– تولقىن اعا, اۋەلى وزبەكستان چەمپيوناتىن كوزىمىزبەن كورىپ, اۋراسىن سەزىنۋگە مۇمكىندىك ۇسىنعاندارىڭىز ءۇشىن كوپ راحمەت. بايقاعانىمىز, ىشكى بىرىنشىلىك جۇلدەگەرلەرى اراسىندا جاڭا ەسىمدەر كوپ ەكەن...
– دۇرىس بايقاعانسىز, بۇل جولى جەڭىس تۇعىرىنا كوتەرىلگەن بوكسشىلاردىڭ 80 پايىزى – جاستار. بۇگىنگى كۇنمەن ءومىر سۇرۋگە بولمايدى. بولاشاقتى دا ويلاۋىمىز كەرەك. سول سەبەپتى, جەلپىنىپ تۇرعان جاستارعا دا مۇمكىندىك بەردىك.
48 كيلو – ەڭ جەڭىل سالماق. بۇل سالماققا ۇزىن بويلى بوكسشىلار كەرەك ەمەس. ولار كەيىن سالماق قوسىپ الادى. شوديەرجون مەليكۋزيەۆتەي الاسا بويلى, ءبىر قىرىم ارتىق ەتى جوق سپورتشى بولعانى ءجون. تۋرا سىزدەردەگى تەمىرتاس ءجۇسىپوۆ سەكىلدى. شوديەرجون تالاي مىقتىنى قاپى قالدىرادى دەپ سەنەمىز. ول 2023 جىلى تاشكەنتتە وتكەن الەم بىرىنشىلىگىنىڭ 1/8 فينالىندا, بانگكوكتە (تايلاند) وتكەن 22 جاسقا دەيىنگى ازيا چەمپيوناتىنىڭ فينالىندا سانجار تاشكەنبايدان جەڭىلىپ قالعان. قازىر تاجىريبەسى تولىسىپ كەلەدى. وزبەكستان چەمپيوناتىنىڭ فينالىندا اۆازجون يۋلداشەۆتى قينالماي جەڭدى. شوديەرجون سەنساتسيا جاساپ, مىقتىلاردىڭ قاتارىنا قوسىلدى.
51 كيلودا چەمپيون اتانعان 22 جاستاعى اسىلبەك جاليلوۆ – وليمپيادا چەمپيوندىعىنان ۇمىتكەر تالانتتى بوكسشى. بۇل سالماقتا پاريج وليمپياداسىنا حوسونبوي دۋسماتوۆ باراتىنى بەلگىلى. اتالعان دودادان كەيىن ءجاليلوۆتىڭ ءداۋىرى باستالادى. اسىلبەك وڭ قولىمەن دە, سول قولىمەن دە جۇدىرىقتاسا الادى. ءارى بويشاڭ. ەگەر مۇنىڭ سالماعىندا حوسونبوي بولماعاندا, قازىردىڭ وزىندە اسىلبەك ءبىراز بيىكتى باعىندىرار ەدى. اسىلبەك تە, ونىڭ فينالداعى قارسىلاسى مۇحاممادقادىر مامىرجانوۆ تا – 22 جاسقا دەيىنگىلەر اراسىندا ازيا چەمپيونى. سوڭعىسى 2022 جىلى تاشكەنتتە وتكەن دودادا توپ جارسا, العاشقىسى 2023 جىلى بانگكوكتە وتكەن ازيا بىرىنشىلىگىندە جەڭىسكە جەتتى.
– بايقاعانىمىز, جاس بوكسشىلاردىڭ دا قارقىنى جاقسى ەكەن.
– دۇرىس ايتاسىز. 54 كيلودا چەمپيون اتانعان شاحزود مۋزاففاروۆ – 22 جاسقا دەيىنگىلەر اراسىندا ازيا چەمپيونى, جاستار اراسىندا الەم چەمپيونى. وتە تالانتتى بوكسشى. بويشاڭ. ونىڭ ىشكى چەمپيوناتتا توپ جارۋى دا زاڭدى. فينالداعى قارسىلاسى فوزيلجون ابدۋمۋرودوۆ جاسى ۇلكەن بولسا دا, وسال ەمەس. جاقسى سپاررينگ ارىپتەس بولا الادى. 57 كيلودا توپ جارعان ميرازيز ميرزاحاليلوۆ وليمپيادادان باسقا دودانىڭ بارىندە جەڭىمپاز اتاندى. الەم, ازيا جانە ازيا ويىندارىنىڭ چەمپيونى. ونىڭ مۇنداي اتاق-دارەجەسىنەن قايمىقپاعان حۋدوينازار فايزوۆ تا وتە تالانتتى. بولاشاق جۇلدىزىمىز دەسەك تە بولادى.
