پرەزيدەنت ۇلىتاۋ وبلىسىنىڭ اكىمىنە بىرقاتار تاپسىرما جۇكتەدى

پرەزيدەنتكە ۇلىتاۋ وبلىسىنىڭ بىلتىرعى الەۋمەتتىك-ەكونوميكالىق دامۋ قورىتىندىسى تۋرالى ەسەپ بەرىلدى. نەگىزگى كاپيتالعا سالىنعان ينۆەستيتسيا كولەمى 14 پايىزعا ءوسىپ, 210,1 ميلليارد تەڭگەگە جەتتى. وسى رەتتە جەكە ينۆەستيتسيانىڭ ۇلەسى 90 پايىزدى قۇرادى. وتكەن جىلى وڭىردە جالپى سوماسى 10 ميلليارد تەڭگە بولاتىن 3 ءىرى جوبا ىسكە اسىرىلدى.

بەرىك ابدىعالي ۇلىنىڭ ايتۋىنشا, بيىل كەم دەگەندە 16 جوبانى, ونىڭ ىشىندە ونەركاسىپ جانە گەولوگيا باعىتتارى بويىنشا 8, تۋريزم جانە ساۋدا سالالارىندا 3, اگروونەركاسىپ كەشەنىندە 5 جوبانى ىسكە قوسۋ جوسپارلانعان. ناتيجەسىندە وڭىردە 700 جاڭا جۇمىس ورنى اشىلادى.

قاسىم-جومارت توقاەۆقا بيىل اگرارلىق سالادا قۇس فابريكاسىن, ەت وڭدەۋ كەشەنىن سالۋ, 3000 گەكتار اۋماقتا كارتوپ جانە كوكونىس وسىرەتىن فەرمەرلىك شارۋاشىلىقتاردى ىسكە قوسۋ كوزدەلىپ وتىرعانى جونىندە مالىمەت بەرىلدى.

«جايلى مەكتەپ» ۇلتتىق جوباسى اياسىندا 2024-2025 جىلدارى 3600 ورىندىق 6 مەكتەپ سالىنادى. ونىڭ بىرەۋى بيىل جەزقازان قالاسىندا پايدالانۋعا بەرىلمەك.

سونىمەن قاتار ۇلىتاۋ وبلىسىنىڭ اكىمى بيىل ىسكە قوسىلاتىن 10 سپورت نىسانى جايىندا باياندادى. اتاپ ايتقاندا, 320 ادامعا ارنالعان باسسەينى بار كوپفۋنكتسيونالدى سپورت كەشەنى, جەزقازعان قالاسىندا «قازاقمىس» كورپوراتسياسىنىڭ «نامىس» سك بالالار مەن جاسوسپىرىمدەر سپورت اكادەمياسى, جەزدى جانە جاڭاارقا كەنتتەرىندە دەنە شىنىقتىرۋ-ساۋىقتىرۋ كەشەندەرى, قاراجالدا جابىق باسسەين, سونداي-اق انگار ءتيپتى 5 ويىن كەشەنى سالىنادى.

كەزدەسۋدە وبلىستاعى جىلىتۋ ماۋسىمىنىڭ جانە جىلۋمەن قامتاماسىز ەتۋ جۇمىستارىنىڭ بارىسى تۋرالى ايتىلدى. ينفراقۇرىلىمدى ودان ءارى دامىتۋعا بايلانىستى 2029 جىلى جەزقازعان مەن ساتباەۆ قالالارىندا ەكىنشى جىلۋ ەلەكتر ورتالىقتارىنىڭ قۇرىلىسىن جۇرگىزۋ جوسپارلانىپ وتىر. بۇل ورتالىقتار جىلۋ تاپشىلىعى ماسەلەسىن شەشۋگە ءتيىس. 

مەملەكەت باسشىسىنا جەزقازعان – قىزىلوردا جانە جەزقازعان – ارقالىق جولدارىنىڭ قۇرىلىس-مونتاجداۋ, سونداي-اق ءۇيتاس-ايدوس سۋ قۇبىرىن رەكونسترۋكتسيالاۋ جۇمىستارى باستالعانى جايىندا باياندالدى.