تانىمال تۇلعانى ەسكە الۋعا جينالعان قاۋىم ءبىرتۋار عالىمنىڭ عىلىمعا, ادەبيەتكە سىڭىرگەن ەڭبەگى حاقىندا وي تولعادى.
م.اۋەزوۆ اتىنداعى ادەبيەت جانە ونەر ينستيتۋتىندا ۇزاق جىل قىزمەت ەتكەن مىرزابەك دۇيسەنوۆ – كوركەم پروزا, سىن, ادەبيەتتانۋ سالالارىندا بىردەي ەڭبەك ەتكەن قارىمدى قالامگەر. ول كىشى عىلىمي, اعا عىلىمي قىزمەتكەردەن جامبىلتانۋ ءبولىمىنىڭ مەڭگەرۋشىسىنە دەيىن جاۋاپتى قىزمەت اتقاردى. ءال-فارابي اتىنداعى قازۇۋ-دا ءبىلىم العان عالىم كەزىندە مۇحتار اۋەزوۆتىڭ جەتەكشىلىگىمەن اسپيرانتۋراعا قابىلدانعان. ءابدىلدا تاجىباەۆ, ءازىلحان نۇرشايىقوۆتاي حالقىمىزدىڭ دارا پەرزەنتتەرىمەن دە ۇزەڭگىلەس بولىپ, ادەبيەت مايدانىندا تەر توكتى.
جيىندا قازاقستاننىڭ ەڭبەك سىڭىرگەن قايراتكەرلەرى, جازۋشى ءسۇلتانالى بالعاباەۆ پەن عالىم سەرىك نەگيموۆ مىرزابەك دۇيسەنوۆتىڭ جايساڭ مىنەزىن, تەرەڭ ىزدەنىسىن ەسكە الىپ, ونىڭ ادەبي كاسىپكە دەگەن ادالدىعىن, ارىپتەسكە دەگەن مەيىرىمىن اڭگىمەلەدى. عالىمنىڭ عىلىمي قاعيداتى مەن ۇلت تانىمىن كوتەرگەن دەرەكتى پروزاسىن اتاپ ءوتتى.
قازاقستان جازۋشىلار وداعى توراعاسىنىڭ ورىنباسارى باۋىرجان جاقىپ قازاق ادەبيەتتانۋىنىڭ دامۋىنا ولشەۋسىز ەڭبەك سىڭىرگەن زەينوللا قابدولوۆ, سەرىك قيراباەۆ, تۇرسىنبەك كاكىشەۆ سەكىلدى تۇلعالاردىڭ قاتارىندا مىرزابەك دۇيسەنوۆتىڭ دە تۇرعانىن ايتتى. بۇگىندە عالىمنىڭ ارتىندا وشپەس مۇراسى, باعا جەتپەس ەڭبەكتەرى قالدى.
الماتى
