قازىر بايلانىس قۇرالدارىنىڭ جاڭارۋىنا بايلانىستى تەلەفون ۇيشىكتەرىنە سۇرانىس بۇرىنعىداي ەمەس. سول سەبەپتى «British Telecom» كومپانياسى ولاردى يەمدەنەم دەۋشىلەرگە اشىق ساۋدا جاريالاعان. ۋەستبەري-ساب-مەنديپ قالاسىنىڭ تۇرعىندارى ۇيشىكتەردى ساتىپ الىپ, كىتاپحاناعا اينالدىرعان. ياعني وعان ارنايى سورەلەردى قويىپ, اركىم ءارتۇرلى تاقىرىپتاعى قىزىقتى شىعارمالارىن جايعاستىرعان. ارينە, مۇندا كىتاپحاناشى جوق. ادامدار ىزدەگەن كىتابىن الىپ, وقىپ بولعاننان كەيىن قايتادان ورنىنا قويادى. قالاشىقتىڭ تۇرعىندار سانى شامامەن 800 ادام. بىراق كىتاپحانانىڭ تانىمال بولۋىنا بايلانىستى كەي كەزدەرى ۇزىنسونار كەزەك بولادى ەكەن.
قىمبات كىتاپ
قىمبات كىتاپتاردىڭ كوشىن باستاپ تۇرعان – «لەستەر كودەكسى». ول لەوناردو دا ءۆينچيدىڭ عىلىمي ەڭبەكتەرىنىڭ جيناعى. كىتاپتى 1994 جىلى وتكەن اۋكتسيوندا بيلل گەيتس 30,8 ملن دوللارعا ساتىپ العان.
جەتپىس ەكى بەتتىك كىتاپتا ءارتۇرلى ەستەلىكتەر, سۋرەتتەر, ماتەماتيكالىق ەسەپتەر جيناقتالعان. ال اتاۋى العاش تۇتىنۋشى لەستەردىڭ قۇرمەتىنە قويىلعان. كىتاپتى ونىڭ ۇرپاقتارىنان 1980 جىلى سيرەك كەزدەسەتىن زاتتاردىڭ كوللەكتسيونەرى ارماد حاممەر ەسىمدى ازامات ساتىپ العان. ءتىپتى از ۋاقىتقا بولسا دا شىعارمانىڭ اتاۋىن «حاممەر كودەكسى» دەپ تە وزگەرتكەن. ح.ارماد دۇنيەدەن وتكەننەن كەيىن, 1994 جىلى كىتاپ اۋكتسيونعا قويىلىپ, ونى «Microsoft» كومپانياسىنىڭ نەگىزىن قالاۋشى بيلل گەيتس ساتىپ العان. الايدا ول كىتاپتى ۇيىندە ساقتاپ قويعان جوق. حالىقارالىق كورمەلەر كەزىندە «لەستەر كودەكسى» ءالى كۇنگە دەيىن كىتاپسۇيەر قاۋىمعا تانىستىرىلىپ كەلەدى.
قىزىق كىتاپ
مادەنيەت – وقىلعان كىتاپتىڭ سانى ەمەس, ءوزىڭ تۇسىنگەن كىتاپتىڭ سانى. توم-توم كىتاپتىڭ ءتۇيىنى ءبىر عانا سويلەمدە تۇرۋى مۇمكىن. سول سويلەمنەن بايقاۋسىزدا ءوتىپ كەتسەڭىز, وندا وكىنىشتى. ال ءبىزدىڭ ايتقىمىز كەلىپ تۇرعان كىتاپ – اقشاڭىزعا شىعىن بولعانىمەن, ۋاقىتىڭىزعا ۇنەم.
بۇل – اتاقتى گوللاند دارىگەرى گەرمان بۋرگاۆەنىڭ «مەديتسينا ونەرىنىڭ جالعىز ءھام تەرەڭ سىرى» اتتى كىتابى. 1738 جىلى دارىگەردىڭ ءوزى قايتىس بولعاننان كەيىن كىتاپ اۋكتسيون كەزىندە 10 مىڭ دوللارعا ساتىلادى. ساتىپ الۋشى ادەمى بەزەندىرىلگەن جانە ق ۇلىپتالعان 100 بەتتەن تۇراتىن كىتاپتى اشقاندا, بارلىق بەتى بوس بولىپ شىققان. تەك العاشقى بەتىندە عانا «باسىڭدى سۋىقتا قالدىرساڭ دا, اياعىڭدى جىلى ۇستاساڭ, سەن ەڭ بىلىكتى دارىگەرلەردى دە كەدەي ەتەسىڭ» دەپ جازىلعان ءبىر عانا سويلەم بولىپتى.
