«وزەنمۇنايگاز» اق ديرەكتورىنىڭ ورىنباسارى سوتتالدى

تەرگەۋ ورگانى وعان اسا ءىرى مولشەردە زاڭدى كاسىپكەرلىك قىزمەتكە كەدەرگى كەلتىردى (قك 365-بابىنىڭ 3-بولىگىنىڭ 2-تارماعى) دەگەن ايىپ تاقتى. سونداي-اق ونىڭ ارەكەتتەرى اۋىر زارداپتارعا اكەپ سوققانى (قك 371-بابىنىڭ 2-بولىگى) قوسا ايتىلعان. 

«جاۋاپكەر ك., «ومگ» اق ديرەكتورىنىڭ مۇناي جانە گاز ءوندىرۋ جونىندەگى ورىنباسارى, سونىمەن قاتار اتالعان كاسىپورىننىڭ كونكۋرستىق كوميسسياسىنىڭ توراعاسى بولا تۇرا, بۇرعىلاۋ جۇمىستارىنا تەندەر وتكىزۋ كەزىندە ول بەلگىلى ءبىر كومپانيانىڭ مۇددەسىن قورعاپ, باسقا كومپانياعا زيان كەلتىرگەن. جاۋاپكەر ك. «ك» جشس جەڭىمپاز دەپ تانىلعان 2023 جىلعى 20 ناۋرىزداعى تەندەر قورىتىندىلارى تۋرالى حاتتامانىڭ كۇشىن جويماي, 2023 جىلعى 29 ناۋرىزدا ءدال سول لوتتار بويىنشا تەندەر وتكىزۋ تۋرالى زاڭسىز شەشىم قابىلداعان. ك. ءوز ارەكەتىنىڭ زاڭسىزدىعىن ءتۇسىنىپ, «ا» جشس-ءنىڭ ءوتىنىشى الەۋەتتى ءونىم بەرۋشىلەردىڭ تالاپتارىنا سايكەس كەلمەيتىنىن بىلە تۇرا, ءوز وكىلەتتىكتەرىن «ا» جشس-ءنىڭ مۇددەلەرىن قولداۋ ماقساتىندا پايدالانا وتىرىپ, 2023 جىلعى 29 ناۋرىزدا قايتالاما جينالىس وتكىزىپ, ناتيجەسى بويىنشا بارلىق 4 لوت «ا» جشس اۋكتسيوندارىنا جىبەرۋ تۋرالى شەشىم قابىلداندى», دەلىنگەن سوت انىقتاماسىندا.

كونكۋرس قورىتىندىسى بويىنشا باعانى بارىنشا تومەندەتكەن «ا» جشس جەڭىمپاز دەپ تانىلدى. وسىلايشا, قىزمەتتەردىڭ جالپى قۇنى 2,7 ملرد تەڭگەدەن استام سوماعا تومەندەتىلگەن. (قك 365-بابى)

«سونىمەن قاتار جاۋاپكەر ك., «ومگ» اق مەن «امسك» جشس اراسىندا جاسالعان سورعى جانە كومپرەسسورلىق قۇبىرلاردى جالعا بەرۋ تۋرالى شارت تالاپتارىنىڭ ورىندالۋىن تەكسەرمەي جانە قاداعالاماي, ورىندالعان جۇمىستار تۋرالى اكتىلەرگە قول قويىپ, 21 749 456 ملن تەڭگە سوماسىنداعى جالداۋ اقىسىن تولەۋدەن ۇستاۋ شارالارىن قولدانباي سالعىرتتىق تانىتقان», دەپ حابارلادى وبلىستىق سوتتىڭ ءباسپاسوز قىزمەتى.

وسى تۇستا سوتتالۋشىنىڭ كىناسى جابىرلەنۋشىنىڭ, كۋاگەرلەردىڭ ايعاقتارىمەن, ساراپشىلاردىڭ قورىتىندىلارىمەن, كەپىل حاتتارىمەن, اتقارىلعان جۇمىس تۋرالى انىقتامالارمەن, شوت-فاكتۋرالارمەن جانە باسقا دا ءىس ماتەريالدارىمەن دالەلدەنگەنىن ايتا كەتۋ كەرەك.

پروكۋرور ايىپتالۋشىنى جوعارىدا اتالعان قىلمىستاردى جاساعانى ءۇشىن كىنالى دەپ تانىپ, قىلمىستاردىڭ جيىنتىعىن نەگىزگە الا وتىرىپ, 7 جىلعا باس بوستاندىعىنان ايىرۋدى سۇرادى.

سوتتالۋشى ءوز كىناسىن مويىنداماي, اقتاۋدى سۇرادى.

«سوت جەڭىلدەتەتىن ءمان-جايلار رەتىندە سوتتالۋشىنىڭ كىشكەنتەي بالالارىنىڭ بولۋىن جانە تۇرعىلىقتى مەكەن-جايى مەن جۇمىس ورىندارىنان وڭ مىنەزدەمەسىن ەسكەردى. جاۋاپتىلىقتى اۋىرلاتاتىن ءمان-جاي رەتىندە, قىزمەتتىك باپتا جانە شارتتا كورسەتىلگەن سەنىمدى پايدالانا وتىرىپ, قىلمىستىق قۇقىق بۇزۋشىلىق جاساعانى تانىلدى», دەلىنگەن حابارلامادا.

سوت ۇكىمىمەن ك. قك-ءتىڭ 371- بابىنىڭ 2-بولىگى, 365-بابىنىڭ 3-بولىگى 2-تارماعى, 58- بابىنىڭ 3-بولىگىمەن كىنالى دەپ تانىلىپ, ونى ءومىر بويى مۇناي-گاز سالاسىنداعى كوممەرتسيالىق ۇيىمداردا باسشىلىق لاۋازىمداردى اتقارۋ قۇقىعىنان ايىرىپ, وعان 6 جىل مەرزىمگە باس بوستاندىعىنان ايىرۋ جازاسى تاعايىندالدى.

ۇكىم زاڭدى كۇشىنە ەنگەن جوق