تاراپتار جيىندا تسيفرلىق ءبىلىم بەرۋدى دامىتۋ ماسەلەلەرى, سونداي-اق ءبىلىم ۇيىمدارىندا كيبەرقاۋىپسىزدىك پەن كيبەرەتيكانى دامىتۋ ماسەلەلەرى بويىنشا كورەيامەن تاجىريبە الماسۋ بارىسىن ءسوز ەتتى. وسى ورايدا وقىرمانعا تۇسىنىكتى بولۋ ءۇشىن اقپارات بەرە كەتەيىك, «KERIS» (korea education and research information service) – وڭتۇستىك كورەيا رەسپۋبليكاسى ءبىلىم عىلىم جانە تەحنولوگيالار مينيسترلىگىنە قاراستى ۇكىمەتتىك ۇيىم. اتالعان ۇيىم وڭتۇستىك كورەيانىڭ جانە شەتەلدىڭ ءبىلىم سالاسىنداعى اقپاراتتىق جانە كوممۋنيكاتسيالىق تەحنولوگيانى دامىتۋعا باعىتتالعان, سونىمەن قاتار دۇنيەجۇزىلىك بانك, يۋنەسكو سياقتى حالىقارالىق ۇيىمدارمەن تىعىز جۇمىس ىستەيدى.
تالقىلاۋدا قازاقستاننىڭ وقۋ-اعارتۋ ۆيتسە-ءمينيسترى مينيسترلىك تاراپىنان جۇرگىزىلىپ جاتقان جۇمىس پەن ءبىلىم ساپاسىن ارتتىرۋ ماقساتىنداعى IT-تەحنولوگيالاردى دامىتۋ ماسەلەلەرىنە توقتالدى.
«كورەيانىڭ تاجىريبەسى قازاقستاننىڭ ءبىلىم بەرۋ جۇيەسىندە جاساندى ينتەللەكتىنى دامىتۋعا ىقپال ەتەتىن بولادى. بۇل كەزدەسۋ ءبىلىم ۇيىمدارىندا قاۋىپسىز, ەتيكالىق ءبىلىم بەرۋ ورتاسىن جاقسارتۋعا جانە قۇرۋعا ىقپال ەتەتىن كيبەرقاۋىپسىزدىك جانە كيبەربۋللينگ بويىنشا نۇسقاۋلىقتاردى ازىرلەۋدەگى ماڭىزدى قادام بولاتىنىنا سەنىمدىمىن», دەدى اراي ورازوۆا.
وقۋ-اعارتۋ مينيسترلىگىنىڭ تاراتقان اقپاراتىنا سۇيەنسەك, «KERIS» ساراپشىلارى ا.بايتۇرسىن ۇلى اتىنداعى «تالداۋ» ۇلتتىق زەرتتەۋلەر جانە ءبىلىمدى باعالاۋ ورتالىعى» اكتسيونەرلىك قوعامى جانە يۋنەسكو-مەن بىرلەسكەن باعدارلاما شەڭبەرىندە ەلىمىزدەگى ءبىلىم الۋشىلاردىڭ اقپاراتتىق جانە كوممۋنيكاتسيالىق تەحنولوگيالار توڭىرەگىندە ساۋاتتىلىعىن ارتتىرۋ ءۇشىن باسشىلىق قاعيداتتاردى ازىرلەۋ بويىنشا جوبا جۇرگىزىپ جاتىر. ەلىمىزدە تسيفرلىق ءبىلىمدى دامىتۋ ماسەلەلەرىن زەردەلەۋ ءۇشىن كورەيلىك ساراپشىلار ءبىلىم سالاسىنداعى ءتۇرلى ستەيكحولدەرلەرمەن, اتاپ ايتقاندا, استانا قالاسى ءبىلىم باسقارماسىنىڭ باسشىلارىمەن جانە ماماندارىمەن, سونداي-اق پەداگوگتەرمەن بىرقاتار كەزدەسۋ وتكىزدى. جوبا قورىتىندىسى بويىنشا كورەيلىك ساراپشىلار ەلىمىزدە جۇرگىزىلگەن زەرتتەۋلەر نەگىزىندە تولىق ەسەپ پەن وتاندىق ءبىلىم الۋشىلاردىڭ تسيفرلىق ساۋاتتىلىعىن دامىتۋ ءۇشىن پراكتيكالىق ۇسىنىمدار ازىرلەيدى.