60 كيلودا جەڭىمپاز بولعان سۋرحونداريالىق ديلشود ابدۋمۋرودوۆ تا جاس بوكسشى, ازيا چەمپيونى. وتە ەڭبەكقور جىگىت. قاتەلىك-كەمشىلىگىمەن كوپ جۇمىس ىستەيدى. رينگتە ءوزىن سابىرلى ۇستايدى. ايتقانىڭدى بۇلجىتپاي ورىندايدى. ديلشود وسىمەن ەكىنشى مارتە ەل چەمپيونى اتاندى. ونىمەن فينالدا جولىققان اسادبەك راجابوۆ جاستار اراسىندا توپ جارعان. 2005 جىلى تۋعان اسادبەكتىڭ فينالعا جەتۋى – جاقسى جەتىستىك. 63,5 كيلودا چەمپيون اتانعان رۋسلان ابدۋللاەۆ فينالدا مۋجيبيللو تۋرسۋنوۆتان باسىم ءتۇستى. رۋسلاندى وقىرمانعا تانىستىرۋدىڭ قاجەتى جوق دەپ ويلايمىن. الەم چەمپيونىن بارلىعى بىلەدى.
– 67, 71 كيلو سالماقتا فينالدىق ايقاس نەگە بولمادى؟
– 67 كيلودا التىننان القا تاققان كامرونبەك تۋرگۋنبوەۆ – نوكاۋتەر. ول جاس بوكسشى شاۆكاتجون بولتاەۆپەن جۇدىرىقتاسۋى كەرەك-ءتىن. بىراق اقىلداسا كەلە شاۆكاتجوندى شىعارماعاندى ءجون سانادىق. سەبەبى نوكاۋتەر كامرونبەك اۋىر سوققىلار دارىتىپ, جاس تالانتتىڭ ساعىن سىندىرىپ جىبەرۋى مۇمكىن ەدى. 71 كيلودا حاۆاسبەك اسادۋللاەۆ جەكپە-جەكسىز-اق جەڭىسكە جەتتى. ويتكەنى اسادحۋجا مۋيدينحۋجاەۆ جارتىلاي فينالدا جاراقات الىپ قالدى. سول سەبەپتى ول فينالدىق جەكپە-جەككە شىققان جوق. ايتپەسە, اسادحۋجانى الەم چەمپيونى ەكەنىن بىلەسىزدەر.
75 كيلوداعى فينالدىق جەكپە-جەك تارتىستى ءوتتى. الوحون ابدۋللاەۆ قارسىلاسى جاۆوحير ۋمماتاليەۆتەن 3:2 ەسەبىمەن باسىم ءتۇستى. جاۆوحير استانادا وتكەن جاستار اراسىنداعى ازيا چەمپيوناتىندا توپ جاردى.
80 كيلودا تۋرابەك حابيبۋللاەۆ جاسۋربەك يۋلدوشەۆتى جەڭدى. تۋرابەك – تالانتتى بوكسشى, جاستار اراسىندا الەم چەمپيونى. بولاشاعىنان زور ءۇمىت كۇتىپ وتىرمىز.
86 كيلودا ونەر كورسەتكەن شوحجاحون ابدۋللاەۆ پەن ساماندار جالولوۆ اراسىنداعى جەكپە-جەك ءبىرىنشى راۋندتان كەيىن اياقتالدى. شوحجاحون – جاستار اراسىندا الەم چەمپيونى, ازيا چەمپيونى. بىراق بۇل جولى سامانداردىڭ ساعىن سىردىرماس ءۇشىن جەڭىستى وعان «سىيلادىق». وعان سەبەپ تە كوپ. بىرىنشىدەن, ساماندور – باحودير جالولوۆتىڭ تۋعان ءىنىسى. جاس بالا. قازىردىڭ وزىندە بويى – 193 سم. ول بولاشاقتا 92 كيلوعا اۋىسادى. ەكىنشىدەن, ەكەۋىن دە ءبىر باپكەر جاتتىقتىرادى. ايتپەسە, شوحجاحوننىڭ ساماندورعا شاماسى جەتىپ تۇر.
