ىرگەتاسى وسىدان 93 جىل بۇرىن قالانعان الماتى قالاسىنداعى اتالعان وقۋ ورنىنىڭ تاۋەلسىزدىك جىلدارى م.تىنىشباەۆ ەسىمىمەن اتاۋ تەگىننەن-تەگىن ەمەس. ويتكەنى ەلىمىزگە بەلگىلى الماتى تەمىرجول ينجەنەرلەرى ينستيتۋتى تالاي جىل ءۇزىلىسسىز وسى سالادا بىلىكتى مامان دايارلاپ كەلدى. ال مۇحامەتجان تىنىشباەۆ – قازاقتان شىققان تۇڭعىش تەمىرجول قاتىناستارىنىڭ ينجەنەرى, الاشتىڭ تانىمال تۇلعاسى. سونداي-اق ول – 1917 جىلى قۇرىلعان تۇركىستان اۆتونومياسىنىڭ تۇڭعىش پرەمەر-ءمينيسترى. م.تىنىشباەۆ – تۇركىستان – ءسىبىر ماگيسترال جوباسىن جاساپ, جۇزەگە اسىرعان ينجەنەر.
عىلىم جانە جوعارى ءبىلىم مينيسترلىگى مەن وسى وقۋ ورنىنىڭ رەسمي مالىمەتىندە م.تىنىشباەۆ ەسىمى ۋنيۆەرسيتەتكە 2000 جىلى 23 مامىردا بەرىلىپ, بەلگىسىز سەبەپپەن 2021 جىلى وزگەرگەنى (الىنىپ تاستالعانى) جازىلعان. ايتقاندايىن, «Egemen Qazaqstan» گازەتى 2024 جىلى 10 ساۋىردە «تۇرار رىسقۇلوۆتىڭ ەسىمىن ۋنيۆەرسيتەتكە قايتارۋ – كوپتىڭ قالاۋى» اتتى كوكەيكەستى ماقالا جاريالاپ, «نارحوزداعى» ونوماستيكالىق جۇيەسىزدىكتى سىناعان ەدى. قايراتكەر م.تىنىشباەۆ ەسىمىنىڭ قايتا جاڭعىرۋى – اتالعان وقۋ ورنى مەن سالا باسشىلىعىنا وي سالادى دەپ ۇمىتتەنەمىز.
تەمىرجول سالاسى ماماندارى مەن وسى كاسىپتى مەڭگەرىپ جاتقان جاستاردى قۋانىشتى جاڭالىقپەن قۇتتىقتاي وتىرىپ, ەلىمىزدىڭ ونوماستيكا زاڭدىلىقتارىندا ۇلت تۇلعالارىنىڭ ەسىمى قۇندىلىق رەتىندە بەكىتىلۋى قاجەتتىگىن ۇسىنامىز.
