كوللاجداردى جاساعان – الماس ماناپ, «EQ»
ءباسپاسوز ءماسليحاتىندا ءسوز العان ۇلتتىق تەستىلەۋ ورتالىعىنىڭ ديرەكتورى بولاتبەك ءابدىراسىلوۆ تالاپكەرلەردىڭ كوبى تەستىلەۋدى قازاق تىلىندە تاپسىرۋدى تاڭداعانىن جەتكىزدى. ونىڭ سوزىنە قاراعاندا, قازىرگى تاڭدا 330 مىڭعا جۋىق ءوتىنىش قابىلداندى. وتكەن جىلمەن سالىستىرعاندا تەستىلەنۋشىلەردىڭ سانى 19 مىڭعا ارتقان, بۇعان ەلىمىزدەگى دەموگرافيانىڭ ءوسۋى سەبەپ. 2023 جىلى 162 مىڭ تالاپكەر ۇبت-نى 291 مىڭ رەت تاپسىرعان ەدى. 6 وبلىستا وتىنىشتەر قابىلداۋ ءالى دە جالعاسىپ جاتقانىن ەسكەرسەك, بۇل سان ءالى دە ءوسۋى ابدەن مۇمكىن.
«تالاپكەرلەردىڭ باسىم بولىگى, ياعني 75%-ى ەمتيحاندى قازاق تىلىندە تاپسىرۋدى تاڭداعان. 25%-عا جۋىق تەستىلەنۋشى ورىس ءتىلىن, 221 ادام اعىلشىن تىلىندە تاپسىرۋدى ۇيعاردى. تەستىلەۋ فورماتى وزگەرىسسىز قالدى: تالاپكەرلەر ءۇش مىندەتتى جانە ەكى تاڭداۋ بويىنشا ەكى پاننەن تەست تاپسىرادى. «وقۋ ساۋاتتىلىعى» مەن «ماتەماتيكالىق ساۋاتتىلىق» مىندەتتى پاندەرىنەن تاپسىرمالار سانى 5 سۇراققا قىسقاردى. بۇل بەيىندى پاندەر بويىنشا سۇراقتار سانىن 40-قا دەيىن ارتتىرۋعا مۇمكىندىك بەردى. سونىمەن قاتار بەيىندىك پاندەردە بەرىلگەن تىزىمنەن سايكەستىكتى انىقتاۋعا ارنالعان 5 تاپسىرما قوسىلدى. وسىلايشا, ۇبت تاپسىرمالار سانى وزگەرىسسىز قالادى, جالپى 120 سۇراق. ونىڭ ىشىندە «قازاقستان تاريحىنان» 20, «وقۋ ساۋاتتىلىعىنان» 10, «ماتەماتيكالىق ساۋاتتىلىقتان» 10 جانە ەكى بەيىندى ءپان بويىنشا 40 تاپسىرما. جوعارى ۇپاي – 140, بۇل دا وزگەرىسسىز قالدى. تەستىلەۋدىڭ جالپى ۋاقىتى – 4 ساعات (240 مينۋت)», دەدى ب.ءابدىراسىلوۆ.
ۇلتتىق تەستىلەۋ ورتالىعى باسشىسىنىڭ بايانداۋىنشا, وتكەن جىلدارداعىداي, 2024 جىلى ۇبت-دا ەرەكشە ءبىلىم بەرۋ قاجەتتىلىگى بار تالاپكەرلەرگە ۇسىنىلاتىن قوسىمشا 40 مينۋت ۋاقىت ساقتالادى. سونىمەن قاتار كورۋ قابىلەتى بۇزىلعان بالالاردىڭ ىڭعايى ءۇشىن سىزبا جانە دياگراممالارسىز سۇراقتار ازىرلەندى. قابىلدانعان شارالار ناتيجەسىندە تەستىلەۋگە قاتىساتىن مۇمكىندىگى شەكتەۋلى بالالار سانى ارتىپ كەلەدى. ەگەر 2021 جىلى ۇبت-عا 90 تالاپكەر قاتىسسا, 2022 جانە 2023 جىلدارى ولاردىڭ سانى 500 ادامعا جەتتى.
