ول كەزەڭدە كومپيۋتەرلىك گرافيكا بولماعاندىقتان, سايتتا تەك ءماتىن عانا تۇرعان. ەڭ العاشىندا براۋزەرلەر مەن سەرۆەرلەردى قالاي ورناتۋ كەرەكتىگى تۋرالى اقپارات جاريالانىپ وتىرعان. كەيىن بەرنەرس-لي باسقا سايتتارعا دا گيپەرسىلتەمەلەر جاساۋدى باستادى. 1991 جىلى ۆەب-سەرۆەر ەۋروپانىڭ باسقا دا ايماقتارىنا تارالا باستايدى. 1993 جىلدىڭ قازان ايىندا ۆەب-سەرۆەرلەر سانى الەم بويىنشا 200-گە جەتەدى. ءبىر قىزىعى, بەرنەرس-لي جاساپ شىققان ەڭ العاشقى سايت ءالى كۇنگە دەيىن جۇمىس ىستەيدى.
ۇشاق
1903 جىلى 17 جەلتوقساندا العاشقى ۇشاقتىڭ كوككە سامعاعانى تاريحتا التىن ارىپتەرمەن جازىلدى. اۋەدە سامعاعان العاشقى مەحانيكانىڭ اۆتورلارى – اعايىندى ورۆيلل جانە ۋيلبەر رايتتار.
ولار 1903 جىلى العاشقى ۇشاقتىڭ جوباسىن اياقتاپ, ونى ءىس جۇزىندە تەكسەرىپ كورەدى. تاجىريبە ورنى رەتىندە سولتۇستىك كارولينانىڭ كيتتي حوۋك دەگەن جەلدى ايماعىن تاڭداپ الادى. ورۆيلل 10,9 كم/ساع. جىلدامدىقپەن كوكتە 12 سەكۋند (37 مەتر بيىكتىكتە) سامعايدى. كەلەسى ارەكەتتەر ودان دا جوعارى ناتيجەلەردى كورسەتەدى. ماسەلەن, 1905 جىلى كوكتە جارتى ساعات ۇزدىكسىز ۇشا الاتىن دەڭگەيگە جەتسە, 1908 جىلى اسكەري باعىتتا قولدانىسقا ەنەدى. قازىرگى تاڭدا ول ۆاشينگتون قالاسىنداعى «ۇلتتىق اۋە جانە عارىش مۋزەيىندە» كورمەگە قويىلعان.
ۇيالى تەلەفون
الەمدەگى العاشقى ۇيالى تەلەفوندى ويلاپ تاپقان مارتين كۋپەر ەسىمدى ونەرتاپقىش.
1973 جىلدىڭ 3 ساۋىرىندە BeLL Laboratories كومپانياسى زەرتتەۋ ءبولىمىنىڭ باستىعى دجوەل ەنگەلدىڭ جۇمىس كابينەتىنە الدەكىم قوڭىراۋ شالادى. تەلەفون تۇتقاسىن كوتەرگەن دجوەل باستى باسەكەلەسى ءمارتيننىڭ داۋسىن بىردەن تانىدى. «قايدان قوڭىراۋ شالىپ تۇرعانىمدى بىلەسىڭ بە؟ مەن ۇيالى تەلەفوننان حابارلاسىپ تۇرمىن», دەيدى. كەيىن م.كۋپەر بۇل وقيعا تۋرالى بىلاي دەپ ەسكە الادى: «ونىڭ نە دەپ جاۋاپ بەرگەنى ەسىمدە جوق, بىراق تىستەرىنىڭ سىقىرلاعانىن ەستىگەندەي بولدىم». سونىمەن بۇل كۇنگى ۇيالى تەلەفوننىڭ اتاسى – Motorola DynaTac 8000x. قۇرىلعى بىرنەشە مارتە جەتىلدىرىلىپ, 1984 جىلى ساتىلىمعا شىقتى.
