جاسوسپىرىمدەردىڭ تەمەكى ونىمدەرىنە اۋەستىگى قوعامنىڭ وزەكتى ماسەلەسىنە اينالعالى قاشان. ءۇي مەن تۇزدە كورگەن-تۇيگەن ادەتتى تەز قابىلدايتىن مەكتەپ وقۋشىلارىنىڭ اسىرەسە ۆەيپتى تۇتىنۋى – بۇگىنگى پسيحولوگيالىق-پەداگوگيكالىق پروبلەما. تۇيتكىلمەن كۇرەستە جۇيەلى ءارى كەشەندى جۇمىس قاجەت. وسىعان وراي سارىارقا اۋدانى اكىمدىگىنىڭ, دەنە شىنىقتىرۋ جانە سپورت باسقارماسى مەن جاستار ساياساتى ماسەلەلەرى باسقارماسىنىڭ قولداۋىمەن ناۋقان ۇيىمداستىرىلدى.
– قازىر ءبىز تەرىس ءبىر تەندەنتسيانى انىق بايقاپ ءجۇرمىز. 25 جاسقا دەيىنگى جاستار اراسىندا ەلەكتروندى تەمەكى كەڭ تارالعان. اكتسيا اياسىندا ءبىز وسى تەمەكى, ۆەيپ ونىمدەرىن تۇتىناتىن جاستارعا قولدارىنداعى زياندى زاتتاردى بوكس قولعابىنا, دوپقا, تۋرنيكەتكە ايىرباستاۋدى ۇسىنامىز. وسىلايشا, ەلوردالىقتاردى سالاماتتى ءومىر سالتىنا شاقىرا وتىرىپ, قالامىزعا, تابيعاتىمىزعا دەگەن جاناشىرلىققا, وڭ كوزقاراسقا تارتامىز, – دەدى استانا قالاسى جاستار ساياساتى ماسەلەلەرى باسقارماسىنىڭ باسشىسى سامات يبراەۆ.
ناۋقانعا ەلوردالىق كيوكۋشينكاي-كان كاراتەشى ءاليحان اسۋباەۆ قاتىستى. ول مۇنداي شارالاردىڭ ماڭىزدىلىعىن اتاپ ءوتىپ, جاستاردى سپورتپەن اينالىسۋعا شاقىردى.
– اكتسيا ارقىلى ءبىز جاستارعا سپورتپەن شۇعىلدانىپ, دەنساۋلىقتارىن كۇتۋ كەرەكتىگىن كورسەتكىمىز كەلەدى. ءبىزدىڭ ماقسات – جامان ادەتتەردەن ارىلۋ ءۇشىن بىرىگىپ جۇمىس ىستەۋ. بۇل كوپشىلىككە موتيۆاتسيا بولادى دەپ سەنەمىز, – دەدى ءا.اسۋباەۆ.
استانا قالالىق ءماسليحاتىنىڭ دەپۋتاتى ارسلانبەك ماعزۇمنىڭ ايتۋىنشا, جاناشىرلىقتى جالاۋ ەتكەن ناۋقان ەلوردادا ءجيى وتكىزىلىپ تۇرادى.
– ءبىر اي بۇرىن اتاقتى قازاقستاندىق سپورتشى ۆاسيلي تاحتايمەن بىرگە وسىنداي اكتسيا جۇرگىزگەن بولاتىنبىز. الداعى ۋاقىتتا مۇنداي ءىس-شارالاردى جالعاستىرامىز. يگى ءىستىڭ وڭ ناتيجەسىن كورىپ وتىرمىز. اكتسيا بارىسىندا جينالعان ەلەكتروندى قۇرىلعىلار مامانداندىرىلعان زاۋىتتا جويىلادى, – دەدى ول.
