالعانىنا ءۇش اپتا بولدى. ازىرگە تەستىلەۋدىڭ بارلىق 140 سۇراعىنا جاۋاپ بەرىپ, بىردە-ءبىر سۇراقتان مۇدىرمەگەن ۇمىتكەر كەزدەسپەدى. ال وسى ۋاقىت ارالىعىندا تاپسىرعانداردىڭ ەڭ جوعارىسى 138 بالل بولىپ تۇر. مۇنداي ناتيجە – تۇركىستان وبلىسىنا قاراستى كەنتاۋ قالاسىنداعى جەكەمەنشىك مەكتەپتىڭ وقۋشىسى قوجانوۆ ايدوس حايرۋللا ۇلىنىكى. ايدوس 10 جىل بويى № 16 يۋري گاگارين اتىنداعى مەكتەپ-ليتسەيىندە وقىپ, 11-سىنىپتا «كەنتاۋ-گرانت» جەكەمەنشىك مەكتەبىنە اۋىسقان ەكەن. كەيىپكەرىمىز جىل بويى مەكتەپتەگى ۇبت-نىڭ بايقاۋ سىناقتارىندا 1-ورىندى بەرمەي كەلىپتى.
– ايدوستىڭ ەڭ باستى ەرەكشەلىگى – ونىڭ تاباندىلىعىندا. ول وتە ءتارتىپتى, بۇل جەردە وقۋعا, ىزدەنۋگە دەگەن تەمىردەي ءتارتىپتىڭ يەسى ەكەنىن مەڭزەپ وتىرمىن. سونىمەن قاتار وزىنە جوعارى تالاپ قويا بىلەدى, تاڭعى 7-دەن تۇنگى ۋاقىتقا دەيىن تابان الدىرماي جوسپارلاعان ىستەرىن ورىنداۋعا بار زەيىنىن اۋدارادى, ءوزىن ۇنەمى قاداعالاپ وتىرادى. ادامي قاسيەتتەرىنە كەلسەم, جاقىندارىنا جاناشىر, سىنىپتاستارىنا مەيىرىمدى, تەست تالداۋلارىندا ءوزىنىڭ بىلگەنىن قۇرداستارىنا جان-جاقتى ءتۇسىندىرىپ بەرۋدەن جالىقپايدى. جالپى, مەكتەپتە دە, سىنىپتا دا ءوز ورنىن تابا بىلگەن وقۋشى, – دەيدى ۇستازى ەلمۇرات دوسىموۆ.
جاناشىر جولداس
رەداكتسيامىزعا وقىرماندار تاراپىنان سۋ باسقان وڭىرلەردەگى تۇلەكتەرگە ۇبت-دا قانداي دا ءبىر جەڭىلدىكتەر بار-جوعىن سۇراپ حابارلاسقاندار بولدى. توتەنشە جاعدايدىڭ سەبەبىنەن ۇمىتكەرلەر تەستىلەۋگە دايىندالاتىن بىرنەشە كۇنىن جوعالتىپ العان شىعار, بىراق بۇل تالاپتى دا تالانتتى تالاپكەرگە توقتاۋ ەمەس ەكەن. وعان دالەل – نەگىزگى ۇبت-دان 137 بالل العان اقتوبە قالاسىنداعى ءماريا قۇرمانعاليەۆا اتىنداعى №32 مەكتەپ-گيمنازيا تۇلەگى ايشات ساعىناەۆا. كەيىپكەرىمىزدىڭ سىنىپ جەتەكشىسى گۇلجازيرا نۇرلىبەكقىزى ايشاتتىڭ بىلىمگە جۇيرىك قانا ەمەس, جولداستارىنا جاناشىر ەكەنىن جەتكىزدى.
