قابىرعاسى جارىلعان سپورتزالى دا وقۋشىلاردىڭ ەركىن جاتتىعۋىنا قاۋىپتى بولعاندىقتان, پايدالانۋدان شىعىپ قالعانىن كوردىك. مەكتەپتىڭ ءۇشىنشى قاباتىنا ارنايى كوتەرىلىپ, ارالاپ جۇرگەنىمىزدە دالىزگە تاستالعان ماتراتستارعا كوزىم ءتۇستى. اۋىل ازاماتى عالبيات بايعاليەۆتىڭ ايتۋىنشا, بالالار اۋداندا وتەتىن ءتۇرلى جارىستارعا قاتىسۋ ءۇشىن وسى جەردە دايىندالادى ەكەن. وسىنداي قولايسىز جەردە جاتتىعىپ جۇرگەندەرىنە قاراماستان اۋداندىق, وبلىستىق جارىستاردان جۇلدەلى ورىن الىپ جۇرگەن جاستاردىڭ جانكەشتىلىگىنە قايران قالاسىڭ.
ءبىر سوزبەن ايتقاندا, بۇگىنگى وركەنيەت كوشىنەن تىس قالعانى ءوز الدىنا, ءىشى-سىرتىنىڭ سىنى كەتكەن ءبىلىم وشاعىنا اينالسا دا, ۇستازدارى قولايسىزدىعىنا ءتوزىپ, وقۋشىلارى جايسىز مەكتەپتە وقىپ ءجۇر. تەك داتكە قۋات ەتەر ءۇمىت بىرەۋ عانا: «جايلى مەكتەپ» قاناتقاقتى جوباسى اياسىندا سالىناتىن مەكتەپ قۇرىلىسى بيىل باستالماق.
اباي وبلىستىق ءبىلىم باسقارماسىنىڭ مالىمەتىنە سۇيەنسەك, بيىل وبلىستا 6 مەكتەپتىڭ قۇرىلىسى باستالىپ, كەلىسىمشارت بويىنشا 2025 جىلى اياقتالادى. ءبىز ايتىپ وتىرعان ەكپىن اۋىلىنان بوي كوتەرەتىن 300 ورىندىق مەكتەپ سونىڭ قاتارىندا قولعا الىنباق. دەمەك ەكپىندىك بالالار كىرسەڭ ەڭسەڭدى تۇسىرەتىن مەكتەپتە كەلەسى جىلعا دەيىن وقۋىنا تۋرا كەلەدى.
جالپى, اباي وبلىسىندا «جايلى مەكتەپ» ۇلتتىق قاناتقاقتى جوباسى اياسىندا ءبىر اۋىسىمدا 5 700 وقۋشىعا ارنالعان 11 مەكتەپ سالۋ جوسپارلانعان. ال 2023 جىلى باستالعان 5 مەكتەپتىڭ قۇرىلىسى بيىل اياقتالۋعا ءتيىس. اتاپ ايتقاندا, سەمەي قالاسىنىڭ قاراعايلى تۇرعىن اۋدانىندا 1 200 ورىندىق, ۆودنىي كەنتىندە 600 ورىندىق, اياگوز قالاسىندا 600 ورىندىق, اقسۋات, بەسقاراعاي اۋداندارىندا 300 ورىندىق مەكتەپتەر پايدالانۋعا بەرىلىپ, ءبىلىم وشاقتارىنىڭ جەتىسپەۋشىلىگى ماسەلەسى جۇيەلى تۇردە شەشىلىپ, اپاتتى مەكتەپتەردى جويۋ كوزدەلىپ وتىر.
اقسۋات اۋدانىنا بارعان ساپارىمىزدا ساتباەۆ اۋىلدىق وكرۋگىنە قاراستى كوكتۇبەك ەلدى مەكەنىنە دە جول ءتۇستى. بۇل اۋىلداعى مەكتەپتىڭ جايى تىپتەن مۇشكىل. اسكەري دايىندىق ءپانىنىڭ مۇعالىمى قانات قاليحانوۆتىڭ باستاۋىمەن كىرىپ كەلگەنىمىزدە تار دالىزدە ۋلاپ-شۋلاپ مەرەكەلىك ءىس-شاراعا قاتىسىپ جاتقان وقۋشىلاردىڭ ونەرىنە كۋا بولدىق. ءبىر قاباتتى ءبىلىم وشاعىندا اكت زالى اتىمەن جوق بولعاندىقتان, بالالار ونەرىن وسىلاي كورسەتۋگە ءماجبۇر ەكەن. ال سپورت زالى رەتىندە بۇرىنعى قازاندىق عيماراتىن كورگەنىمىزدە قاراۋعا كوز ۇيالدى. ودان قالسا, وقۋشىلار سانيتارلىق تالاپقا ساي كەلمەيتىن اسحانادا كەزەكتەسىپ تاماقتانادى.