«نەگىزى, مينيسترلىك ءبىلىمدى تالاپكەرلەردىڭ جوعارى وقۋ ورىندارىنا قابىلدانۋىنا مۇددەلى. سوندىقتان ۇبت وتكىزۋ بارىسىندا بىزگە اكادەميالىق ادالدىقتى قامتاماسىز ەتۋ ماڭىزدى. وسى ماقساتتا 2022 جىلى ەنگىزىلگەن «1 كومپيۋتەر – 2 كامەرا – 1 تەستىلەنۋشى» قاعيداتى ساقتالادى. سونداي-اق وتكەن جىلدان باستاپ تەست نۇسقالارى تاڭبالانعانىن اتاپ وتكەن ءجون. ياعني ۇبت-عا قاتىسۋشىلاردىڭ ارقايسىسىندا جەكە تەست نۇسقاسى بولادى. تىيىم سالعان زاتتاردى تەستىلەۋگە كىرگىزۋگە تىرىسقان, تەستىلەۋدە ەرەجە بۇزعان تالاپكەرلەردىڭ ناتيجەلەرى جويىلادى. وسى ورايدا ۇلتتىق تەستىلەۋ ورتالىعى تەست تاپسىرمالارىنىڭ ساپاسىنا ەرەكشە كوڭىل بولەتىنىن ايتىپ وتەيىن. مىسالى, قاڭتار ۇبت-سىندا مازمۇنى بويىنشا قاناعاتتاندىرىلعان اپەللياتسيالىق تاپسىرمالاردىڭ سانى – 49 بىرەگەي سۇراق, ال ناۋرىز ۇبت-سىندا 21 بىرەگەي سۇراق بولدى. ازىرلەۋشىلەردى, تەستىلەۋ بويىنشا ساراپشىلاردى, ورتالىق ماماندارىن حالىقارالىق تاجىريبەگە سايكەس تاپسىرمالاردى ءتيىمدى ازىرلەۋگە, ساراپتاۋعا وقىتۋ ماقساتىندا مينيسترلىك دۇنيەجۇزىلىك بانكتىڭ «ورتا ءبىلىم بەرۋدى جاڭعىرتۋ» جوباسىمەن 350 ادامدى ارنايى كۋرستان وتكىزدى», دەدى سپيكەر ب.ءابدىراسىلوۆ.
ورتالىق باسشىسىنىڭ ايتۋىنشا, ۇلتتىق تەستىلەۋ ورتالىعىنىڭ جۇمىسى تەستىلەۋدى ساپالى, ادال وتكىزۋگە عانا ەمەس, سونىمەن قاتار ۇبت-عا دايىندالۋدا تالاپكەرلەردى قولداۋعا باعىتتالعان. مىسالى, ورتالىق تالاپكەرلەرگە تەگىن ونلاين ساباقتار, بايقاۋ سىناقتارىن, قاجەتتى وقۋ ماتەريالدارىن ۇسىنادى. وقۋ جىلىنىڭ باسىندا ورتالىق سايتىندا تەست تاپسىرمالارى قۇراستىرىلعان وقۋلىقتار ءتىزىمى مەن تەست جوسپارى; «قازاقستان تاريحى» جانە «دۇنيەجۇزى تاريحى» پاندەرى بويىنشا 100 تاريحي داتا ءتىزىمى; «ينفورماتيكا» پانىنەن تەرميندەر ءتىزىمى; «قازاق ادەبيەتى» جانە «ورىس ادەبيەتى» بويىنشا ادەبي شىعارمالار ءتىزىمى جاريالاندى.
«قاتىسۋشىلار تەستىلەۋ قورىتىندىسىمەن كەلىسپەگەن جاعدايدا بىردەن اپەللياتسياعا بەرە الادى. تالاپكەرلەر تەست ناتيجەلەرىنە سۇراقتاردىڭ مازمۇنى بويىنشا دا, تەحنيكالىق سەبەپتەر بويىنشا دا اپەللياتسياعا بەرە الادى. سۇراقتاردىڭ مازمۇنى بويىنشا اپەللياتسيا تەستىلەۋ اياقتالعاننان كەيىنگى العاشقى 30 مينۋتتا بەرىلەدى, بۇنى دالەلدى تۇسىنىكتەمەمەن نەگىزدەۋ كەرەك. ەگەر تەستىلەنۋشى دۇرىس جاۋاپتى تابۋعا كەدەرگى كەلتىرەتىن تاپسىرما شارتتارىندا فراگمەنتتىڭ ء(ماتىن, سحەما, سىزبالار, كەستەلەر) جوقتىعىن انىقتاسا, تەحنيكالىق سەبەپتەر بويىنشا اپەللياتسياعا بەرۋگە قۇقىلى. اپەللياتسيا بويىنشا وتىنىشتەردى رەسپۋبليكالىق اپەللياتسيالىق كوميسسيا 30 جۇمىس كۇنى ىشىندە قارايدى. اتاپ وتسەك, بيىلدان باستاپ كوميسسيا وتىرىسى باستالعانعا دەيىن اپەللياتسيانى جەكە كابينەت ارقىلى قايتارىپ الۋعا بولادى», دەدى ورتالىق باسشىسى ب.ءابدىراسىلوۆ.
