فوتو: Arbat.media
«بيشىمباەۆ سوت الدىندا كۋالىك بەرۋ كەزىندە ءوزىن ايەلىن قاتتى سۇيەتىن, ايەلى ايتقاننىڭ بارلىعىن ورىندايتىن قامقور ەر ازامات رەتىندە كورسەتتى. ەندەشە, ونىڭ 8 قاراشادا قالاي «قامقورلىق» كورسەتكەنىن كورەيىك», دەدى مەملەكەتتىك ايىپتاۋشى.
وسى ورايدا پروكۋرور نۇكەنوۆانىڭ جەكە تەلەفونىن پايدالانۋدى ۇسىندى. زاتتاي دالەلدەمەگە سالتاناتتىڭ قۇربىسىنىڭ ۇيالى تەلەفونى دا جاتاتىنىن ايتا كەتۋ كەرەك, وندا ۇرىپ-سوعۋ تۋرالى دەرەكتەر ساقتالعان.
ايتبەك امانگەلدى ۆيدەودان الىنعان كەيبىر كادرلاردى تىكەلەي ەفيردە كورسەتپەۋدى ۇسىندى, ونىڭ ايتۋىنشا, تىكەلەي ەفيردى ەرەسەكتەر عانا ەمەس, بالالار دا كورۋى مۇمكىن.
سۋديا ايىپتاۋشى تاراپتىڭ وتىنىشتەرىن قاناعاتتاندىردى. سوت جابىرلەنۋشى تاراپتىڭ پىكىرىن دە قولدادى. ىسكە قاتىستى فوتوسۋرەتتەر مەن ۆيدەوماتەريالدار تەك القابي قۇرامىنا عانا كورسەتىلەدى.
بيشىمباەۆ ايىپتاۋشى تاراپتىڭ ءوتىنىشى تۋرالى پىكىر ءبىلدىرىپ, فوتوماتەريالداردى تىكەلەي ەفيردە كورسەتۋگە بولاتىنىن ايتتى. كورسەتۋگە بولاتىنىن ايتتى.
«ۆرانچەۆ مىرزا (ادۆوكات) دەنە جاراقاتتارى بەينەلەنگەن سۋرەتتەردى كورسەتكىسى كەلمەيتىنىن ايتىپ وتىر, ال مەن كەرىسىنشە بولعانىن قالايمىن. ينتەرنەتتە سالتاناتتىڭ دەنە جاراقاتتارىنا قاتىستى جالعان اقپاراتتار تاراپ ءجۇر. مەن بۇل سۋرەتتەردى القابيلەر دە, قوعام دا كورگەنىن قالايمىن. سەبەبى قازىرگى ۋاقىتقا دەيىن ايتىلعاننىڭ بارلىعى شىندىققا جاناسپايدى», دەدى سوتتالۋشى.
سۋديا ايجان قۇلباەۆا بيشىمباەۆتىڭ بۇل پىكىرىنە: «اتالعان ءىس بويىنشا شەشىمدى قوعام ەمەس, القابيلەر القاسى قابىلدايتىنىن ەسكە سالعىم كەلەدى», دەپ جاۋاپ بەردى.
