فوتو: سەناتتىڭ ءباسپاسوز قىزمەتى
كوميتەت توراعاسى نۇرلان بەكنازاروۆ ءوز سوزىندە مەملەكەت باسشىسى كاسىپكەرلەردىڭ ەركىن جۇمىس ىستەۋى ءۇشىن جانە ەلىمىزگە ينۆەستيتسيا تارتۋعا مۇمكىندىك بەرۋ ءۇشىن ەكونوميكالىق تەرىس ارەكەتتەردى قىلمىستان ارىلتۋدى تاپسىرعانىن اتاپ ءوتتى.
«پارلامەنتشىلەر مەن مۇددەلى مەملەكەتتىك ورگاندار قىلمىستىق زاڭنامانى ىزگىلەندىرۋدى جالعاستىرۋ ماقساتىندا كاسىپكەرلەردىڭ قورعالۋ دەڭگەيىن ارتتىرۋ ماسەلەسى بويىنشا كاسىپكەرلىك قىزمەتتىڭ ەركىندىگىن قورعاۋعا, تۇتىنۋشىلار قۇقىقتارىنىڭ ساقتالۋىنا, سونداي-اق مەملەكەتتىڭ قارجى مۇددەسىن قورعاۋعا باعىتتالعان ەكونوميكالىق قىزمەت سالاسىنداعى قىلمىستار ءۇشىن جاۋاپكەرشىلىكتى بەلگىلەۋدى كوزدەيتىن زاڭنامالىق نورمالاردى قاراپ جاتىر. ءبىزدىڭ قوعامداعى ەكونوميكالىق قىزمەتكە بايلانىستى قىلمىستاردى ىزگىلەندىرۋ پروتسەسى كەزەڭ-كەزەڭىمەن جانە دايەكتى تۇردە جۇزەگە اسىپ كەلەدى. دەپۋتاتتار قارجى-ەكونوميكا سالاسىنداعى قىلمىستاردى قىلمىستان ارىلتۋ ماقساتىندا قىلمىستىق زاڭنامانى رەفورمالاۋ جونىندە دايەكتى جۇمىس جۇرگىزىپ جاتىر», دەدى سەناتور نۇرلان بەكنازاروۆ.
وتىرىسقا توراعالىق ەتكەن سەناتور ەۆگەني بولگەرت ءوز كەزەگىندە كاسىپكەرلەردى قىلمىستىق جاۋاپكەرشىلىككە تارتۋ نورمالارىنىڭ شەگىن بەلگىلەۋ, زاڭ مەن مەملەكەتكە الەۋمەتتىك سەنىم دەڭگەيىن ارتتىرۋدىڭ ءادىل تەتىگىن ەنگىزۋدە رەتتەۋدى جۇيەلەۋ, مەملەكەت جۇرگىزىپ وتىرعان قىلمىستان ارىلتۋ ساياساتىنىڭ تەتىكتەرىن پايدالانۋدىڭ ناقتى نەگىزدەرىن ايقىنداۋ قاجەتتىگىن اتاپ ءوتتى.
شارا بارىسىندا قارجى مونيتورينگى اگەنتتىگى توراعاسىنىڭ ورىنباسارى جەڭىس ەلەمەسوۆ, باس پروكۋراتۋرانىڭ, ادىلەت مينيسترلىگىنىڭ, رەسپۋبليكالىق ادۆوكاتتار القاسىنىڭ وكىلدەرى, سونداي-اق كازگزۋ جانە «استانا» حالىقارالىق ۋنيۆەرسيتەتتەرىنىڭ باسشىلىعى بايانداما جاسادى.
