دەپۋتاتتار ءبىرىنشى وقىلىمدا ەكونوميكالىق قۇقىق بۇزۋشىلىقتاردى ودان ءارى قىلمىستىق سيپاتتان ارىلتۋ جانە زاڭسىز جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس-قيمىل ماسەلەلەرى تۋرالى زاڭ جوباسىن قارايدى. زاڭ جوبالارىن پارلامەنت دەپۋتاتتارى مەملەكەت باسشىسىنىڭ 2023 جىلعى 1 قىركۇيەكتەگى «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىن ورىنداۋ ماقساتىندا ازىرلەدى. قۇجاتتا ەكونوميكالىق قۇقىق بۇزۋشىلىقتاردى ودان ءارى دەكريميناليزاتسيالاۋ جانە كاسىپكەرلەردى سالىق قىلمىستارى بويىنشا قىلمىستىق جاۋاپكەرشىلىككە تارتۋ نورمالارىنىڭ شەگىن ايقىنداۋدىڭ ءادىل تەتىگىن ەنگىزۋ تاپسىرىلدى.
ەكىنشى وقىلىمدا دەپۋتاتتار وزدەرى باستاماشى بولعان ەلەكتروموبيلدەر ينفراقۇرىلىمىن دامىتۋ ماقساتىمەن ازىرلەگەن ەكولوگيالىق تازا كولىكتى تانىمال ەتۋ جانە ەلەكتروموبيلدەرگە ارنالعان ينفراقۇرىلىمدى دامىتۋ ماسەلەلەرى جونىندەگى زاڭ جوباسىن قارايدى.
سونداي-اق جالپى وتىرىستىڭ كۇن ءتارتىبى جوباسىنا سپورتتىق باعىتتاعى جىلقىلاردىڭ قازاق تۇقىمىن ساقتاۋ جانە ءوسىمىن مولايتۋ ماسەلەلەرى جونىندەگى دەپۋتاتتار ازىرلەگەن زاڭ جوباسى ەنگىزىلدى. بۇل قۇجات اسىلتۇقىمدى جىلقىلاردىڭ ساپاسىن جاقسارتۋ جانە قوستانايلىق جىلقى تۇقىمىنىڭ باسىن ۇلعايتۋ ءۇشىن سەلەكتسيالىق جانە اسىلتۇقىمداندىرۋ جۇمىستارىن جۇرگىزۋگە باعىتتالعان.
دەپۋتاتتار الداعى وتىرىستا تۇركى مەملەكەتتەرى ۇيىمىنا مۇشە مەملەكەتتەردىڭ ۇكىمەتتەرى اراسىنداعى وڭايلاتىلعان كەدەن ءدالىزىن قۇرۋ تۋرالى كەلىسىمدى راتيفيكاتسيالاۋ تۋرالى زاڭ جوباسىن تالقىلايدى. كەلىسىم اياسىندا اقپارات الماسۋ تاراپتاردىڭ ساۋدا وپەراتورلارىمەن وڭايلاتىلعان كەدەندىك ءدالىزدى پايدالانا وتىرىپ جانە ەرىكتى نەگىزدە تاسىمالداناتىن جۇكتەر بويىنشا جۇزەگە اسىرىلادى.
