عىلىم جانە جوعارى ءبىلىم ءمينيسترى ساياسات نۇربەك الماتىدا وتكەن «Digital Almaty-2024»: «Industry X: بولاشاقتىڭ تسيفرلىق ەۆوليۋتسياسى» اتتى VI تسيفرلىق فورۋمى اياسىندا IT ماماندار دايارلاۋعا تالداۋ جاساعاندا تسيفرلى بولاشاقتىڭ ماماندارىنا جوعارى ءبىلىم بەرىپ, ءوز باعدارلاماسىن جاڭارتىپ وتىراتىن, زەرتحانالارعا, ينفراقۇرىلىمعا ينۆەستيتسيا سالاتىن, سالاداعى وزگەرىستى باقىلايتىن 14 جوعارى وقۋ ورنىنىڭ انىقتالعانىن جەتكىزدى. ءمينيستردىڭ ايتۋىنشا, قازىرگى كەزدە جاستاردىڭ كوپشىلىگى اقپاراتتىق تەحنولوگيالاردى ءوز بولاشاعىمەن بايلانىستىرادى. سوندىقتان جوعارى وقۋ ورىندارى وسى باعىتتا ساپالى ءبىلىم بەرۋ باعدارلاماسىن كۇشەيتۋى كەرەك. مۇنىڭ قاتارىندا ماماندىقتىڭ نەگىزىن, فيلوسوفياسىن تەرەڭ تۇسىنەتىن ءارى جۇيەلى كوزقاراسى بار ماماندار دايارلاۋدى ماقسات تۇتاتىن ينجەنەرلىك ءبىلىم بەرۋدىڭ ۇلتتىق مودەلىن ازىرلەۋ قاجەتتىگى تۋىنداپ وتىر.
يندۋستريا 4.0. داۋىرىندە جوعارى وقۋ ورىندارى تۇلەكتەرىنىڭ جاساندى ينتەللەكتىنى يگەرۋدە وقۋ باعدارلاماسىنىڭ جاڭا زامانمەن ۇيلەسىمى جانە الەمدىك ءبىلىم كەڭىستىگىمەن ىقپالداستىعى وتە ماڭىزدى. وسىعان وراي قازىرگى كەزدە تەحنولوگيالىق يننوۆاتسيالارعا باعىتتالعان ۇزدىك تاجىريبەلەرگە نازار اۋدارۋ, ينتەراكتيۆتى پلاتفورمالاردى, وقىتۋ مودەلدەرىن دايىنداۋ قاجەت.
عىلىم جانە جوعارى ءبىلىم ءمينيسترى وسى ورايدا بىلىكتى ماماندار دايارلاۋ مەن زاماناۋي وقۋ باعدارلاماسىمەن قامتاماسىز ەتۋدىڭ ماڭىزىنا توقتالىپ, تسيفرلى ەكونوميكانىڭ جاڭا تالابىنا ساي ادىستەمەنىڭ قاجەت ەكەنىن العا تارتتى. بۇل باعىتتا ءبىلىم بىرلەستىكتەرى جانە تەحنولوگيالىق كوشباسشىلارمەن ارىپتەستىك ەڭبەك نارىعىنا بەيىندى ماماندار تاربيەلەۋگە مۇمكىندىك بەرەدى. وسى باعىتتا بىلتىردان باستاپ مەملەكەتتىك ستاندارت ءبىلىم بەرۋ مەن ادىستەمە تۇرعىسىنان 90 پايىزعا وزگەرگەن. بۇگىندە ەلىمىزدىڭ 14 جوعارى وقۋ ورنىندا AI-Literacy جاساندى ينتەللەكت بويىنشا كۋرستار وتەدى. كەلەسى جىلدان باستاپ جاساندى ينتەللەكت سالاسىندا بازالىق ءبىلىمى الۋ ءۇشىن «Huawei» كومپانياسىنىڭ قولداۋىمەن ارنايى كۋرس بارلىق ستۋدەنت ءۇشىن قولجەتىمدى بولادى. عىلىمي-زەرتتەۋ جانە تاجىريبەلى كونسترۋكتورلىق بازاسى وزىق «Huawei» كومپانياسىمەن كەلىسىمشارت جاسالىپ, ەلىمىزدەگى ۋنيۆەرسيتەتتەردە 50 الدىڭعى قاتارلى زەرتحانا اشۋ كوزدەلىپ وتىر. بىلتىر ەلىمىزدە مۇنداي زەرتحانانىڭ 33-ءى اشىلدى.
يننوۆاتسيالىق تەحنولوگيالار ورتالىقتارىن وقۋ ۇدەرىسىنە ينتەگراتسيالاۋدىڭ ماڭىزى مەن بولاشاق تۇلەكتەردىڭ ساپالى ءبىلىم الۋىنا توقتالعان IDC ۆيتسە-پرەزيدەنتى اندرەي بەكلەميشەۆ الەمدىك ۋنيۆەرسيتەتتەر تاجىريبەسىندەگى وزىق تەحنولوگيانى مەڭگەرۋ, تاجىريبەنى ۇشتاۋ, جەتەكشى كومپانيالارمەن ىنتىماقتاستىق ارقىلى يننوۆاتسيالىق ورتادا داعدىلاردى دامىتۋعا مۇمكىندىك بەرەتىن مامانداندىرىلعان ورتالىق قۇرۋ تۋرالى ايتتى.
بۇگىندە مامانداردى جۇمىسقا ورنالاستىرۋ ماسەلەسى وتە وزەكتى سانالادى. ساراپشىلار وسى جاعدايدى وزگەرتۋگە مۇمكىندىك بەرەتىن بىرقاتار فاكتوردى اتاپ, ءبىلىم بەرۋ باعدارلاماسىن قازىرگى ەڭبەك نارىعىنىڭ قاجەتتىلىگىنە قاراي بەيىمدەۋ, جاستار اراسىنداعى كاسىپتىك باعدارلاۋ ءۇردىسىن جاقسارتۋ, سونداي-اق تسيفرلىق يندۋستريا كوشباسشىلارىن ءبىلىم بەرۋ سالاسىنا تارتۋعا نازار اۋداردى. مىسالى, «Huawei» سياقتى الپاۋىت كومپانيالاردا تاعىلىمدامادان ءوتۋ, ترەنينگتەرگە جانە كونكۋرستارعا قاتىسۋ تۇلەكتەرگە بولاشاقتا مۇمكىندىك اشىپ قانا قويماي, تابىسى جوعارى جۇمىس ورنىنا ورنالاسۋىنا ىقپال ەتەدى. بۇگىندە اتالعان كومپانيادا ەلىمىزدەگى اقپاراتتىق كوممۋنيكاتسيالىق تەحنولوگيالار بويىنشا وقۋ ورىندارىن بىتىرگەن تۇلەكتەر جۇمىس ىستەيدى. الداعى ۋاقىتتا بىلىكتى ماماندار دايارلاۋدا جاڭا تەحنولوگيالارعا نەگىزدەلگەن ءبىلىم باعدارلاماسى مەن زەرتحانالار پاركىن كوبەيتۋ مىندەتى تۇر.
الماتى
