فوتو: سەنات
سەناتتىڭ كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ توراعاسى نۇرلان بەكنازاروۆ كونفەرەنتسيانى اشا كەلىپ, سەناتورلاردىڭ ەلىمىزدەگى زاڭ ءبىلىمىن دامىتۋ ماسەلەسىنە ەرەكشە نازار اۋدارىپ وتىرعانىن اتاپ ءوتتى.
«سوت جانە قۇقىق قورعاۋ جۇيەلەرىن رەفورمالاۋ, سونداي-اق ۇلتتىق زاڭنامانى دامىتۋ جاعدايىندا ەلىمىزگە زاماناۋي تالاپتارعا سايكەس كەلەتىن بىلىكتى زاڭگەرلەر قاجەت. سەبەبى قۇقىقتىق ءتارتىپ پەن ازاماتتاردىڭ كونستيتۋتسيالىق قۇقىقتارى مەن بوستاندىقتارىن ساپالى قورعاۋ, بىلىكتى زاڭگەرلەردى دايارلاۋ دەڭگەيىنە تىكەلەي بايلانىستى. سەنات دەپۋتاتتارى وسى ماسەلەگە ەرەكشە نازار اۋدارىپ كەلەدى, سوندىقتان سوڭعى ەكى جىلدا ءبىلىم ماسەلەسىنە قاتىستى بىرقاتار شارا وتكىزدى», دەدى سەناتور.
باس پروكۋراتۋرا جانىنداعى قۇقىق قورعاۋ ورگاندارى اكادەمياسىنىڭ رەكتورى مارات سەكسەمباەۆ ءوز كەزەگىندە سالاداعى نەگىزگى پروبلەمالار تۋرالى كونفەرەنتسياعا قاتىسۋشىلارعا ايتىپ بەردى. ولاردىڭ قاتارىندا جوعارى وقۋ ورىندارىنىڭ كوممەرتسيالىق ماقساتتارى, تەوريالىق كۋرستاردىڭ باسىم بولۋى, وقىتۋشىلار قۇرامىنىڭ السىزدىگىنە بايلانىستى پروبلەمالار جانە باسقا دا ماسەلەلەر بار.
عىلىم جانە جوعارى ءبىلىم ءمينيسترى ساياسات نۇربەك كونفەرەنتسيا تاقىرىبى بويىنشا نەگىزگى بايانداما جاسادى. ول مينيسترلىكتىڭ جوعارى زاڭ ءبىلىمى سالاسىنداعى مەملەكەتتىك ساياساتتى ىسكە اسىرۋ جونىندەگى قىزمەتى مەن ءتيىستى جوعارى وقۋ ورىندارىنىڭ جۇمىسى تۋرالى قاتىسۋشىلاردى حاباردار ەتتى. ال جوعارعى سوت جانىنداعى سوت تورەلىگى اكادەمياسىنىڭ رەكتورى زاۋرەش بايمولدينا وقۋ ورىندارىنىڭ پروبلەمالارىنا نازار اۋدارىپ, عالىم-وقىتۋشىنىڭ جالاقىسىن كوتەرۋ مەن مارتەبەسىن ارتتىرۋعا نازار اۋدارۋ قاجەت ەكەنىن اتاپ ءوتتى.
كونفەرەنتسيا بارىسىندا و.ە.كۋتافين اتىنداعى ماسكەۋ مەملەكەتتىك زاڭ ۋنيۆەرسيتەتىنىڭ ءبىرىنشى پرورەكتورى يننا ەرشوۆا, رەسەي ءىىم ۆولگوگراد اكادەمياسىنىڭ پروفەسسورى و.ب.درونوۆا, م.س.نارىباەۆ اتىنداعى قازگزۋ رەكتورى س.گ.پەن, ءال-فارابي قازۇۋ زاڭ فاكۋلتەتىنىڭ دەكانى د.ل.بايدەلدينوۆ جانە باسقالار ءسوز سويلەدى.
نۇرلان بەكنازاروۆ عىلىمي-پراكتيكالىق كونفەرەنتسيا جۇمىسىن قورىتىندىلاي كەلىپ, دەپۋتاتتار ايتىلعان بارلىق ۇسىنىستاردى مۇقيات زەردەلەيتىنىن جانە كەيىننەن سالالىق مەملەكەتتىك ورگانداردىڭ اتىنا جىبەرۋ جوسپارلانىپ وتىرعان ۇسىنىمدار تىزبەسىنە ەنگىزىلەتىنىن اتاپ ءوتتى.
