كومپوزيتور مەلس وزبەكوۆ كونسەرۆاتوريادا وقىپ جۇرگەن كەزىندە ايىمزادا اتتى قىزعا عاشىق بولادى. قوس جۇرەك ءبىرىن-ءبىرى ءتۇسىنىپ, ماحابباتتىڭ شارابىنا ماس بولىپ جۇرگەنىندە, جازعى كانيكۋل دا كەلىپ قالادى. ەكەۋى قيماي قوشتاسىپ, جاڭا وقۋ جىلىندا كەزدەسۋگە ۋاعدالاسىپتى. دەمالىس اياقتالىسىمەن, مەلس الماتىعا قاراي قۇستاي ۇشادى. ىزدەگەنى – ايىمزادا. وقۋ ورنىنا بارسا, ءالى كەلمەگەن ەكەن. نە ىستەرىن بىلمەي, سىرتتا تۇرعانىندا مۇنى تانيتىن كۋرستاس قىزداردىڭ ءبىرى سۋىق حابار جەتكىزەدى. ايىمزادا كانيكۋل كەزىندە وزەنگە شومىلىپ ءجۇرىپ, سۋعا كەتىپ قايتىس بولعان ەكەن. مۇنى ەستىگەن مەلستىڭ جاي-كۇيى ايتپاسا دا تۇسىنىكتى. كول باسىنا بارىپ, مۇڭايىپ وتىرىپ, اۋەننەن تىنشۋ سۇرايدى. سەزىمگە تولى «كەلشى, ايىم» ءانى وسىلاي دۇنيەگە كەلگەن ەكەن.
«نۇريكامال»
بۇل – كومپوزيتور تۇردىقىلىش ءىزتاي مەن ونىڭ جارى, اقىن ءحانبيبى ەسەنقارانىڭ بىرگە جازعان شىعارماسى. الايدا تۋىندى ەكەۋىنىڭ ورتاق سەزىمى تۋرالى ەمەس.
ت. ءىزتاي تابيعات اياسىنداعى ءبىر وتىرىستا نۇريكامال دەگەن سۇلۋ قىزعا عاشىق بولادى. سول كەشتە بويجەتكەندى بيگە دە شاقىرعان. بىراق نۇريكامال باس تارتىپتى. سازگەر تۇنىمەن پيانينو ويناپ, سەزىمىن انگە قوسۋعا تىرىسادى. مۇنى سەزگەن اقىننىڭ جارى ءاننىڭ ءسوزىن جازىپ, «ايتقىڭ كەلگەنى وسى ما ەدى؟» دەپ ولەڭدى جولداسىنا ءوزى اپارىپ بەرگەن. اقىن ءحانبيبى ەسەنقاراقىزى ەستەلىگىندە: «ول بويجەتكەنگە عاشىق بولماۋ مۇمكىن ەمەس ەدى. بۇل ءاندى ەستايدىڭ قورلانى سياقتى باعالادىم», دەيدى.
«جاس جۇبايلار»
«سەندەرگە ءاردايىم ورىن بار, اق وتاۋ تورىنە قونىڭدار», دەگەن يگى تىلەكتەر ايتىلاتىن بۇل ءاننىڭ تاريحى بولەك.
سازگەر بەكجىگىت سەردالى ستۋدەنت شاعىندا قۇلتولەۋ دوسىنىڭ ۇيلەنۋ تويىنا پويىزبەن جولعا شىعادى. توي وتەتىن مەكەنگە جاقىنداعان سايىن جاس جۇبايلارعا قانداي سىي تارتاتىنىن ۋايىمداي باستايدى. ويتكەنى وتاۋ قۇرىپ جاتقان قۇلتولەۋ دە, رايحان دا – سازگەردىڭ كۋرستاسى. سوندىقتان بەكجىگىت ەرەكشە سىيلىق جاساۋ كەرەك دەپ ويلايدى. ءبىر كەزدە جول بويى داستارقانعا اينالعان «لەنينشiل جاستاعى» ەكi شۋماق ولەڭگە كوزى تۇسەدى. «گازەت بەتىندەگى الگi ەكi شۋماقتى اۋەنگە سالىپ, ايتىپ كورiپ ەدiم, ءاپ-ادەمi ءان شىعا كەلدi. سوسىن «جاس جۇبايلار» دەپ اتاۋ تاڭدىم», دەيدى سازگەر. ال ءاننىڭ ءسوزىن جازعان وتەگەن ورالباەۆپەن سازگەر تەك ەكى جىل وتكەن سوڭ, 1986 جىلى تانىسقان ەكەن.
