پرەزيدەنتكە ءبىلىم وشاعىنىڭ عىلىمي-يننوۆاتسيالىق ەكوجۇيەسى تۋرالى مالىمەت بەرىلدى. رەكتور ساۋلە راحمەتۋللينانىڭ ايتۋىنشا, بىلتىر ۋنيۆەرسيتەت بازاسىندا Smart engineering قۇزىرەتتەر ورتالىعى اشىلعان. ورتالىق ماشينا جاساۋ, تاۋ-كەن جانە مەتاللۋرگيا كەشەنى سالالارىنداعى يمپورتتى الماستىرۋشى تەحنولوگيالاردى دامىتۋدى كوزدەيدى.
مەملەكەت باسشىسىنا جاستاردىڭ يننوۆاتسيالىق جوبالار جاساۋىنا مۇمكىندىك بەرەتىن مەديتسينا باعىتىنداعى تەحنوپاركتىڭ نەگىزىن قالاۋ جوسپارى جونىندە باياندالدى. قازىردىڭ وزىندە ۋنيۆەرسيتەتتە ازىرلەنگەن 40-تان استام مەديتسينالىق يمپلانتات ءتۇرى كلينيكالىق سىنىقتان وتكىزىلىپ جاتىر.
قازاق-نەمىس ۋنيۆەرسيتەتىمەن بىرلەسىپ, مەتاللۋرگيا, پايدالى قازبالاردى يگەرۋ باعىتىندا عىلىم جانە تەحنولوگيا ينستيتۋتىن اشۋ جوسپارلانعان.
«لۋ بان شەبەرحاناسى» «اۆتوموبيلدەردىڭ يننوۆاتسيالىق كونسترۋكتسياسى» جانە «اۆتوموبيلدەردىڭ SMART تەحنولوگياسى» سياقتى ەكى زەرتحانادان تۇرادى. ورتالىقتىڭ ءبىر ەرەكشەلىگى – مۇندا ستۋدەنتتەر پراكتيكالىق داعدىلاردى مەڭگەرىپ, اۆتوموبيل جۇيەلەرىنە سيمۋلياتسيالىق سىناق جۇرگىزە الادى. سونداي-اق ورتالىقتا ەلەكتروموبيلدەر مەن گيبريدتى كولىكتەرگە تەحنيكالىق قىزمەت كورسەتۋ جانە دياگنوستيكا جاساۋ ءۇشىن جاڭا تەحنولوگيالاردى يگەرۋ ىسىنە ايرىقشا ءمان بەرىلەدى.