– 92 كيلو سالماقتا فينالدىق ايقاس كەرەمەت وتكەن سەكىلدى. كوپكە تانىمال لازيزبەك مۋللاجونوۆ پەن قازاق باۋىرىمىز ماديار سايدراحيموۆ ەكەۋى دە الەم بىرىنشىلىگىنىنىڭ قولا جۇلدەگەرلەرى...
– 92 كيلودا جەڭىمپاز اتانعان لازيزبەك مۋللاجونوۆ تۋرالى كوپ ايتۋعا بولادى. مۇنداي بوكسشى الەمدە كەمدە-كەم. ادامي تۇرعىدان دا, سپورتشى رەتىندە دە لازيزبەك بارلىعىنا ۇلگى-ونەگە. بۇل سالماقتاعى فينالدىق جەكپە-جەك تارتىستى ءوتتى. لازيزبەك الەم چەمپيوناتىنىڭ قولا جۇلدەگەرى ماديار سايدراحيموۆتان باسىم ءتۇستى. 92 كيلودان جوعارى سالماقتا توپ جارعان جاحونگير زوكيروۆ باحودير جالولوۆتىڭ ورنىن باساتىن بوكسشى. بويشاڭ, سوققىسى مىعىم. جاحونگير 2003 جىلى تۋعان. جاسوسپىرىمدەر, جاستار اراسىنداعى دودالاردىڭ بارلىعىن جەڭدى. جاستار اراسىنداعى الەم چەمپيوناتىندا, 22 جاسقا دەيىنگى ازيا بىرىنشىلىگىندە توپ جاردى. 2021 جىلى وزبەكستان چەمپيوناتىندا جەڭىسكە جەتتى. جاحونگير كەز كەلگەن مىقتى بوكسشىعا توتەپ بەرە الادى. كەلەسى وليمپياداعا بارادى, بۇيىرتسا. ول فينالدىق ايقاستا ابدۋراحيم جۋراەۆتى اسا قينالماي جەڭدى.
– جالولوۆ اۋەسقوي بوكستان بولەك, كاسىپقوي بوكستا دا بارىن سالىپ ءجۇر. سپورتشىنىڭ ەكى مايداندا جۇرگەنى قانشالىقتى دۇرىس؟
– وتە قيىن. بىراق باسقا امالىمىز جوق. باحودير – جاستاردىڭ كۋميرى, بەتكەۇستارىمىز. ول كاسىپقوي بوكستا 13 جەكپە-جەك وتكىزىپ ۇلگەردى. پاريج وليمپياداسىنان كەيىن تولىقتاي كاسىپقوي بوكسقا اۋىسادى.
– ءسىزدىڭ قازاقستاننىڭ باس باپكەرى مىرزاعالي ايتجانوۆپەن بايلانىسىڭىز جاقسى ەكەنىن بىلەمىز. دەگەنمەن ەكى ەل قۇراماسىنىڭ قارىم-قاتىناسى قاي دەڭگەيدە؟
– مىرزاعالي اعامىز – الەمدەگى مىقتى جاتتىقتىرۋشىنىڭ ءبىرى. ول قازاقستان قۇراماسىنىڭ تىزگىنىن العاش ۇستاعاندا الەمدىك بوكستا ۋكراينا اتويلاپ تۇر ەدى عوي. سول كەزدە ۋكراينالىقتارعا لايىقتى باسەكەلەستىك تانىتىپ, ەكپىنىن باسقان ءدال وسى قازاقستان بوكسشىلارى ەدى. مەن ول ۋاقىتتا باپكەرلىك جۇمىسقا ەندى كىرىسىپ, شىرشىق قۇراماسىن جاتتىقتىرۋدى قولعا العان ەدىم. مىرزاعالي اعادان, مارات جاكيەۆتەن بىلمەگەنىمدى سۇراپ, اقىل-كەڭەس الىپ تۇراتىنمىن. جاس بولعان سوڭ, كەيدە تورەشىلەردىڭ ادىلەتسىزدىگىنە شىداماي شيرىعىپ شىعا كەلەتىن ەدىك. سونداي كەزدە مىرزاعالي اعامىز «تولقىن, ايقايلاعاننان ەشتەڭە شىقپايدى. ولار شەشىمىن ەندى وزگەرتپەيدى. سوندىقتان شاكىرتتەرىڭدى بۇدان دا مىقتى ەتىپ دايىندا. اشۋعا ەرىك بەرسەڭ, ۇزاماي-اق تاۋسىلىپ تىناسىڭ. الداعى ۋاقىتتا مۇنداي ادىلەتسىزدىكتىڭ تالايىن كورەسىڭ», دەيتىن. قاراپ وتىرسام, مىرزا باپكەر دۇرىس ايتقان ەكەن. ودان كەيىن دە تالاي دۇنيە باستان ءوتتى عوي.