– ىرگەتاسى 1929 جىلى قالانعان كوكتۇبەك كەزىندە دۇركىرەپ تۇرعان ۇلكەن اۋىل ەدى. ىرگەمىزدەن اۋدان ورتالىعى اقسۋاتتان باستاپ, ساتباەۆ, كىندىكتى اۋىلدارى كەڭەستىك داۋىردە ءوز الدىنا شارۋاشىلىق بولىپ سالىنىپ, ءبولىنىپ شىققاندا, كوكتۇبەك قالتارىستا قالىپ قويدى. قازىر ساتباەۆ اۋىلىنىڭ قۇرامىنداعى ەلدى مەكەن بولىپ سانالادى. اۋىلدا وزەكتى ماسەلە بارشىلىق. ينتەرنەت قىزمەتى سىن كوتەرمەيدى. حابارلاسۋ ءۇشىن تراسساعا, بيىكتەۋ جەرگە بارىپ, بايلانىسقا شىقپاساق, ۇيدە ۇيالى تەلەفون ارقىلى تىلدەسۋگە مۇمكىندىك جوق. مەكتەپ مۇعالىمدەرى كۇندەلىكتى تاپسىرمالاردى ورىنداعاندا قاتتى قينالادى. سوعان قاراماستان اي سايىن اۋدان ورتالىعىنا بارىپ, ينتەرنەت ءۇشىن «قازاقتەلەكومعا» 8-10 مىڭ تەڭگە تولەيمىز. ودان كەيىنگى ايتار نارسە, 10 شاقىرىم جەردەگى اۋدانعا توتە جول جوق. الدىمەن ساتباەۆ اۋىلدىق وكرۋگىنە بارىپ, سونداعى تراسسا ارقىلى جەتكەنشە 35 شاقىرىم بولادى. سوندا اقسۋاتقا بارىپ قايتۋىمىز 70 شاقىرىمعا شىعادى. بۇل اۋىل حالقى ءۇشىن ءتيىمسىز بولىپ تۇر, – دەيدى قانات.
كوكتۇبەك اۋىلىنا قاتىستى ماسەلە بويىنشا قابىلداعان اقسۋات اۋدانى اكىمىنىڭ ورىنباسارى احمەت اققازين جاعدايدان تولىقتاي حاباردار ەكەنىن ايتتى.
– كوكتۇبەك مەكتەبىن جاڭادان سالۋ ماسەلەسى جالپى نازارىمىزدا بار. قازىر وبلىستىق قۇرىلىس باسقارماسىنا جوبالىق-سمەتالىق قۇجاتى دايىندالىپ جاتىر. ءتيىستى قاراجاتىن كەلەسى جىلدىڭ بيۋدجەتىنە ەنگىزىپ, قۇرىلىسىن 2025 جىلى باستاۋ جوسپارعا ەنگەن. بۇعان قاتىستى وبلىس اكىمىنىڭ تاپسىرماسى دا بار. ودان بولەك, كوكجىرا اۋىلىنىڭ بازارشات دەگەن جەرىنەن بالالاردىڭ جازعى دەمالىس لاگەرىن سالۋ قولعا الىنادى, – دەيدى احمەت اسەت ۇلى.
اقسۋات اۋداندىق ساۋلەت, قۇرىلىس, تۇرعىن ءۇي شارۋاشىلىعى جانە اۆتوموبيل جولدارى ءبولىمىنىڭ باسشىسى سەرىكبەك سماعۇلوۆتىڭ ايتۋىنشا, بيىل اۋداندىق ماڭىزداعى ساتباەۆ – كوكتۇبەك اراسىنداعى 9 شاقىرىم جول اسفالتتالاتىن بولادى. وعان 492 ملن تەڭگە قاراجات ءبولىنىپ, دايىن تۇر. ال كوكتۇبەكتەن اقسۋاتقا تۋرا جول سالۋعا مۇمكىندىك جوق. ويتكەنى ارالىقتا بىرقاتار شارۋا قوجالىقتارىنىڭ يەلەرىنە تيەسىلى جەرلەرى بار. تۋرا جول سالۋدىڭ كۇردەلى جۇمىستارىن جۇرگىزۋگە ولاردىڭ كوبىنىڭ كەلىسە قويۋى قيىن. ەسەسىنە, كوكتۇبەكتىكتەر ساتباەۆ اۋىلدىق وكرۋگىنە جاڭادان توسەلەتىن جول ارقىلى قاتىناپ, اۋدان ورتالىعىنا وبلىستىق ماڭىزى بار تراسسا ارقىلى كەلۋىنە مۇمكىندىك تۋادى.
اباي وبلىسى,
اقسۋات اۋدانى
