عىلىم جانە جوعارى ءبىلىم ۆيتسە-ءمينيسترى دارحان احمەد-زاكي جانە ءال-فارابي اتىنداعى قازاق ۇلتتىق ۋنيۆەرسيتەتىنىڭ باسقارما توراعاسى-رەكتور جانسەيىت تۇيمەباەۆ باستاعان دەلەگاتسيا قىتايعا قحر ءبىلىم ۆيتسە-ءمينيسترىنىڭ شاقىرتۋىمەن باردى.
ساپار بارىسىندا دەلەگاتسيا مۇشەلەرى قازاقستان مەن قىتاي ۋنيۆەرسيتەتتەرىنىڭ حالىقارالىق عىلىمي سيمپوزيۋمىنا قاتىسىپ, بايانداما جاسايدى. مۇنىمەن قوسا قازۇۋ عالىمدارى تابىستى يننوۆاتسيالىق جوبالارىن قىتاي جوو-لارىنا كەڭىنەن تانىستىرۋ, سونداي-اق ناتيجەلى عىلىمي جوبالاردى كوممەرتسيالاندىرۋ, وندىرىسكە ەنگىزۋ بويىنشا سەرىكتەستەر تارتۋ, تاجىريبە الماسۋ ماقساتىندا عىلىمي كورمە وتكىزبەكشى. كورمە الاڭىندا ەڭ ۇزدىك 30 عىلىمي-يننوۆاتسيالىق جوبا كورسەتىلەدى دەپ جوسپارلانىپ وتىر.
قازۇۋ دەلەگاتسياسى ءۇرىمجى قالاسىندا ورنالاسقان جوعارى وقۋ ورىندارىنا بارىپ, ۋنيۆەرسيتەت باسشىلارىمەن بىرقاتار كەزدەسۋلەر وتكىزۋدى دە جوسپارلاپ وتىر. جۇزدەسۋدە تاراپتار سەرىكتەستىكتى ارتتىرۋ جانە ورتاق جوبالاردى بىرلەسىپ جۇزەگە اسىرۋ جۇمىستارىن پىسىقتايدى. بۇعان قوسا ءال-فارابي اتىنداعى قازۇۋ قىتايدىڭ جوعارى وقۋ ورىندارىمەن جانە ينستيتۋتتارىمەن ىنتىماقتاستىق جونىندە كەلىسىمدەرگە قول قويىپ قايتپاقشى.
