سينگاپۋردە وتكەن «First Lego League Challenge» روبوتتەحنيكادان حالىقارالىق چەمپيونات مارەسىنە جەتتى. حالىقارالىق جارىسقا وڭتۇستىك كورەيا, مالايزيا, پولشا, يندونەزيا جانە قىتايدان 100-دەن اسا وقۋشى قاتىستى. وسى اتالعان دودادا وتاندىق وقۋشىلار الەمنىڭ جاس ينجەنەرلەرىمەن باسەكەگە ءتۇستى. ءۇش كۇنگە سوزىلعان جارىس قورىتىندىسى بويىنشا ەلىمىزدىڭ ورەندەرى ەڭ جوعارى ماراپاتقا يە بولىپ, رەكورد جاسادى.
ەلىمىزدىڭ نامىسىن «Ro alemi» كومانداسىنىڭ قۇرامىندا سەمەي قالاسىنىڭ ءبىلىم-يننوۆاتسيا جانە №22 ورتا مەكتەبىنىڭ وقۋشىلارى ارىستان يبراگيم, جانارىس ارداحوۆ, دارحان ماماديلوۆ, ايدمۇحامەد تاباراكوۆ, ءادىلجان قابىكەنوۆ, ازات ساپارالى, جانىبەك ابدىكارىموۆ قورعادى. ولار چەمپيوناتتا ىقتيمال 550 ۇپايدان 540 ۇپاي جيناپ, رەكورد ورناتىپ, «Robot Design» اتالىمىن جەڭىپ الدى. سونىمەن قاتار بارلىق ءتورت باعىت بويىنشا جوعارى ناتيجە كورسەتكەنى ءۇشىن «Champions Award» باس اتالىمىندا باس جۇلدەنى قانجىعاسىنا بايلادى. سونداي-اق وتاندىق «Tamos Éducation» مەكتەبىنىڭ «QSTEM-TAMOS Stars» كومانداسىنىڭ قۇرامىندا ونەر كورسەتكەن ماديار نامازالى, ءنۇرالى ساتىبالدى, راشيد احمەدجانوۆ, اڭسار بايازەروۆ چەمپيوناتتىڭ بارلىق ءتورت باعىتى بويىنشا جوعارى كورسەتكىشكە قول جەتكىزىپ, «Champions Award» اتالىمىندا I ورىندى جەڭىپ الدى. اتىراۋ قالاسىنىڭ ءبىلىم-يننوۆاتسيا ليتسەيىنىڭ وقۋشىلارى «Pioneers» كومانداسىنىڭ قۇرامىندا مالىك يسلام, نۇريسلام بەرىك ۇلى, بەكاسىل نۇرىمجان, ەراسىل نۇرىمجان, الماز ابزال, الماس ەرلان ۇلى, الديار شامار, الىشەر دانيلوۆ ونەر كورسەتتى. ولار يننوۆاتسيالىق جوبانى تابىستى جۇزەگە اسىرعانى ءۇشىن «Innovation Project» اتالىمىنىڭ فيناليستەرى اتاندى.
«روبوتتار وينىندا تاپقىرلىق تانىتىپ قانا قويماي, كوماندانىڭ ۇيىمشىلدىعىن, نەگىزگى قۇندىلىقتارىن كورسەتۋ كەرەك بولدى. ءبىز يننوۆاتسيالىق جوبامىزدى كورسەتتىك, تانىستىردىق. بۇل جارىستان كەرەمەت تاجىريبە الدىق, ەلىمىزدىڭ بىزگە ءۇمىت ارتىپ وتىرعانىن بىلگەندىكتەن, جەڭىسكە بار كۇش-جىگەرىمىزدى سالدىق. ناتيجەسىندە, الەمنىڭ وزىق ەلدەرىنىڭ اراسىنان سۋىرىلىپ شىعىپ, رەكورد ورناتتىق», دەيدى قۋانىشىن بولىسكەن وقۋشىلار. ەسكە سالا كەتەيىك, وقۋشىلار حالىقارالىق چەمپيوناتقا جولدامانى وقۋ-اعارتۋ مينيسترلىگىنىڭ قولداۋىمەن «دارىن» رەسپۋبليكالىق عىلىمي-پراكتيكالىق ورتالىعى جانە «USTEM Foundation» قوعامدىق قورى ۇيىمداستىرعان «FIRST Central Asia» ورتالىق ازيا ويىندارىندا جەڭىپ العان ەدى.
