عىلىم جانە جوعارى ءبىلىم مينيسترلىگىنىڭ قولداۋىمەن عىلىم قورى مەن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى بىرلەسىپ ۇيىمداستىرعان ديالوگ الاڭىندا وتاندىق زەرتتەۋشىلەر نەگىزىنەن قۇرىلىس جانە جول-قۇرىلىس سالالارىنداعى جوبالارىن تانىستىردى. ولاردىڭ ءاربىرى الەۋەتى جوعارى سەرىكتەستەر مەن ينۆەستورلارعا عىلىمي ازىرلەمەلەرىنىڭ كوممەرتسيالىق قۇندىلىعىن جەتكىزۋگە تىرىستى.
جيىندا ءسوز العان «عىلىم قورى» باسقارماسىنىڭ توراعاسى كاميل اقاتوۆ: «ستاتيستيكاعا سۇيەنسەك, 50-دەن اسا رەاكتور قاتىسۋشىلارى عىلىمي جانە عىلىمي-تەحنيكالىق قىزمەت ناتيجەلەرىن كوممەرتسيالاندىرۋ كونكۋرسىنا قاتىسىپ, ۇلتتىق عىلىمي كەڭەستىڭ ىرىكتەۋىنەن ءساتتى وتەدى. اتالعان الاڭ عىلىم مەن كاسىپتى ينتەگراتسيالاۋدا ءوز تيىمدىلىگىن كورسەتەدى, سونداي-اق قولدانبالى عىلىمي جوبالار كاسىپكە باعىتتالعان ەكونوميكانى قۇرۋعا مۇمكىندىك بەرەدى», دەدى.
عالىمدار ۇسىنعان يننوۆاتسيالىق ونىمدەردىڭ قاتارىندا كۇردەلى توپىراق جاعدايىندا قۇرىلىس الاڭدارىنا ينجەنەرلىك-گەولوگيالىق زەرتتەۋلەر جۇرگىزۋ كەزىندە گەواقپاراتتىق مالىمەتتەر بازاسىن پايدالانۋ تەحنولوگياسىن, ءدىرىلسىز تەحنولوگيانى پايدالاناتىن تەمىر-بەتون بۇيىمداردى, تەمىر-بەتوندى قادالار, ۆيبرواكۋستيكالىق باقىلاۋ جۇيەسى بار قۇرىلىس الاڭدارى ءۇشىن قاتتى ەدەن پليتالارىن, بەرىكتىگى جانە كوتەرگىشتىگى جوعارى قادالاردى ءوندىرۋ تەحنولوگياسىن, جول بەلگىلەرىنە ارنالعان ەرىتكىشتە ەريتىن بوياۋ, قۇرامىندا كۇكىرتى بار قۇرىلىس ماتەريالدارىن اتاپ كورسەتۋگە بولادى.
«كوممەرتسيالاندىرۋ رەاكتورى جانە وسىعان ۇقساس ديالوگ الاڭدارى – عالىمدار مەن كاسىپكەرلەر ءۇشىن عىلىمي جەتىستىكتەردىڭ ناتيجەلەرىن نەعۇرلىم ساپالى ءارى ءتيىمدى كوممەرتسيالاندىرۋعا, سونداي-اق وندىرىسكە ەنگىزۋ ءۇشىن ىنتىماقتاستىقتى جولعا قويۋدىڭ جاقسى مۇمكىندىگى. ەۇۋ ەكونوميكانىڭ ناقتى سەكتورىنداعى كاسىپپەن جانە ءىرى كاسىپورىندارمەن ىنتىماقتاستىقتى بەلسەندى تۇردە كەڭەيتىپ كەلەدى. قازىر 3D پرينتەرلەردى قۇراستىرۋ بويىنشا شاعىن وندىرىستەر قۇرۋ, سونداي-اق شەتەلدىك زەرتتەۋشىلەرمەن بىرلەسىپ ونەركاسىپ قالدىقتارىمەن گەوپوليمەرلى بەتوندار شىعارۋ بويىنشا تەحنولوگيالىق جەلىنى ورناتۋ جونىندە جۇمىستار جۇرگىزىلىپ جاتىر», دەدى ەۇۋ-دىڭ عىلىم, كوممەرتسيالاندىرۋ جانە ينتەرناتسيونالداندىرۋ جونىندەگى پرورەكتورى جاننا قۇرمانعاليەۆا.
