فوتو: Asylkhan Seidakhmet. JASTARRUHY
«جاستار رۋحى» جاستار قاناتىنىڭ توراعاسى اقەركە يسكاندەروۆانىڭ ايتۋىنشا, سۋ تاسقىنى باستالعالى بەرى قۇتقارۋشىلارمەن قاتار كومەك كورسەتىپ, الدىڭعى قاتاردا جۇرگەن جاستار سانى ارتا تۇسكەن.
«جەرگىلىكتى ورگاندار مەن ۆولونتەرلەر ءوزارا تىعىز جۇمىس جۇرگىزىپ جاتىر. اپاتتان زارداپ شەككەن تۇرعىندارعا قاجەت زاتتاردى جەتكىزۋ كەرەك. «جاستار رۋحى» جانىنان ەلىمىزدىڭ بارلىق وڭىرىندە جەدەل ارەكەت ەتەتىن رەسپۋبليكالىق ۆولونتەرلەر شتابى قۇرىلدى. سۋدان زارداپ شەككەن تۇرعىندار نەمەسە ۆولونتەرلەر قاتارىنا قوسىلام دەۋشى جاستار وسى شتابقا حابارلاسا الادى. ەلىمىزدەگى بارلىق رەسپۋبليكالىق ۆولونتەرلىك بىرلەستىكتەر جۇمىلا جۇمىس ىستەپ كەلەدى. ولاردىڭ جۇمىسىن «جاستار رۋحى» جاستار قاناتى ۇيلەستىرىپ وتىر. ماسەلەن, جۋىردا اتىراۋ وبلىسىنا جەتكەن 30 توننا گۋمانيتارلىق كومەكتى «جاستار رۋحى» مەن قازاقستان ستۋدەنتتەرى اليانسى ۆولونتەرلەرى قابىلداپ الىپ, پۋنكتتەرگە جەتكىزدى. سونداي-اق «Dauletten» قايىرىمدىلىق قورىمەن بىرگە سولتۇستىك قازاقستان وبلىسىنا كەرەكتى زاتتاردى جونەلتتىك», دەدى ا.يسكاندەروۆا.
سۋ تاسقىنى باستالعالى بەرى ۆولونتەرلەردىڭ بىرلەسكەن كۇش-جىگەرى تابيعي اپات سالدارىن ازايتۋعا, زارداپ شەككەن ازاماتتارعا جان-جاقتى كومەك كورسەتۋگە باعىتتالعان. اتاپ ايتساق, حالىقتى قاۋىپسىز ورىندارعا كوشىرۋ, سۋ بوگەۋ, وزەن دەڭگەيىنىڭ كوتەرىلۋىنە جول بەرمەۋ ءۇشىن قاپشىقتاردى قۇممەن تولتىرۋ, گۋمانيتارلىق كومەك جيناپ, ونى ۇلەستىرۋ, قۇتقارۋشىلاردى ىستىق تاماقپەن, شايمەن قامتاماسىز ەتۋ, سۋ استىندا قالۋ قاۋپى بار ۇيلەردىڭ ماڭىن قاردان تازارتۋ جۇمىستارى اتقارىلىپ جاتىر.
سونداي-اق «Biz Birgemiz» قوعامدىق قورىنىڭ قولداۋىمەن ازىق-ت ۇلىكپەن قاتار ەلەكتر جارىعىنسىز وتىرعان اۋىلدارعا گەنەراتورلار دا جەتكىزىلدى. وسى تۇستا ايتا كەتەتىن جايت, گۋمانيتارلىق كومەكتى تەز ءارى دەرەۋ جەتكىزۋ ءۇشىن توتەنشە جاعدايلار مينيسترلىگى تىكۇشاقپەن قامتاماسىز ەتتى. اۋە جولى ارقىلى كومەك اتىراۋ, اقتوبە, ماڭعىستاۋ وبلىستارىنا جەتتى.
وكىنىشكە قاراي, سۋ تاسقىنى باستالعان ساتتە اباي وبلىسىندا ادامدار جوعالدى. ولاردى ىزدەستىرۋ جۇمىسىنا دا ەرىكتىلەر اتسالىستى. سونداي-اق «جاستار رۋحىنىڭ» 100 ۆولونتەرى قوستاناي قالاسى اكىمىنىڭ شاقىرۋىن قابىلداپ, جاعالاۋدى قۇم سالىنعان قاپتارمەن نىعايتۋعا كومەكتەستى. ۆولونتەرلەر وڭىردەگى سۋ باسۋ قاۋپى بار اۋماقتاردا تۇرعىندارمەن يىق تىرەسە جۇمىس ىستەپ, جاعاعا بوگەت قويۋ ىسىنە بەلسەنە اتسالىستى. وسىعان ۇقساس جۇمىس وزگە وڭىرلەردە دە ۇيىمداستىرىلدى.
«وزەن تاسيدى دەگەننەن بەرى قالا ماڭىنداعى شاعىن اۋدانداردا قاپتارعا قۇم تولتىرىپ, بوگەت سالىپ جاتىرمىز. ۆولونتەرلەر قاتارىندا جاسوسپىرىمدەر, ەگدە جاستاعى تۇرعىندار, ءتۇرلى سالا قىزمەتكەرلەرى بار. ۋاقىتپەن ساناسپاي اپاتتىڭ الدىن الۋعا بارىنشا كۇش سالۋدامىز», دەيدى اتىراۋلىق ۆولونتەر جالعاس حالەلوۆ.
