جيىندا ءسوز العان ءماجىلىس دەپۋتاتى ا.ايماعامبەتوۆ كەڭەستىڭ قۇرىلۋىمەن قۇتتىقتاي كەلە, قازىرگى كەزدە قاراستىرىلىپ جاتقان عىلىمعا قاتىستى ءۇش بىردەي زاڭ جوباسى تۋرالى اتاپ ءوتتى.
– اكادەميا جانىنان قۇرىلعان جاس عالىمدار كەڭەسىنىڭ العاشقى وتىرىسى عىلىمعا قاتىستى زاڭ جوبالارىنا بەرىلەتىن ۇسىنىستارعا قاتىستى ەكەن. وسى تۇستا قازىر وتاندىق عىلىمدى دامىتۋعا قاتىستى ءۇش بىردەي زاڭ جوباسى تالقىلانىپ جاتىر. سونىڭ ەكەۋى سەنات پەن ءماجىلىس دەپۋتاتتارىنىڭ باستاماسىمەن ازىرلەندى. ال ءۇشىنشىسى – سالالىق مينيسترلىك دايىنداعان «عىلىم جانە تەحنولوگيالىق ساياسات» زاڭ جوباسى. مەن وسى زاڭ جوبالارىنىڭ العاشقى ەكەۋىنە توقتالعىم كەلەدى. ءبىرىنشى زاڭ جوباسىندا سالىق كودەكسىنە كاسىپكەرلەردىڭ عىلىم سالاسىنا ينۆەستيتسيا جاساۋ بەلسەندىلىگىن ارتتىرۋ مەن زەرتتەۋلەردىڭ ناتيجەلەرىن وندىرىسكە ەنگىزىلۋىن ىنتالاندىرۋ ءۇشىن ارنايى تۇزەتۋلەر دايىندالدى. مۇندا زەرتتەۋ ۋنيۆەرسيتەتتەرىنىڭ جانىنان عىلىمي ورتالىقتار اشۋ جانە تاجىريبەلىك-كونسترۋكتورلىق جۇمىستاردى ورىنداۋ ءۇشىن جۇمسالعان قاراجاتتىڭ 100%-ىن سالىقتىق شەگەرىمگە جاتقىزۋ, جەكە كومپانيا ءۇشىن تاجىريبەلىك-كونسترۋكتورلىق جۇمىستارعا جۇمسالعان شىعىستار بويىنشا سالىق سالىناتىن سومماسىن 50%-عا تومەندەتۋ ۇسىنىلدى, – دەدى دەپۋتات. ا.ايماعامبەتوۆتىڭ ايتۋىنشا, ەكىنشى زاڭ جوباسىندا عالىمدار ءۇشىن جاڭا ۇستەمەاقى ەنگىزۋ, شىعارماشىلىق دەمالىس بەرۋ, جەر قويناۋىن پايدالانۋ سۋبەكتىلەرىنىڭ زەرتتەۋلەرگە 1% قاراجاتىن ءتيىمدى ءبولۋ, ينستيتۋتتاردى تىكەلەي قارجىلاندىرۋ مۇمكىندىگىن كەڭەيتۋ سياقتى ماڭىزدى نورمالار قابىلداندى. مۇندا زاڭ جوباسىندا عىلىمي-پەداگوگيكالىق قىزمەتكەرلەر ءۇشىن شىعارماشىلىق دەمالىس (Sabbatical) ەنگىزىلدى. وسى باستاما اياسىندا قىزمەتكەرلەر ورتاشا جالاقى كولەمىندەگى تولەمدەردى ساقتاي وتىرىپ, ءبىر جىلعا دەيىن شىعارماشىلىق دەمالىس الۋعا ءوتىنىش بەرە الادى.
اكادەميا جانىنان قۇرىلعان جاس عالىمدار كەڭەسىنىڭ توراعاسى ماقسات جاباعين ءدال سول ءۇشىنشى, ياعني «عىلىم جانە تەحنولوگيالىق ساياسات تۋرالى» زاڭىنىڭ جوباسىنا وزگەرىستەر نەمەسە تولىقتىرۋلار بويىنشا ۇسىنىستار بەرۋدى كۇن ءتارتىبىنىڭ باستى ماسەلەسى رەتىندە اتادى.
– جاس عالىمدار كەڭەسى دەپۋتاتتارعا زاڭ جوباسىنا حالىقارالىق عىلىمي پراكتيكا ستاندارتتارىنا سايكەس كەلەتىن «جاس عالىم» ۇعىمىن ەنگىزۋدى ۇسىنادى. بۇگىندە بۇل ۇعىم «عىلىم تۋرالى» زاڭدا جانە باسقا دا زاڭعا تاۋەلدى اكتىلەردە انىقتاۋسىز قولدانىلادى. The World Association of Young Scientists حالىقارالىق جاس عالىمدار قاۋىمداستىعى ءوز مۇشەلەرىنىڭ جاسىن 40 جاستا انىقتايدى. وسى حالىقارالىق تاجىريبەگە سۇيەنىپ جانە جاھاندىق ۇردىستەردى, وتاندىق تاجىريبەنى ەسكەرىپ, جاڭا زاڭدا «جاس عالىم – 40 جاسقا (قوسا العاندا) دەيىنگى ء(ومىر جانە دەنساۋلىق عىلىمدارى ءۇشىن 44 جاسقا دەيىنگى), PhD دارەجەسىن العاننان كەيىنگى 10 جىلدان اسپايتىن عىلىمي-پەداگوگيكالىق قىزمەت ءوتىلى بار, عىلىمي زەرتتەۋلەردى جۇزەگە اسىراتىن, عىلىمي جانە (نەمەسە) عىلىمي-تەحنيكالىق قىزمەتتىڭ ناتيجەلەرىن الاتىن (انالار مەن جالعىزباستى اكەلەر ءۇشىن ءاربىر بالاعا 18 ايدان اسپايتىن بالا كۇتىمى جونىندەگى كەزەڭدى ەسەپكە الماعاندا) يا وزگە دە تانىلعان بالاماسى بار جەكە تۇلعا» دەگەن انىقتامانى ەنگىزۋدى ۇسىنامىز, – دەدى م.جاباعين.
كەڭەس مۇشەلەرى عىلىمدى باسقارۋداعى ماسەلەلەردى شەشۋگە, مەملەكەتتىك عىلىمي-تەحنيكالىق ساراپتاما جۇرگىزۋ مەرزىمىن جىلدان-جىلعا سوزباۋ, سونىڭ سالدارىنان عىلىمي جوبالار مەن باعدارلامالاردى ۋاقتىلى قارجىلاندىرماۋ سياقتى ماسەلەلەردى شەشۋگە ارنالعان باسقا دا ۇسىنىستارىن جەتكىزدى. سونداي-اق «عىلىم جانە تەحنولوگيالىق ساياسات تۋرالى» زاڭ جوباسىنا ۇلتتىق عىلىم اكادەمياسىنىڭ قۇزىرەتىن 11-تارماعىمەن تولىقتىرۋ ۇسىنىلدى. بۇل نورما مەملەكەت باسشىسىنىڭ پرەزيدەنت جانىنداعى ۇلتتىق عىلىم اكادەمياسىنىڭ قىزمەتىنە جاس عالىمداردى تارتۋ جونىندەگى تاپسىرماسىنا ساي كەلەدى جانە جاس عالىمداردىڭ باستامالارىن ىسكە اسىرۋعا مۇمكىندىك بەرەدى.
