فوتو: KazNARU ءباسپاسوز قىزمەتى
سەرتيفيكاتتى WSB اكادەمياسىنىڭ حالىقارالىق ىنتىماقتاستىق جونىندەگى پرورەكتورى, دوكتور رافال رەمبيلاس تابىستاپ, بۇل مارتەبەلى اتاق KazNARU باسشىسى ا.ق.كۇرىشباەۆقا عىلىم مەن جوعارى ءبىلىمدى دامىتۋداعى ۇزدىك جەتىستىكتەرى ءۇشىن جانە ەكى ەلدىڭ عىلىمي قاۋىمداستىقتارى اراسىنداعى ىنتىماقتاستىقتى نىعايتۋعا قوسقان زور ۇلەسى ءۇشىن بەرىلگەنىن ايتتى.
ءوز كەزەگىندە, KazNARU رەكتورى اقىلبەك كۇرىشباەۆ ۋنيۆەرسيتەتتىڭ پولياك سەرىكتەستەرىمەن ورناتىلعان ىنتىماقتاستىعىنىڭ ماڭىزدى باعىتتارىنا توقتالىپ, جوعارى ءبىلىم جانە عىلىم سالاسىندا بىرلەسە اتقارىلعان بەلسەندى جۇمىستارعا ريزاشىلىعىن ءبىلدىردى.
«كەزدەسۋ اياسىندا باسەكەگە قابىلەتتى كادرلاردى دايارلاۋ بويىنشا بىرلەسكەن ءبىلىم بەرۋ جوبالارىن ىسكە اسىرۋ; مەنەدجمەنت جانە ىسكەرلىك اكىمشىلىك سالاسىندا ەكى ديپلومدى ءبىلىم بەرۋ باعدارلامالارىن قۇرۋ; تسيفرلاندىرۋ جانە اقپاراتتىق تەحنولوگيالار, عىلىمي-زەرتتەۋ باعدارلامالارى مەن قولدانبالى زەرتتەۋلەر سالاسىن دامىتۋ ماسەلەلەرى ەگجەي-تەگجەيلى تالقىلاندى», دەلىنگەن حابارلامادا.
قوس تاراپ ءوزارا ءتيىمدى ىنتىماقتاستىقتى ودان ءارى تەرەڭدەتۋ تۋرالى ورتاق پىكىرگە كەلىپ, بىرلەسكەن ءبىلىم بەرۋ باعدارلامالارى تۋرالى مەموراندۋمعا قول قويدى.
