فوتو: جاسلان جۇمابەكوۆ
«پرەزيدەنت قاسىم-جومارت توقاەۆ دامىعان مەملەكەتتەرگە بارعان ساپارىندا دۇنيەجۇزىنە تانىمال كاسىپورىن باسشىلارىن ەلىمىزگە تىزە قوسىپ جۇمىس ىستەۋگە شاقىردى. وسىنداي قادامنىڭ ناتيجەسىندە قازاقستاندا بۇرىن-سوڭدى بولماعان, وزىق جابدىقتارمەن جابدىقتالعان شىنى ءوندىرىسى ىسكە قوسىلدى.
ءبىز قاڭتار ايىنداعى سايلاۋشىلارمەن كەزدەسۋ بارىسىندا قىزىلوردا وبلىسىندا بولىپ, «Orda Glass LTD» كاسىپورنىن دا ارالاپ كوردىك, ۇجىمىمەن جۇزدەستىك. ەلىمىزدەگى جالعىز شىنى زاۋىتى بۇل. جوبا ينۆەستورلاردىڭ جەكە قاراجاتى ەسەبىنەن 46 ميلليارد تەڭگەگە سالىندى. 373 ادامدى جۇمىسپەن قامتىپ وتىر. زاۋىت ىسكە قوسىلعالى 173 مىڭ توننا ءونىم شىعارىلىپ, ونىڭ 70%-ى ىشكى نارىققا ساتىلسا, 30%-ى كورشى ەلدەرگە ەكسپورتتالعان. بىراق قازىرگى تاڭدا ىشكى نارىقتىڭ سۇرانىسىنا شەتەلدەن كەلگەن شىنى ءونىمى كوبەيدى. سەبەبى وزگە ەلدەردىڭ ۇكىمەتى وتاندىق تاۋار وندىرۋشىلەرىنە قولداۋدىڭ ءارالۋان مەحانيزمىن جاساپ وتىر. مىسالى, قوسىمشا قۇن سالىعىن قايتارىپ, گاز باعاسىن تومەنگى تاريفپەن بەرىپ جاتىر. وسىنداي قولداۋ-كومەكتەن كەيىن دە يمپورتتالاتىن شىنى باعاسى ارزان. جوعارىدا اتالعان جوبانىڭ ەلىمىز ءۇشىن ماڭىزدىلىعىن ەسكەرىپ, وتاندىق تاۋار وندىرۋشىلەرگە قولداۋ جاساۋ قاجەت», دەدى م.ەرگەشباەۆ.
دەپۋتات ەلىمىزگە يمپورتتالاتىن ءونىمدى تۇتىنۋدان گورى, قۇرىلىس نىساندارىنا وتاندىق ونىمدەردى قولدانۋدى تالاپ ەتكەندە عانا ءوندىرىس سالاسىن كوركەيتۋگە مۇمكىندىك بولاتىنىن ايتتى.
