فوتو: baq.kz
اكتسيانىڭ ماقساتى – قارتتار مەن ەرەكشە قاجەتتىلىگى بار قالا تۇرعىندارىنا كومەك كورسەتۋ. شاراپاتى مول ءىس-شاراعا 50 كوللەدج ستۋدەنتى اتسالىستى. «كوللەدج ستۋدەنتتەرى مەن تۇلەكتەرى قاۋىمداستىعىنىڭ زاڭدى تۇلعالار بىرلەستىگىنىڭ» توراعاسى اڭسار قايىرجانوۆتىڭ ايتۋىنشا, بۇل اكتسيا جىل سايىن وتكىزىلەدى.
– ءبىز اۋا رايىنىڭ قولايسىزدىعىنا قاراماستان, كوممۋنالدىق قىزمەتشىلەرگە ءجيى كومەكتەسەمىز. سونىمەن قاتار ولارعا ىستىق شاي جانە ءتۇرلى تاتتىلەر تاراتامىز. ەلوردالىق جاستار ۇيىمدارىن «يگى ىستەر مارافونىنا» قاتىسۋعا شاقىرامىن, – دەدى ول.
سونىمەن قاتار ەلوردالىق ەرىكتىلەر كوشەلەردىڭ قارىن كۇرەپ جۇرگەن كوممۋنالدىق قىزمەت ماماندارىنا جىلى شارفتار توقىپ بەردى. وسىناۋ ءىس-شاراعا الەۋمەتتىك كاسىپكەر راحيما مۇقىشەۆا كومەككە كەلدى.
«بۇل العاشقى قايىرىمدىلىق اكتسيا ەمەس, بۇعان دەيىن بىزدە «قۇراق-كورپە» ستيلىندەگى ەكو-شىرشا قۇرۋ جوباسى بولعان. وسىلايشا, ءبىز بارلىق تۇرعىندار مەن كاسىپكەرلەردى جاقسىلىق جاساۋعا شاقىرامىز», دەدى ر.مۇقىشەۆا.
ءبىر اي بويى 6-70 جاس ارالىعىنداعى قالا تۇرعىندارى 100-دەن اسا جىلى شارف توقىدى. قايىرىمدىلىق اكتسياسىنا 70-كە جۋىق ەرىكتى قاتىستى.
«بىزگە جىلى شارفتار ۇلەستىردى. بۇل, اسىرەسە, ايازدى كۇندەرى قاجەت. قامقورلىق تانىتىپ, قولۇشىن سوزىپ جاتقان ەرىكتىلەرگە العىسىمىز زور», دەدى جول قىزمەتكەرلەرىنىڭ ءبىرى قايرات احمەتوۆ.
«وزگەنىڭ يىعىنا جاپقان شاپان, ءوزىڭنىڭ دە جۇرەگىڭدى جىلىتادى» دەيدى ەجەلگى دانالىق. ەندەشە, قايراتى ىستىق, اقىلى نۇرلى, جۇرەگى جىلى جاستارىمىزدىڭ ىسىنە يگىلىك تىلەيمىز.
