اتالعان جوبا ىسكە قوسىلعان ساتتەن باستاپ انتيكوردىڭ ۇسىنىمدارىمەن 600-دەن استام پروبلەمالىق كەيس شەشىلىپ, 30 مىڭعا جۋىق كاسىپكەرگە كومەك كورسەتىلدى. جۇيەلى كەدەرگىلەردى جويۋعا ەرەكشە نازار اۋدارىلىپ كەلەدى. ولاردىڭ باسىم بولىگى جەر قاتىناستارى, سالىق سالۋ, مەملەكەتتىك ساتىپ الۋ جانە ينفراقۇرىلىم نىساندارىنا قوسىلۋ سالالارىندا انىقتالىپ وتىر.
مىسالى, اقتوبە وبلىسىندا «Aqtobe su-energy group» اق كاسىپكەرلەردەن ەلەكتر قوندىرعىلارىن بىرلەسىپ پايدالانۋعا شارت جاساسۋدى تالاپ ەتكەن. ناتيجەسىندە, 45 كاسىپكەر اي سايىن اتالعان مونوپوليسكە 50 مىڭ تەڭگەدەن (جالپى سوماسى 2,2 ملن تەڭگە) تولەۋگە مىندەتتى بولعان. سونىڭ ەسەبىنەن ول ءوزىنىڭ ەلەكتر جەلىلەرىن جوندەگىسى كەلىپتى. تالاپتاردى ورىنداماعان جاعدايدا ەلەكتر ەنەرگياسىن بەرۋدى توقتاتۋدى كوزدەگەن. سىبايلاس جەمقورلىققا قارسى ءىس-قيمىل اگەنتتىگى اقتوبە وبلىسى بويىنشا دەپارتامەنتىنىڭ ۇسىنىسىمەن بۇل نەگىزسىز مىندەتتەمەلەر الىنىپ تاستالدى.
كەي جاعدايلاردا لاۋازىمدى ادامداردىڭ ءىس-ارەكەتتەرى قىلمىستىق قۇقىق بۇزۋشىلىققا اكەپ سوقتىراتىنىن جانە قىلمىستىق-قۇقىقتىق سيپاتتاعى شارالار قابىلداناتىنىن اتاپ وتكەن ءجون. ماسەلەن, اگەنتتىك بيزنەستى قورعاۋ بويىنشا استانا قالاسى مكد جاناما سالىقتاردى اكىمشىلەندىرۋ باسقارماسى اۋديت ءبولىمى باسشىسىنىڭ قىلمىسىن اشكەرەلەدى. ول 36 ملن تەڭگە سوماسىندا قوسىمشا قۇن سالىعىن قايتارۋ بويىنشا وڭ شەشىم قابىلداعانى ءۇشىن كاسىپكەردەن 3,6 ملن تەڭگە پارا تالاپ ەتكەن. بىراق قىلمىستى جۇزەگە اسىرۋ كەزىندە, ياعني اقشانى العاننان كەيىن ول ۇستالىپ, سوت سانكتسياسىمەن قاماۋعا الىندى. ونىڭ ارەكەتتەرىنە قورىتىندى باعانى سوت بەرەدى.
بۇدان باسقا, سىبايلاس جەمقورلىققا قارسى قىزمەت بيزنەستى قورعاۋ بويىنشا قابىلدانىپ جاتقان شارالار اياسىندا «قازتەمىرترانس» اق (قازاقستان تەمىر جولىنىڭ ەنشىلەس كاسىپورنى) فيليالدارى باسشىلارىنىڭ زاڭسىز بايۋ ماقساتىنداعى جەمقورلىق سحەماسىن اشتى. ولار جۇك ۆاگوندارىنىڭ تاپشىلىعىن پايدالانا وتىرىپ, ولاردى كەدەرگىسىز جانە جەدەلدەتىپ بەرگەنى ءۇشىن كاسىپكەرلەردەن جۇيەلى نەگىزدە پارا الىپ كەلىپتى. سوت ۇكىمىمەن «قازتەمىرترانس» اق اقمولا جانە قاراعاندى فيليالدارىنىڭ ديرەكتورلارى بىرنەشە رەت پارا العانى ءۇشىن كىنالى دەپ تانىلىپ, 7 جىلعا باس بوستاندىقتارىنان ايىرىلدى.
سوت ۇكىمى زاڭدى كۇشىنە ەنگەن جوق. بيزنەستى قورعاۋ جۇمىستارى جالعاسىپ جاتىر.