– ءسىزدى قاتال باپكەر دەيدى. جاۋابىن وزىڭىزدەن ەستيىك.
– تارتىپكە باسىمدىق بەرەتىنىم راس. ءباحوديردى «سكاكالكامەن» تالاي ساباعانمىن. كەيدە قاسىمداعى جاتتىقتىرۋشىلار ارا تۇسەتىن. سونداي قاتال ءتارتىپتىڭ ناتيجەسىندە بوحودير چەمپيون بولىپ ءجۇر. قازىر ماعان راحمەت ايتادى. ايتپاقشى, ءباحوديردى شىڭداۋعا قازاقستان دا ەداۋىر ۇلەس قوستى. باحودير, يسرايل, مۋرودجون, ەلنۇر باستاعان مىقتى شاكىرتتەرىمنىڭ بارلىعى قازاقستان ارقىلى الەمگە تانىلدى. سىزدەردە جاستار مەن ەرەسەكتەر اراسىندا جىلىنا 10-15 تۋرنير ۇيىمداستىرىلادى. استانا, الماتى, پاۆلودار, قوستاناي, اتىراۋ, اقتاۋ, شىمكەنت, تۇركىستان سەكىلدى قالالاردا وتەتىن تۋرنيرلەرگە شاكىرتتەرىمدى تالاي اپارعانمىن. كەيدە ءبىر قالاداعى ءتۋرنيردى ءتامامداپ, ەلگە قايتپاي, بىردەن ەكىنشى شاھارداعى دوداعا توپ ەتە تۇسەتىنبىز. بوكسشىلارىمىزدى تۋرنيرلەرگە كوبىرەك قاتىستىرىپ, تاجىريبە جيناقتاۋ باستى ماقسات بولدى. جالولوۆ, مادريموۆ, احماداليەۆ سەكىلدى بوكسشىلار جاستار مەن ەرەسەكتەر اراسىنداعى جارىستارعا قاتار قاتىسا بەرەتىن. باحودير جاس كۇنىندە ارىق, بويشاڭ بولدى. 92 كيلودا جۇدىرىقتاساتىن. بەتى قايتىپ قالماسىن دەپ الەكسەي سەۆاستيانوۆتىڭ جەكە باپكەرىنە «شاكىرتىڭ بايقاپ ۇرسىن, ەكىنشى راۋندتا رينگكە شىعارمايمىز» دەپ ءوتىنىش ايتقان كەزىمىز دە بولعان. سويتكەن باحودير قازىر ابىرويىمىزدى اسىرىپ جاتىر.
ايتپاعىم, قازاق پەن وزبەك بوكسى ءاردايىم بىرگە داميدى. سەبەبى ەكى ەلدە ۇقساستىق وتە كوپ. ءبىز – ەجەلدەن دوستىعى بەرىك, سىيلاستىعى جاراسقان باۋىرلاس حالىقپىز. ەكى ەلدىڭ سالت-ءداستۇرى, مادەنيەتى, ءتىلى, ءدىنى ۇقساس. تاريحى تامىرلاس. سىرتتاعى تۋرنيرلەرگە بارعاندا ءبىر-ءبىرىمىزدى ىزدەپ تۇرامىز. اۋدارماشىسىز-اق تىلدەسىپ تۇرعاندا باسقا دا ەلدىڭ وكىلدەرى قايران قالادى.
