عىلىم جانە جوعارى ءبىلىم ءمينيسترى ساياسات نۇربەك پەن سەۋل ۇلتتىق عىلىم جانە تەحنولوگيالار ۋنيۆەرسيتەتىنىڭ (Seoultech) پرەزيدەنتى دون حۆان كيم «500 عالىم» باعدارلاماسى اياسىندا ىنتىماقتاستىقتى كەڭەيتۋگە كەلىستى. جاقىندا بولعان ەكى ەلدىڭ وكىلدەرىنىڭ كەزدەسۋىندە تاراپتار ەلىمىزدەگى جوعارى ءبىلىم جانە عىلىم سالاسىندا بولىپ جاتقان وڭ وزگەرىستەردى تالقىلادى. اتاپ ايتقاندا, مينيستر س.نۇربەك قازاقستاندا جەتەكشى شەتەلدىك جوعارى وقۋ ورىندارى فيليالدارىنىڭ ءساتتى اشىلىپ جاتقانى, قازاقستاندى ورتالىق ازياداعى اكادەميالىق حاب رەتىندە دامىتۋ بويىنشا جۇرگىزىلىپ جاتقان ساياسات تۋرالى حاباردار ەتتى. ءوز كەزەگىندە ۋنيۆەرسيتەت پرەزيدەنتى دون حۆان كيم Seoultech-ءتى الەمنىڭ ۇزدىك ۋنيۆەرسيتەتتەرىنىڭ تىزىمىنە ەنگىزۋدى جوسپارلاپ وتىرعانىن جەتكىزدى.
عىلىم جانە جوعارى ءبىلىم ءمينيسترى س. نۇربەك قازاقستاندا Seoultech فيليالىن اشۋدىڭ ارتىقشىلىقتارىنا نازار اۋداردى. ماسەلەن, ەلىمىزدىڭ ستراتەگيالىق جاعدايى, ەلدەر اراسىنداعى ءتۇرلى سالاداعى بىرقاتار ۇزاقمەرزىمدى ارىپتەستىك, كورەي جوعارى وقۋ ورىندارىنىڭ باسقا دا فيليالدارىن اشۋ تاجىريبەسى, پايدالى قازبالار مەن بيوتەحنولوگيا, عارىش سالاسىندا بىرلەسكەن زەرتتەۋلەر جۇرگىزۋ مۇمكىندىگى, ولار بويىنشا ەلىمىزدىڭ جيناقتالعان بازاسى جانە تابيعي مينەرالدار مەن جەر قويناۋىنىڭ ۇلكەن قورى بار. ءمينيستردىڭ پىكىرىنشە, مۇنىڭ ءبارى وزەكتى بىرلەسكەن زەرتتەۋلەر جۇرگىزۋگە عانا ەمەس, سونىمەن قاتار الەمدىك عىلىم مەن ءبىلىمنىڭ دامۋىنا ەلەۋلى ۇلەس قوسۋعا كومەكتەسەدى.
سونداي-اق تاراپتار «بولاشاق» حالىقارالىق ستيپەندياسى مەن «500 عالىم» عىلىمي تاعىلىمدامادان ءوتۋ باعدارلاماسى اياسىنداعى ىنتىماقتاستىقتى كەڭەيتۋ ماسەلەلەرىن تالقىلادى. تاراپتار بىرلەسكەن جۇمىستى قوس ديپلومدىق باعدارلامادان باستاۋعا كەلىستى.
