دينارانىڭ دزيۋدومەن شۇعىلدانعانىنا كوپ بولا قويعان جوق. سولاي بولا تۇرعانمەن, قىسقا مەرزىم ىشىندە ەكىنىڭ ءبىرى قول جەتكىزە بەرمەيتىن بيىك بەلەستەردى باعىندىرعان. سپورتشى كەيىنگى ءبىر جىلدان بەرى كورۋ قابىلەتىنەن ايىرىلعان.
11 جىل بويى تۇرعىن ءۇي كەزەگىندە تۇرعان پاراسپورتشى پاتەر كىلتىن تابىس ەتۋ سالتاناتىنا اناسى مەن بالالارىن ەرتە كەلدى. جاڭا پاتەردىڭ تابالدىرىعىن اتتاي بەرە قۋانىشتىڭ كوز جاسىنا ەرىك بەرگەن دينارا اتىمتاي كاسىپكەردى قۇشاقتاي الىپ: «جاقسىلىعىڭىز ءجۇز ەسە قايتسىن! سىزگە شىن نيەتىممەن تىلەيتىنىم – بۇگىن مەن قالاي قۋانسام, ءدال سولاي قۋاناتىن كۇندەرىڭىز كوپ بولسىن», دەپ شىنايى العىسىن جاۋدىردى.
پاتەردىڭ اۋدانى 61 شارشى مەتر بولادى. تەرەزەلەرى ۇلكەن, بولمەلەرى جارىق. بالكونىنا دەيىن ەدەندەلگەن, جىپ-جىلى.
«ۇساق-تۇيەك شارۋالارى عانا بىتپەي تۇر. ەكى كۇننەن كەيىن كوشىپ كەلە بەرۋىڭىزگە بولادى», دەيدى كاسىپكەر.
بولمەلەردى ارالاپ كورىپ شىققان دينارا كاسىپكەرگە تاعى ريزاشىلىعىن ايتىپ جاتتى. «شىنىمدى ايتسام, سوڭىنا دەيىن سەنبەدىم. قازىردىڭ وزىندە ءوز كوزىمە ءوزىم سەنبەي تۇرمىن. 11 جىل بويى كەزەك كۇتتىم. بۇگىن, مىنە, كوپتەن كۇتكەن پاتەرىمىزدى كورىپ, قۋانىشتان ەسىمىز شىعىپ تۇر. وسى تۇرعاندا سىزگە دەگەن, وتانىمىزعا دەگەن قارىزىمدى شىن سەزىنگەندەي كۇيدەمىن. الدىمىزدا پاراليمپيا ويىندارى كۇتىپ تۇر. جوق دەگەندە جۇلدەگەرلەر قاتارىنان كورىنۋگە تىرىسامىن», دەيدى دينارا.
«ينۆەست قوست» سەرىكتەستىگىنىڭ باسشىسى قانات سالىمگەرەەۆ ءوزىنىڭ كومپانياسى سالىپ بىتىرگەن ءار ۇيدەن تۇرمىسى تومەن وتباسىلارعا ءبىر پاتەردەن بەرىپ وتىرۋدى ءداستۇرلى ۇردىسكە اينالدىراتىن ويى بار ەكەنىن ايتتى.
قوستاناي وبلىسى
