ەلوردادا قالالىق ينكليۋزيۆتى ءبىلىم رەسۋرستىق ورتالىعىنىڭ اشىلۋ سالتاناتى ءوتتى. جاڭا ورتالىق استانالىق ج.تاشەنوۆ اتىنداعى №10 مەكتەپتىڭ بازاسىندا اشىلدى, اتالعان وقۋ وشاعىندا كورۋ قابىلەتى تومەن 168 وقۋشى, ونىڭ ىشىندە 28 كورۋ قابىلەتىنەن ايىرىلعان بالا وقيدى. رەسۋرستىق ورتالىق ەلوردانىڭ باسقا مەكتەپتەرىنە ەرەكشە قاجەتتىلىكتەرى بار بالالاردى ءبىلىم ۇدەرىسىنە قوسۋ بويىنشا وسى مەكتەپتىڭ تاجىريبەسىن ءبولىسۋ ماقساتىندا اشىلدى.
رەسۋرستىق ورتالىقتىڭ ماماندارى ەلوردانىڭ جالپى ءبىلىم بەرەتىن مەكتەپتەرىنە كونسۋلتاتيۆتىك جانە ادىستەمەلىك كومەك كورسەتەدى. تيفلوپەداگوگ, لوگوپەد, پسيحولوگ جانە دەفەكتولوگ سياقتى ارنايى پەداگوگتەر پراكتيكالىق سەمينارلار مەن كونسۋلتاتسيالار ۇيىمداستىرادى, سونداي-اق مەكتەپ پەداگوگتەرىنە اقپاراتتىق ماتەريالدار دايىندايدى.
«2015 جىلدان باستاپ ءبىز ەرەكشە بالالارمەن جۇمىس جاساۋدا ۇلكەن تاجىريبە جيناقتادىق, ەندى باسقا مەكتەپتەردىڭ پەداگوگتەرىمەن بولىسۋگە دايىنبىز. ءبىلىم الۋدا ەرەكشە قاجەتتىلىكتەرى بار وقۋشىلارىمىزدىڭ 16% عانا مەكتەپتىڭ جانىندا تۇرادى. قالعاندارى دا ۇيلەرىنە جاقىن مەكتەپتەردە ءبىلىم السا, بۇل ەرەكشە بالاسى بار وتباسىنا ىڭعايلى», دەدى № 10 مەكتەپ-گيمنازياسىنىڭ تيفلوپەداگوگى ساۋلە ساعىمباەۆا.
ورتالىقتى «دارا» قايىرىمدىلىق قورى «MARS» كومپانياسىنىڭ قولداۋىمەن اشتى. كومپانيانىڭ كومەگىمەن رەسۋرستىق ورتالىق قاجەتتى تيفلوتەحنيكامەن, ارنايى جيھازبەن, سونداي-اق بالالارمەن جۇمىس ىستەۋگە ارنالعان دامىتۋشى جانە ادىستەمەلىك ماتەريالدارمەن جابدىقتالعان.
ورتالىق ەۋرازيا, بەلارۋس جانە تۇركياداعى «MARS» كومپانياسىنىڭ باس مەنەدجەرى ارمان سۇتباەۆ: «ينكليۋزيا تاقىرىبى – ءبىزدىڭ قوعام الدىندا تۇرعان ۇلكەن جانە ماڭىزدى ماسەلە. «MARS» كومپانياسىندا ءبىز ءار ادام بىرەگەي جانە دارىندى دەپ سانايمىز جانە ەرتەڭ كورگىمىز كەلەتىن الەم بۇگىنگى ىستەرىمىزدەن باستالاتىنىنا سەنەمىز. «دارا» قايىرىمدىلىق قورىمەن ىنتىماقتاستىقتىڭ ناتيجەسىندە ءبىز بالالارعا لايىقتى ءبىلىم الۋعا كومەكتەسىپ جاتقانىمىزعا قۋانىشتىمىن», دەدى.
ايتا كەتەيىك, وتكەن جىلى استانادا 610 ناشار كورەتىن جانە 27 كورۋ قابىلەتىنەن ايىرىلعان, سونىڭ ىشىندە 419-ى مەكتەپ جاسىنداعى بالانىڭ اتا-اناسى ارنايى مامانداندىرىلعان قىزمەتكە جۇگىندى.
