جاس مامان «زاڭعار ۇستاز» اتتى جوباسىن ءبىر ايدا جاساپ شىعارعان. اقىلدى قوسىمشا بارلىق ءپان بويىنشا بەرىلگەن تاپسىرمانى ورىنداۋعا كومەكتەسەدى. ارتىقشىلىعى سول – ونى تاۋلىكتىڭ كەز كەلگەن ۋاقىتىندا قولدانىپ, ۆيرتۋالدى مۇعالىمگە سۇراق قويۋعا بولادى. ول ءسىزدىڭ ساۋالىڭىزعا ءاپ-ساتتە-اق جاۋاپ بەرەدى.
– بۇل قوسىمشا – مەكتەپتەگى سىنىپ مەنەدجمەنتىن قالىپتاستىرۋداعى مۇعالىمنىڭ ۆيرتۋالدى كومەكشىسى. وقۋشىلاردىڭ قويعان سۇراقتارىنا اقىلدى بوت تولىقتاي جاۋاپ بەرەدى. ءبىلىم الۋشىلارعا تاپسىرمالاردى ۋاقتىلى ەسكە سالىپ وتىرادى جانە ولارمەن كەرى بايلانىس جاسايدى. سونىڭ ارقاسىندا بالالاردىڭ ماتەماتيكا سەكىلدى كۇردەلى پانگە قىزىعۋشىلىعى ارتقانىن بايقادىم, – دەدى جوبا اۆتورى.
قازىرگى ۋاقىتتا بۇل قوسىمشا تەكسەرىستەن ءوتىپ جاتىر. سول سەبەپتى ازىرشە تەك 24 وقۋشى سىناق رەتىندە قولدانىپ ءجۇر. وقۋ جىلىنىڭ سوڭىنا دەيىن وڭ ناتيجە كورسەتسە, وبلىس مەكتەپتەرىنە ەنگىزۋگە بولادى. جاس مامان ول ءۇشىن ارنايى سەمينار وتكىزۋگە دە دايىن.
– ءبىز وقۋشىلاردىڭ سۇرانىستارىنا جاۋاپ بەرە الاتىن پەداگوگتەردىڭ جاڭا بۋىنى پايدا بولعانىنا قۋانىشتىمىز. جاسۇلاننىڭ بالالارعا تسيفرلىق ساۋاتتىلىق تۇرعىسىنان ۇيرەتەرى مول. ول بالالاردىڭ عىلىمعا, بىلىمگە دەگەن ۇمتىلىسىن وياتتى. سونىمەن قاتار قازىرگى زامان ازاماتىنىڭ قۇندىلىقتارىن دارىتىپ, ءوزىمىزدىڭ ۇلتتىق بىرەگەيلىگىمىزدى ساقتاۋعا تىرىسادى,– دەيدى ارىپتەسى سالتانات احمەتوۆا.
مەملەكەت باسشىسى رەسپۋبليكالىق پەداگوگتەر سەزىندە: «بالالارىمىز زامانعا ساي وزىق ءبىلىم الۋى قاجەت. 2050 جىلعا قاراي قازىرگى كاسىپتەردىڭ جارتىسىنا جۋىعىن تسيفرلىق جانە تەحنيكالىق جۇيەلەر الماستىرادى», دەگەن بولاتىن. راسىمەن, قازىر ەڭبەك نارىعى وتە جىلدام وزگەرىپ, كوپتەگەن سالاعا جاساندى ينتەللەكت ەنىپ جاتىر. بۇل ۇدەرىس جىلدان-جىلعا قارقىن الا بەرەتىنى ءسوزسىز. سوندىقتان ازاماتتارىمىز جاڭا زامانعا قاجەتتى داعدىلاردى ۇيرەنۋى كەرەك.
بەكزات قۇلشار,
ل.ن.گۋميلەۆ اتىنداعى ەۇۋ ستۋدەنتى
