فوتو: رۋسلان كادىروۆ
وقۋشىلاردىڭ جان-جاقتى دامۋىنا, ساپالى ءبىلىم الۋىنا جاعداي جاساۋ مەن ولاردىڭ قاۋىپسىزدىگىن قامتاماسىز ەتۋ باستى نازاردا. وسى ايتىلعان ويعا سايكەس وڭىرىمىزدەگى 5 اۋدانعا جاڭا اۆتوبۋستار تابىستالدى.
جاڭا اۆتوبۋستاردىڭ كىلتىن تابىستاعان وبلىستىق ءبىلىم باسقارماسىنىڭ باسشىسى مارات سۇلەيمەنوۆ سۋ جاڭا كولىكپەن قامتاماسىز ەتىلىپ جاتقان مەكەمە باسشىلارىن قۇتتىقتادى. ءسوز اراسىندا وتكەن جىلى شالعاي ەلدى مەكەندەردەگى بالالاردى تاسىمالداۋ ءۇشىن رەسپۋبليكالىق بيۋدجەتتەن 53,4 ملن تەڭگەگە 7 اۆتوبۋستىڭ ليزينگكە الىنعانىن اتاپ ءوتتى. سونىمەن قاتار بيىلعى جىلى بەرىلىپ جاتقان 5 اۆتوبۋس جەرگىلىكتى بيۋدجەت ەسەبىنەن 223 ملن تەڭگەگە الىنىپ وتىرعانىن مالىمدەدى.
«بۇل كۇنى 24 ورىندى 5 اۆتوبۋس تابىستاۋدامىز. ولار اقسۋ, الاكول, ەسكەلدى, قاراتال, كوكسۋ اۋدانى مەكتەپتەرىنە بەرىلەدى. انىقتاپ ايتساق اقسۋ اۋدانى يۋ. گاگارين اتىنداعى ورتا مەكتەبىنە قىزىلجار اۋىلىنان, الاكول اۋدانى تەرەكتى ورتا مەكتەبىنە تالدىبۇلاق, ۇشبۇلاق اۋىلدارىنان, ەسكەلدى اۋدانى بالپىق بي اتىنداعى ورتا مەكتەبىنە تەڭلىك, تەرەكتى, بوكتەرلى اۋىلدارىنان, قاراتال اۋدانى ق. بايسەيىتوۆ اتىنداعى ورتا مەكتەبىنە ايدار اۋىلىنان, كوكسۋ اۋدانى №12 ورتا مەكتەبىنە اينابۇلاق ستانسىسىنان, كەمەرتوعان اۋىلى رازەزدىنەن وقۋشىلاردى تاسىمالدايدى», دەيدى م.سۇلەيمەنوۆ.
بارلىق اۆتوبۋس ينتەللەكتۋالدى اۆتوماتتى قاۋىپسىزدىكتى تەكسەرۋ, وقۋشىلاردى سالوندا قالدىرۋدىڭ الدىن الۋ جۇيەسىمەن, ەكى قاۋىپسىزدىك بەلدىگى بار ورىندىقتارىمەن, سالوننىڭ ارتقى جاعىندا اشىلاتىن اۆاريالىق شىعۋ ەسىگىمەن, سانيتاريالىق-ەپيدەميولوگيالىق قوندىرعىمەن جابدىقتالعان.
ءىس-شارادا اقسۋ اۋداندىق ءبىلىم ءبولىمىنىڭ باسشىسى ايدىنبەك جەكسەمباەۆ وقۋشىلاردى قۇتتىقتادى.
«اقسۋ اۋدانى بويىنشا 38 جالپى ءبىلىم بەرەتىن مەكتەپ بار. ونىڭ 27-ءسى ورتا, 7-ءۋى ورتالاۋ, 4-ءۋى باستاۋىش مەكتەپ. ءبىزدىڭ اۋداندا 5 مەكتەپتەن وقۋشىلار تاسىمالدانادى. بۇل كۇنى 4 مەكتەبىمىزدە جاڭا اۆتوبۋستار بار, تەك سۋىقساي اۋىلىنداعى گاگارين اتىنداعى ورتا مەكتەبىندەگى كولىگىمىزدىڭ جىلى ەسكىلەۋ بولاتىن. ءبىلىم باسقارماسى ءبىزدى قولداپ, مىنە, جاڭاسىن الدىق. قۋانىشىمىزدا شەك جوق. وبلىس اكىمدىگىنە, وبلىستىق ءبىلىم باسقارماسىنا اقسۋ اۋدانىنىڭ ازاماتتارىنىڭ, حالىقتىڭ اتىنان العىسىمىزدى ايتامىز. وسى كولىكتى بالالاردىڭ يگىلىگىنە بارىنشا پايدالانامىز», دەيدى ا.جەكسەمباەۆ.
جەتىسۋ وڭىرىندە 32 باستاۋىش مەكتەپ بار بولسا سولاردىڭ وڭتايلاندىرۋ جۇمىسىن وبلىستىق ءبىلىم باسقارماسى تولىقتاي قولعا الىپ وتىر. وبلىس اكىمى بەكىتىپ بەرگەن ارنايى جول كارتاسى بويىنشا باستاۋىش مەكتەپتەردە وقيتىن وقۋشىلاردى نەگىزگى جانە ورتا مەكتەپتەرگە تاسىمالداۋ جۇمىستارىن ۇيىمداستىرادى. سول ءۇشىن جەرگىلىكتى بيۋدجەتتەن قوسىمشا تاعى دا 10 اۆتوبۋس الۋعا قاراجات بولىنگەن. ەندى ءار اۋدان وزدەرى كولىك ساتىپ الادى. وسىلايشا بيىلعى جىلى تاسىمالداۋ ماسەلەسى تولىعىمەن شەشىمىن تاپپاق.
