فوتو: azh.kz
بولىنگەن قارجىنىڭ قوماقتى بولىگىن «سامۇرىق-قازىنا» قورى اۋداردى. «سامۇرىق-قازىنا» سۋ تاسقىنىنىڭ سالدارىن جويۋعا 15 ملرد تەڭگە ءبولدى.
«قور تابيعي اپاتتان زارداپ شەككەن وڭىرلەرگە جالپى سوماسى 15 ملرد تەڭگە كولەمىندە ماتەريالدىق كومەك كورسەتەدى. كومەكتى قوردىڭ كورپوراتيۆتىك ورتالىعى, «قازمۇنايگاز», «قازاتومونەركاسىپ», «قازاقستان تەمىر جولى», «قازاقگاز», «كەگوك», «قازاقتەلەكوم», «ەير استانا», «سامۇرىق-ەنەرگو» كومپانيالارى كورسەتتى», دەدى نۇرلان جاقىپوۆ.
سونىمەن قاتار «قازاقستان حالقىنا» قورى زارداپ شەككەندەرگە تۇرعىن ءۇي سالۋعا 5 ملرد تەڭگە ءبولدى.
سۋ تاسقىنىنىڭ سالدارىن جويۋ ماقساتىندا تەڭىزشەۆرويل كومپانياسى 2 ميلليارد تەڭگە اۋداردى.
- «تەڭىزشەۆرويل» جشس (تشو) وسىنداي قيىن-قىستاۋ كەزەڭدە اتىراۋ وبلىسىنىڭ تۇرعىندارىمەن جانە قازاقستان حالقىمەن بىرگە. سۋ تاسقىنىنا قارسى جەدەل ارەكەت ەتۋ شارالارىنا جانە جاعداي باسىلعاننان كەيىن قالپىنا كەلتىرۋ جۇمىستارىنا قولداۋ كورسەتۋ ماقساتىندا «تەڭىزشەۆرويل» 2 ميلليارد تەڭگە قاراجات ءبولدى. بۇل قاراجات زارداپ شەككەندەردىڭ تۇرمىسىن قالپىنا كەلتىرۋگە سەپتىگىن تيگىزەدى دەپ سەنەمىز», دەپ مالىمدەدى كومپانيا.
ال Chevron كومپانياسى سۋ تاسقىنىنان زارداپ شەكككەندەرگە 3 ملن دوللار بولەتىنىن مالىمدەدى (شامامەن 1,3 ملرد تەڭگە). قاراجاتتى كومپانيا ءوزىنىڭ جەرگىلىكتى «شەۆرون مۇنايگاز ينك.» ەنشىلەس كومپانياسى ارقىلى بولەدى.
قازاقستاننىڭ تاۋ-كەن سالاسىنداعى كومپانيالارى – KAZ Minerals توبى مەن «قازاقمىس كورپوراتسياسى» جشس سۋ تاسقىنىنان زارداپ شەككەندەرگە كومەك كورسەتۋ جانە قازاقستاننىڭ بىرقاتار وڭىرلەرىندە تابيعي اپاتتىڭ سالدارىن جويۋ ءۇشىن 800 ميلليون تەڭگە ءبولدى.
سونىمەن بىرگە بولات وتەمۇراتوۆتىڭ قورى سۋ تاسقىنىنان زارداپ شەككەندەرگە 680 ملن تەڭگە بولگەن.
«بۇل كۇندەرى ءبىز ميلليونداعان وتانداستارىمىز سياقتى, سۋ تاسقىنىنان زارداپ شەككەن وڭىرلەردىڭ تۇرعىندارىنا الاڭداۋشىلىعىمىزدى بىلدىرە وتىرىپ, كومەك قولىن سوزامىز. بولىنگەن قاراجات كەرەك-جاراقتاردى ساتىپ الۋعا جانە كومەكتەسۋگە مۇمكىندىك بەرەدى دەپ ۇمىتتەنەمىز», دەدى بولات وتەمۇراتوۆ اتىنداعى قوردىڭ ديرەكتورى مارات ايتماعامبەتوۆ.
Eurasian Resources Group سۋ تاسقىنىنا 500 ملن تەڭگە اۋدارعان. كومپانيا مۇنىڭ الدىندا 400 ملن تەڭگە, ارتىنان قوسىمشا 100 ملن تەڭگە بولگەن.
Halyk بانكى سۋ تاسقىنىنان زارداپ شەككەن ازاماتتارعا كومەك رەتىندە 1 ملرد تەڭگە بولەتىنىن حابارلادى.
ءدال وسى كولەمدەگى كومەكتى Freedom Holding Corp. كومپانياسى دا بولەدى. ول «Freedom شاپاعات» ارنايى قايىرىمدىلىق قورىنان «دەمەۋ قازاقستان قورىنا» قاراجات اۋداراتىنىن مالىمدەگەن.
ال Jusan Bank سۋ تاسقىنىنان زارداپ شەككەندەرگە قولداۋ كورسەتۋ ءۇشىن 300 ميلليون تەڭگە اۋداردى. Kaspi kz 620 ميلليون تەڭگە ءبولدى. سونداي-اق بانك تسەنتركرەديت – 200 ملن تەنگە, ەۋرازيالىق بانك – 200 ملن تەنگە, RBK بانك – 150 ملن تەنگە بولگەن.
سونىمەن قاتار Astana Motors – 500 ملن تەڭگە, BI Group – 500 ملن تەڭگە, Allur, QazTehna جانە Qarmet – 500 ملن تەڭگە, PTC Holding – 150 ملن تەڭگە, QazaqOil – 150 ملن تەڭگە, وراز جاندوسوۆ پەن ەرلان قوجاسباي - 100 ملن تەڭگە ءبولدى.
ايتا كەتەيىك, جوعارىدا كورسەتىلگەن سومالاردى «Energy Monitor» قوعامدىق قورىنىڭ ديرەكتورى نۇرلان جۇماعۇلوۆ ەسەپتەدى.
