كونفەرەنتسيادا مينيستر س.نۇربەك اتالعان جيىن زەرتتەۋ ورتالىقتارى مەن جوعارى وقۋ ورىندارى اراسىنداعى كووپەراتسيا مەن ىنتىماقتاستىقتى كەڭەيتۋ ءۇشىن جاڭا مۇمكىندىك اشۋعا مۇمكىندىك بەرەتىنىن ايتتى. ء«بىزدىڭ كۇش-جىگەرىمىز ەلىمىزدە زەرتتەۋ جۇمىستارىمەن اينالىساتىن مۇمكىندىگىنشە كوپ جوعارى وقۋ ورنىن قۇرۋعا باعىتتالعان. بۇل رەتتە قازاقستان ءوزىن جوعارى ءبىلىم مەن الەمدىك زەرتتەۋلەر حابى رەتىندە تانىتا الاتىنىنا سەنەمىز. جىل سايىن مينيسترلىك جەتەكشى حالىقارالىق عىلىمي ينستيتۋتتار مەن ۋنيۆەرسيتەتتەرگە تاعىلىمدامادان وتۋگە 500 عالىمدى جىبەرىپ وتىر. مۇنداي مۇمكىندىك عالىمدارىمىزعا ەۋروپالىق ينستيتۋتتارمەن, جوعارى وقۋ ورىندارىمەن بىرلەسىپ, ودان ءارى دامۋ مەن ارىپتەستىككە باعىتتالعان باعدارلامالاردى پىسىقتاۋعا مۇمكىندىك بەرەدى», دەدى مينيستر.
NU قازاقستانداعى تۇراقتى دامۋ سالاسىنداعى شەشىمدەردى ازىرلەۋ جونىندەگى بۇۇ جەلىسى – SDSN-ءنىڭ ۇلتتىق بولىمشەسى سانالادى. وسىعان وراي NU بۇۇ-نىڭ تۇراقتى دامۋ ماقساتتارىنا قول جەتكىزۋ ءۇشىن پراكتيكالىق شەشىمدەردى ازىرلەۋ مەن زەرتتەۋلەر جۇرگىزۋ جونىندەگى ديالوگتى ناسيحاتتاۋ باعىتىندا ءال-فارابي اتىنداعى قازاق ۇلتتىق زەرتتەۋ ۋنيۆەرسيتەتى, سۇلەيمەن دەميرەل اتىنداعى ۋنيۆەرسيتەت, قازاق ۇلتتىق اگرارلىق زەرتتەۋ ۋنيۆەرسيتەتى, قازاق-بريتان تەحنيكالىق ۋنيۆەرسيتەتى, باسقا دا 25 وتاندىق ۋنيۆەرسيتەت پەن عىلىمي زەرتتەۋ ينستيتۋتىن بىرىكتىردى. SDSN-ءنىڭ ۇلتتىق بولىمشەسى سانالاتىن NU پرەزيدەنتىنىڭ مىندەتىن اتقارۋشى, دوكتور يلەسانمي ادەسيدا: «قورشاعان ورتانى قورعاۋ, ەنەرگەتيكا جانە كليماتتىڭ وزگەرۋى سالاسىنداعى تىعىز ىنتىماقتاستىق ءۇشىن ەلدەر مەن كونتينەنتتەر اراسىندا تاجىريبەمەن ءبولىسۋ وتە ماڭىزدى. SDSN Kazakhstan بازاسى ۋنيۆەرسيتەتىمىزدە ەكەنىنە قۋانىشتىمىز جانە ءبىزدىڭ ستراتەگيالىق دامۋ جوسپارىمىزعا سايكەس SDSN وسى سالادا ايتارلىقتاي ناتيجەلەرگە قول جەتكىزۋدى جوسپارلاپ وتىر. سونداي-اق مينيسترلىكتىڭ قارجىلىق قولداۋىنىڭ ناتيجەسىندە وسى باعىتتارعا جۇمسالاتىن كۇش-جىگەر جاندانادى», دەدى.
ال ەۋروپالىق كوميسسيانىڭ زەرتتەۋلەر جانە يننوۆاتسيالار جونىندەگى باس ديرەكتوراتىنىڭ وكىلى كرەمەنا ميلەۆا كليماتتىڭ وزگەرۋىنە باعىتتالعان زەرتتەۋلەر مەن يننوۆاتسيالاردى قارجىلاندىرۋ جونىندەگى ەو-نىڭ نەگىزگى باعدارلاماسى Horizon Europe قولداۋ قۇرالدارى تۋرالى ايتتى. عىلىم قورىنىڭ باسقارما توراعاسى كاميل اقاتوۆتىڭ ايتۋىنشا, قور Horizon Europe اياسىندا ەۋروپالىق وداقپەن ناتيجەلى جانە ءتيىمدى ىنتىماقتاستىق قۇرۋعا مۇددەلى. ء«بىز جەتىستىكتەرىمىزدى ءبولىسىپ قانا قويماي, سونداي-اق تۇراقتى دامۋ سالاسىندا ناقتى ناتيجەلەرگە جەتكىزەتىن ورتاق جوبالار مەن زەرتتەۋلەرگە بەلسەندى تۇردە قاتىسۋعا دايىنبىز. بۇگىنگى تاڭدا عىلىم قورى گەرمانيا, فرانتسيا, پولشا, بولگاريا جانە تۇركيانىڭ ۇيلەستىرۋ ورتالىقتارىمەن سەرىكتەستىكتى بەلسەندى تۇردە دامىتىپ جاتىر», دەدى ك.اقاتوۆ.
قاتىسۋشىلار كونفەرەنتسيا الاڭىندا «قازاقستاندىق زەرتتەۋلەر ەۋروپالىق وداقتىڭ حالىقارالىق يننوۆاتسيالىق جوبالارىنا قاتىسا الا ما؟», «ورتالىق ازيا ەلدەرى كليماتتىڭ وزگەرۋى جانە الەۋمەتتىك-ەكونوميكالىق ماسەلەلەردى قالاي شەشىپ جاتىر؟», «تۇراقتى دامۋ مادەنيەتىن ناسيحاتتاۋدا جوعارى ءبىلىم سالاسى نەلىكتەن نەگىزگى قاتىسۋشى سانالادى؟» دەگەن ساۋالدارعا جاۋاپ ىزدەپ, وسىعان قاتىستى تاقىرىپتاردى تالقىلادى. وسىعان قوسا بەلگيا, نيدەرلاند, گەرمانيا, قازاقستان, قىرعىزستان, وزبەكستاننان قاتىسقان ساراپشىلار مەن عالىمدار ەكى كۇن ىشىندە ءبىلىم بەرۋ, قوعامدىق دەنساۋلىق ساقتاۋ, ەنەرگەتيكا, مەملەكەتتىك باسقارۋ, ۇكىمەتتىك ەمەس سەكتور سياقتى سالالاردا 2030 جىلعا دەيىنگى تۇراقتى دامۋ سالاسىنداعى ۇلتتىق جانە وڭىرلىك دەڭگەيدەگى كۇن ءتارتىبىن ورىنداۋ قۇرالى رەتىندە لوكاليزاتسيالاۋ ماسەلەسىن, سونداي-اق قاتىسۋشىلار جوعارى ءبىلىمنىڭ تۇراقتى دامۋدى ناسيحاتتاۋداعى ءرولىن تالقىلادى.