– ايشات ءبىزدىڭ مەكتەپكە 7-سىنىپتا اۋىسىپ كەلدى. سول كەزدەن بەرى وعان قازاق ءتىلى مەن ادەبيەتىنەن ساباق بەرەمىن. ول – وتە زەرەك, جان-جاقتى وقۋشى, «التىن بەلگىگە» ۇمىتكەر. ونىڭ بار ىنتا-جىگەرى ءبىلىم الۋعا شوعىرلانعان, ءوزىنىڭ بايىپتى, سابىرلى مىنەزىمەن وسىنداي ناتيجەگە قول جەتكىزىپ وتىر. ايشات وقۋدا وزات بولۋىمەن قاتار, ادامي قاسيەتتەرى دە جوعارى. جالعىز ءوزى عانا ۇزدىك بولۋدى كوزدەمەي, سىنىپتا تاقىرىپتى تۇسىنبەي قالعان, وقىپ ۇلگەرمەي جاتقان جولداستارىنا كادىمگىدەي ۋاقىتىن ءبولىپ, ءتۇسىندىرىپ, كومەكتەسىپ وتىرادى. شاكىرتىم كوبىنە وسى قازاق ءتىلى مەن ادەبيەتىنەن شىعارماشىلىق بايقاۋلارعا, اتاپ ايتقاندا, ەسسە جازۋ, ابايتانۋ وليمپيادالارىنا, ءابىش كەكىلباي ۇلى وقۋلارى سايىسىنا قاتىستى, – دەدى گ.نۇرلىبەكقىزى.
مۇعالىمنىڭ ايتۋىنشا, كەيىپكەرىمىز – دەبات تۋرنيرلەرىنىڭ دە ۇزدىگى. ول رەسپۋبليكالىق دەبات تۋرنيرىنەن 1-ورىندى جەڭىپ, ءمينيستردىڭ قولىنان ماراپات العان.
جان-جاقتى جان
ۇبت ۇزدىگىنىڭ ءبىرى – پاۆلودار وبلىسىنا قاراستى اقسۋ قالاسىندا ورنالاسقان قانىش ساتباەۆ اتىنداعى دارىندى بالالارعا ارنالعان مامانداندىرىلعان گيمنازيانىڭ وقۋشىسى ايبات سۋات ۇلى ومىرزاق. كەيىپكەرىمىز نەگىزگى ۇلتتىق بىرىڭعاي تەستىلەۋدەن 137 بالل جيناعان. سىنىپ جەتەكشiسi قارلىعاش مۇحتارقىزى ايباتتىڭ ۇنەمى ىزدەنىستە جۇرەتىنىن جەتكىزدى.
– ايبات ءبىزدىڭ گيمنازيادا 1-سىنىپتان باستاپ وقيدى. ول – سابىرلى, مەيىرىمدى, بايىپتى, ادامدارمەن تەز ءتىل تابىسىپ كەتەتىن, سىنىپتاستارىنىڭ اراسىندا بەدەلدى وقۋشى. ۇنەمى ىزدەنىستە جۇرەدى, گەوگرافيا پانىنە دەگەن قىزىعۋشىلىعى وتە زور. شاكىرتىمىز ءوزىنىڭ, ۇستازدارىنىڭ ەڭبەگى ناتيجەسىندە ۇبت-دا جوعارى ناتيجەگە قول جەتكىزىپ وتىر. مەكتەپتەگى ءىس-شارالارعا بەلسەندى قاتىسىپ قانا قويماي, مەكتەپ ومىرىنە جاۋاپكەرشىلىكپەن قارايدى. ۇيىمداستىرۋشىلىق قابىلەتىن ەرەكشە اتاپ وتۋگە بولادى. مەكتەپتەگى ۆولەيبول, فۋتبول, تۋريزم كومانداسىنىڭ بەلدi مۇشەسi. ايبات – كوپبالالى وتباسىنان شىققان تاربيەلى بالا. ءوزى ادەبي كىتاپتار وقىعاندى ۇناتادى, ءبىلىمىن جان-جاقتى جەتىلدىرىپ جۇرەدى. ايباتتىڭ بولاشاعى جارقىن بولاتىنىنا سەنەمىن, – دەيدى مۇعالىمى ق.مۇحتارقىزى.
وسى ورايدا ءبىز كەيىپكەرلەرىمىزبەن تاقىرىپقا تۇزدىق رەتىندە از-كەم اڭگىمەلەسىپ, بارىنە بىردەي سۇراق قويدىق, بالاسى تەست تاپسىراتىن اتا-انالار, مۇعالىمدەر, تالاپكەرلەرگە پايدالى بولادى دەگەن ۇمىتپەن جاۋاپتارىن ۇسىنامىز.
بليتس-سۇحبات
«Egemen Qazaqstan»: قاي ماماندىقتى تاڭدادىڭىز؟
ايدوس قوجانوۆ: مەن «ماتەماتيكا ءپانىنىڭ مۇعالىمى» ماماندىعىن تاڭدادىم.
ايشات ساعىناەۆا: مەن بولاشاقتا ءىت سالاسىنىڭ مامانى بولعىم كەلەدى. الداعى ۋاقىتتا ءىت سالاسىنىڭ مىقتى مامانى رەتىندە ەلىمنىڭ دامۋىنا ۇلەس قوسۋدى قالايمىن.