قۇرىلىس الاڭدارىنىڭ ۆيبرواكۋستيكالىق مونيتورينگى جۇيەسىن ازىرلەۋ جوباسى اۆتورلارىنىڭ ءبىرى – ەۇۋ پروفەسسورى, PhD, ەلبەك وتەپوۆتىڭ نۇسقاۋىنشا, ۇسىنىلعان جۇيە جىلۋ كارتالارى تۇرىندەگى گەوگرافيالىق اقپاراتتىق جۇيە-دە ديناميكالىق ۆيزۋاليزاتسياعا جانە قالا ينفراقۇرىلىمىنا – iKomek, eOtinish ينتەگراتسيالاۋعا مۇمكىندىك بەرەدى. كەلەسى تەحنولوگيانىڭ ارتىقشىلىعى – ءدىرىلسىز تەحنولوگيا ارقىلى تەمىر-بەتون بۇيىمدارىن شىعارۋ. مۇنى ق.ساتپاەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ ماگيسترى يلنۋرا مادياروۆا ۇسىندى. ول جاڭا تەمىر-بەتون بۇيىمدارى – جىلۋ ماگيسترالدىق ناۋالار, سۋارۋ جانە سۋارۋ ارىقتارى ءدىرىلسىز تەحنولوگيا بويىنشا شىعارىلاتىنىن ايتتى. مۇنداي بۇيىمداردى پايدالانعان كەزدە ارماتۋرالىق جاقتاۋ جانە كىرىكتىرىلگەن بولىكتەر قوزعالمايدى, بەتون قوسپاسى بىرتەكتى بولادى, وسىلايشا اقاۋلاردى بولدىرماي, ەكولوگيالىق تازا بولادى جانە ءدىرىلدىڭ زياندى اسەرىن جويادى. م.ح.دۋلاتي اتىنداعى تاراز وڭىرلىك ۋنيۆەرسيتەتىنىڭ ماگيسترى, جوبا اۆتورى, ينجەنەر ەرلان اتەنوۆ, تۇرعىن-ءۇي قۇرىلىسىنا ارنالعان تەمىر-بەتون قادالاردى ءوندىرۋ بويىنشا ۇسىنعان ازىرلەمەسىنىڭ ارتىقشىلىعى رەتىندە ولاردىڭ كوتەرگىشتىگىنىڭ جوعارى بولۋى, تەمىر-بەتوندى تۇتىنۋدىڭ ازايۋى, قىسقا قادالاردى پايدالانۋدىڭ قاراپايىمدىلىعىن, سايكەسىنشە, از قادا ماشينالارىمەن جانە گاباريتتى كولىكتەرمەن جۇمىس ىستەۋ تيىمدىلىگىن اتاپ ءوتتى.
جيىن سوڭىندا كوممەرتسيالاندىرۋ رەاكتورىنا قاتىسقان ساراپشىلار, عالىمدار, قازاقستان قۇرىلىسشىلار وداعىنىڭ «KZ Stroyexpert» جاۋاپكەرشىلىگى شەكتەۋلى سەرىكتەستىگىنىڭ, «QazGem» قازاقستاندىق تسەمەنت جانە بەتون وندىرۋشىلەر قاۋىمداستىعىنىڭ, قازاقستان قۇرىلىس قاۋىمداستىعىنىڭ, قازاقستان اۆتوكلاۆتى گازدالعان بەتون وندىرۋشىلەر قاۋىمداستىعىنىڭ وكىلدەرى جانە باسقا دا مۇددەلى تاراپتار اراسىندا ىنتىماقتاستىق جانە جوبالاردى بىرلەسىپ جۇزەگە اسىرۋ تۋرالى الدىن الا كەلىسىمدەر جاسالدى.
