وليمپيادا جەڭىمپازدارىن قۇتتىقتاعان وقۋ-اعارتۋ ءمينيسترى عاني بەيسەمباەۆ ەلىمىزدىڭ ءبىلىم سالاسى ءۇشىن ايتۋلى ءىس-شارانىڭ كەيىنگى 20 جىل ىشىندە دارىندى جاس ماتەماتيكتەر بۋىنىنىڭ قالىپتاسۋىنا ىقپال ەتكەنىن اتاپ ءوتتى. «حالىقارالىق جاۋتىكوۆ وليمپياداسى تالانتتى وقۋشىلار ءۇشىن ءبىلىم باسەكەسىنە اينالدى, قازاق مادەنيەتى مەن ءداستۇرىن الەمگە تانىتۋعا جول اشتى. قاتىسۋشىلاردىڭ ارقايسىسى ماتەماتيكا جانە فيزيكا سياقتى ىرگەلى عىلىمدار بويىنشا لايىقتى ناتيجەلەر كورسەتىپ, ءوز ەلىنىڭ تۋىن ماقتانىشپەن كوككە كوتەردى. كورنەكتى عالىم-ماتەماتيك, اكادەميك ورىمبەك جاۋتىكوۆ ەسىمىمەن اتالاتىن وليمپيادا الاڭىندا كۇنى بۇگىنگە دەيىن الەمنىڭ كوپتەگەن ەلىنەن كەلگەن وقۋشىلار باق سىناۋىمەن قاتار, ءبىلىم سالاسىنداعى جاڭا داعدىلاردى يگەرۋگە, تاجىريبە جيناۋعا مۇمكىندىك الدى», دەدى مينيستر.
رەسپۋبليكالىق فيزيكا-ماتەماتيكا مەكتەبى ديرەكتورلار كەڭەسىنىڭ توراعاسى بەرىك قانيەۆتىڭ ايتۋىنشا, وليمپيادانىڭ ءۇش پاننەن ءوتۋى ءداستۇرلى ءىس-شارانىڭ ەرەكشەلىگىن كورسەتىپ, جاس بۋىننىڭ ينتەللەكتۋالدى دەڭگەيىنىڭ دامۋىنا بارىنشا ىقپال ەتىپ جاتىر. قازىلار القاسىنىڭ توراعاسى, ۇلتتىق عىلىم اكادەمياسى ۆيتسە-پرەزيدەنتى اسقار جۇمادىلداەۆ اتاپ وتكەندەي, جاۋتىكوۆ وليمپياداسىنىڭ بۇگىندە گەوگرافياسى كەڭەيدى. فيزيكا-ماتەماتيكا عىلىمىن وقۋشىلار اراسىندا ناسيحاتتاۋمەن قاتار, مامانداندىرىلعان مەكتەپتەردىڭ تاجىريبە جيناۋىنا, وليمپيادالار وتكىزۋدەگى, سونداي-اق ءبىلىم مەن مادەني بايلانىستارىنا جول اشتى.
قازاقستان, رەسەي, بەلارۋس, ارمەنيا, وڭتۇستىك كورەيا, قىتاي جانە امەريكادان كەلگەن ماماندار زياتكەرلەر دوداسىنا تورەلىك ەتتى. جاقسى ناتيجە كورسەتكەن قاتىسۋشىلارعا ماتەماتيكادان – نۇرلان قاپپاروۆ اتىنداعى, فيزيكادان – ادىلەت يمامبەكوۆ, ينفورماتيكادان – يليا سەگالوۆيچ اتىنداعى سىيلىقتار تابىس ەتىلدى.
ءۇش پاننەن قاتىسقان 344 قاتىسۋشى حح حالىقارالىق جاۋتىكوۆ وليمپياداسىنىڭ جۇلدەگەرى اتاندى. باس جۇلدە سانكت-پەتەربۋرگ قالاسىنان كەلگەن №239 پرەزيدەنتتىك فيزيكا-ماتەماتيكا ليتسەيىنىڭ كومانداسىنا بۇيىرسا, I ورىندى ماسكەۋدەگى ۆ.ف.وۆچيننيكوۆا اتىنداعى «ەكىنشى مەكتەپ» يەلەندى. II ورىندى تبيليسيدەن كەلگەن ل.ۆ.كوماروۆ اتىنداعى №199 ماتەماتيكا جانە فيزيكا ارنايى مەكتەبىنىڭ جانە دولگوپرۋدنىي قالاسىنداعى پ.ل.كاپيتسا اتىنداعى «فيزتەح-ليتسەيى» ءبولىستى. III ورىندى مينسكىدەگى بگۋ ليتسەيى, سوفيا قالاسىنداعى Sofia High School of Mathematics, دولگوپرۋدنىي قالاسىنداعى پ.ل.كاپيتسا اتىنداعى «فيزتەح-ليتسەيى» جانە الماتىداعى رەسپۋبليكالىق فيزيكا-ماتەماتيكا مەكتەبى يەلەندى.
وليمپيادادا ەل وقۋشىلارى 109 مەدال جەڭىپ الدى. ونىڭ 10-ى – التىن, 43-ءى – كۇمىس, 56-سى – قولا مەدال.
الماتى
