ۇلتتىق تەستىلەۋ ورتالىعىنىڭ اقپاراتىنا سۇيەنسەك, ناۋرىز ايىنداعى ۇبت باستالعاننان بەرى تەستىلەۋدى تاپسىرعان 60 مىڭداي تالاپكەردىڭ 71,49%-ى قازاق تىلىندە, 29,39%-ى ورىس تىلىندە, 70 ادام اعىلشىن تىلىندە تەستىلەۋدەن ءوتتى. ۇبت باستالعالى شەكتى ۇپايدى 69,26%-عا جۋىق تالاپكەر جينادى. ورتاشا ۇپاي 65,08 بالدى قۇرادى. ال ەڭ جوعارى ۇپاي – 137.
تەستىلەۋگە قاتىسۋشىلاردىڭ باسىم بولىگى «ماتەماتيكا-فيزيكا» 17,38% جانە «بيولوگيا-حيميا» كومبيناتسياسىن 15,91%-دان تاپسىردى. سونداي-اق ەڭ كوپ تاڭدالعان كومبيناتسيالار قاتارىنا تالاپكەرلەردىڭ 11,75% تاڭداعان «ماتەماتيكا-ينفورماتيكا» كومبيناتسياسى كىردى. ەڭ از تاڭدالعانى «حيميا-فيزيكا» كومبيناتسياسى بولدى, بۇل بويىنشا تەستىلەۋدى 76 ادام تاپسىرعان.
«بۇگىنگى تاڭدا 81 ەرەجە بۇزۋشىلىق انىقتالعان. ونىڭ ىشىندە 50 تالاپكەر سمارتفون, شپارگالكا جانە باسقا دا تىيىم سالىنعان زاتتاردى الىپ ءوتۋ ارەكەتى كەسىرىنەن تەست تاپسىرۋ مۇمكىندىگىنەن ايىرىلدى. تەستىلەۋ كەزىندە ەرەجەلەردى بۇزعانى ءۇشىن اۋديتوريادان 31 ادام شىعارىلىپ, ولاردىڭ ناتيجەلەرى جويىلدى. بوگدە تۇلعالار انىقتالعان جوق. ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر ءۇشىن قولايلى جاعداي جاساۋدىڭ ارقاسىندا ۇبت-عا ەكى اپتادا 148 تالاپكەر قاتىستى», دەپ حابارلادى ۇلتتىق تەستىلەۋ ورتالىعى.
ناۋرىز ۇبت-سى وسى ايدىڭ 30-نا دەيىن جالعاسادى. ناۋرىزداعى ۇبت-عا شارتتى تۇردە اقىلى نەگىزدە كۇندىزگى وقۋ نىسانى بويىنشا جوعارى وقۋ ورىندارىنا قابىلدانعان, وتكەن جىلعى مەكتەپ جانە كوللەدج تۇلەكتەرى, قازاقستان ازاماتى ەمەس ۇلتى قازاق تۇلعالار, سونداي-اق مەكتەپ بىتىرەتىن تۇلەكتەر جوعارى وقۋ ورىندارىنا اقىلى نەگىزدە ءتۇسۋ ءۇشىن قاتىسادى. قاتىسۋشىلار تەستىلەۋ وتكىزىلەتىن ورىندى, كۇندى جانە ۋاقىتتى وزدەرى تاڭدايدى. ۇبت-داعى پاندەردىڭ سانى وزگەرىسسىز قالدى, ياعني ۇشەۋى مىندەتتى جانە ەكەۋى تاڭداۋ بويىنشا. بىراق «وقۋ ساۋاتتىلىعى» مەن «ماتەماتيكالىق ساۋاتتىلىق» مىندەتتى پاندەرىنەن تاپسىرمالار سانى 5 سۇراققا قىسقاردى. ال بەيىندى پاندەردىڭ سۇراقتار سانى ارتىپ, 40 تەست تاپسىرماسىنان تۇرادى. اتاپ وتسەك, بەيىندى پاندەردە بەرىلگەن تىزىمنەن سايكەستىكتى انىقتاۋعا ارنالعان 5 تاپسىرما قوسىلدى. وسىلايشا, ۇبت تاپسىرمالار سانى وزگەرىسسىز قالادى, جالپى 120 سۇراقتى قۇرادى. ونىڭ ىشىندە «قازاقستان تاريحىنان» 20 تاپسىرما, «وقۋ ساۋاتتىلىعىنان» 10 تاپسىرما, «ماتەماتيكالىق ساۋاتتىلىقتان» 10 تاپسىرما جانە ەكى بەيىندى ءپان بويىنشا 40 تاپسىرما. جوعارى بالل – 140, ول دا وزگەرىسسىز قالدى. تەستىلەۋ ۋاقىتى – 4 ساعات (240 مينۋت). ال ەرەكشە ءبىلىم بەرۋ قاجەتتىلىكتەرى بار بالالار ءۇشىن ۇسىنىلاتىن قوسىمشا 40 مينۋت ۋاقىت ساقتالادى.
تالاپكەرلەر تەستىلەۋ اياقتالعاننان كەيىن 30 مينۋت ىشىندە اپەللياتسياعا بەرە الادى. سەرتيفيكات اپەللياتسيا تۋرالى شەشىم قابىلدانعاننان كەيىن تەستىلەنۋشىنىڭ جەكە كابينەتىندە قولجەتىمدى بولادى. وسى ورايدا 2024 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن تەستىلەۋدىڭ بەينەجازبالارىنا تالداۋ جۇرگىزىلەتىنىن, تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ءتۇسۋشىنىڭ ۇبت ناتيجەلەرى جويىلاتىنىن, ءتىپتى تەگىن وقۋعا تۇسكەن ادامنىڭ گرانتتان ايىرىلاتىنىن ەسكە سالا كەتكەن ءجون.