ايبات ومىرزاق: «مەنەدجمەنت جانە باسقارۋ» ماماندىعىن تاڭداپ وتىرمىن. بولاشاقتا وسى سالادا ەڭبەك ەتكىم كەلەدى.
«Egemen Qazaqstan»: قانداي جوعارى وقۋ ورنىندا وقۋدى قالايسىز؟
ايدوس قوجانوۆ: الماتىدا ءبىلىم الۋدى قالايمىن, بىراق ءالى ۋنيۆەرسيتەتتى تاڭدامادىم.
ايشات ساعىناەۆا: ءىت سالاسى بويىنشا ماماندىققا الماتى قالاسىنداعى سۇلەيمەن-دەميرەل اتىنداعى ۋنيۆەرسيتەتتە وقۋدى كوزدەپ وتىرمىن.
ايبات ومىرزاق: استانا قالاسىندا ماقسۇت نارىكباەۆ ۋنيۆەرسيتەتىنە ءتۇسۋدى جوسپارلاپ وتىرمىن.
«Egemen Qazaqstan»: ۇبت-دان ۇزدىك بولۋدىڭ سىرى نەدە؟ ۇمكىتكەر-زامانداستارىڭىزعا قانداي كەڭەس بەرەر ەدىڭىز؟
ايدوس قوجانوۆ: ۇبت-دان ۇزدىك بولۋدىڭ سىرى – تۇراقتىلىقتا. قانداي دا ءبىر نارسەدەن جوعارى ناتيجەگە قول جەتكىزۋ ءۇشىن سول نارسەمەن ۇنەمى, تۇراقتى اينالىسۋ قاجەت. ۇبت تاپسىراتىن تۇلەكتەرگە ايتارىم: قوبالجىماڭدار, وزدەرىڭە عانا سەنىڭدەر, ءار كۇندەرىڭدى جوسپارلاڭدار.
ايشات ساعىناەۆا: مەنىڭشە, ۇبت-دان جوعارى بالل الۋ كەز كەلگەن ۇمىتكەردىڭ قولىنان كەلەدى. ەڭ باستىسى, ەڭبەكتەنىپ, دۇرىس ماقسات قويا بىلسە بولعانى. جوعارى ناتيجە كورسەتۋدە ءبىلىم العان مەكتەبىم ماعان ۇلكەن قولداۋ كورسەتتى. ادامنىڭ ءبىلىم بازاسىن قالىپتاستىراتىن – مەكتەپ. وسى ورايدا مەكتەبىمە, ساباق بەرگەن مۇعالىمدەرىمە العىس ايتامىن! تەستىلەۋگە دايىندىقتى 10-سىنىپتان باستادىم. دايىندالۋدا مەكتەپتىڭ بىلىمىمەن شەكتەلىپ قويماي, قوسىمشا ونلاين كۋرستارعا قاتىستىم. تالاپكەر زامانداستارىما ەش ۋايىمداماي, العا دۇرىس ماقسات قويا بىلۋگە, سول ماقساتتىڭ جولىندا ەڭبەك ەتۋگە كەڭەس بەرەمىن.
ايبات ومىرزاق: ۇبت-دا ۇزدىك بولۋدىڭ سىرى – تاباندى ەڭبەك پەن توزىمدىلىك. تەك كوپ ەڭبەكتەنىپ, جوعارى ناتيجەگە جەتۋگە بولادى. ارينە, بۇل جولدا گيمنازيامنىڭ سىڭىرگەن ەڭبەگى ولشەۋسىز. بولاشاق تۇلەكتەرگە دايىندىقتى ەرتە باستاپ, بىرگە دايىندالاتىن دوس تاۋىپ, بارلىق ۋاقىتتى وقۋعا ارناۋعا شاقىرامىن.
«Egemen Qazaqstan»: وسىعان دەيىنگى سىناق تەستىلەۋلەردە قانشا بالل جينادىڭىز؟
ايدوس قوجانوۆ: قاڭتارداعى ۇبت-دا – 132, ناۋرىزدا 122 بالل جينادىم.
ايشات ساعىناەۆا: قاڭتارداعى ۇبت-دا – 121, ناۋرىزدا 133 بالل الدىم.
ايبات ومىرزاق: قاڭتارداعى ۇبت-دا – 113, ناۋرىزدا 124 بالل جينادىم.