– قازاق پەن وزبەك بوكسىندا نەندەي ۇقساستىق بار؟
– كوپ قوي. ەكى قۇراماداعى بوكسشىلار سانى دا, جاتتىعۋلارى دا بىردەي. جالپى, بىزگە قازاق بوكسىنىڭ مىقتى بولعانى كەرەك. ولار ءۇشىن دە وزبەك بوكسىنىڭ مىقتى بولعانى دۇرىس. سەبەبى ەكى مەملەكەتتىڭ بوكسشىلارى كۋبا, اقش سەكىلدى مىقتى ۇجىمداردىڭ وكىلدەرىمەن جىلىنا ءارى كەتسە ءبىر-ەكى رەت قانا كەزدەسەدى. ال قازاق پەن وزبەك ورەندەرى ءار تۋرنيردە قولعاپ تۇيىستىرەدى. سوندىقتان جاقىن كورشى, باۋىرلاس ەلدەر بوكستى دامىتۋ ءۇشىن دوستىق قارىم-قاتىناستى ۇزبەي, جىلىنا كەم دەگەندە استانادا, الماتىدا, تاشكەنتتە بولسىن ءبىر-ەكى رەت بىرلەسكەن وقۋ-جاتتىعۋ جيىنىن وتكىزىپ تۇرعانىمىز ابزال. بۇل ەكى تاراپقا دا ءتيىمدى.
– بىرلەسكەن جاتتىعۋ دەپ قالدىڭىز. شىنىندا دا, شەكارا شەبىندەگى شىمكەنت قالاسىنىڭ ماڭىندا ورنالاسقان «اق بۇلاق» سپورت كەشەنى بىرلەسكەن جاتتىعۋ وتكىزۋگە تاپتىرماس ورىن سەكىلدى.
– تاماشا يدەيا. باسشىلارعا ايتىپ كورۋگە بولادى.
– ءدال قازىر الەمدە قاي قۇرامانىڭ مىسى باسىم؟
– ءدوپ باسىپ ايتۋ قيىن. قازىر بوكستى ءبارى جاقسى مەڭگەرگەن. ايتالىق, برازيليا, جاپونيا ەلىنىڭ كەز كەلگەن بوكسشىسىمەن وتەتىن جەكپە-جەك وڭايعا سوقپايدى. ءۇندىستان مەن موڭعوليانىڭ جەڭىل سالماقتاعى بوكسشىلارى دا مىقتى. وسىنداي بيىك باسەكە جاعدايىندا قازاقستان دا, وزبەكستان دا الداعى وليمپياداعا تولىق قۇراممەن قاتىسۋى كەرەك.
– ەندى ءوزىڭىز تۋرالى اڭگىمەگە ويىسساق...
– جاسوپىرىمدەر اراسىندا وزبەكستان چەمپيونىمىن. جاستار اراسىندا ەل بىرىنشىلىگىنىڭ كۇمىس جانە قولا جۇلدەگەرىمىن. «وزبەكستاننىڭ سپورت شەبەرى» دەگەن اتاعىم بار. ەرەسەكتەر ساپىنا قوسىلعان سوڭ بىرنەشە تۋرنيرگە قاتىستىم. سودان كەيىن كاسىپقوي بوكسقا اۋىسىپ, رەسەيگە كەتتىم. وندا جەتى جەكپە-جەك وتكىزىپ, بەسەۋىندە جەڭىسكە جەتتىم. بوكستى تاستاعاننان كەيىن رەسەيدە ءتۇرلى سالادا قارا جۇمىس ىستەدىم. ۇيدەگىلەر قايتا-قايتا ەلگە قايتۋىمدى وتىنگەننەن كەيىن 2009 جىلى شىرشىقتاعى سپورت مەكتەبىنە جۇمىسقا ورنالاستىم. جاسوسپىرىمدەردى جاتتىقتىردىم. باحودير, مۋرودجون, ەلنۇر سەكىلدى بولاشاق چەمپيونداردى تاربيەلەدىم. كەيىننەن وسى بوكسشىلارمەن بىرگە جاستار جانە ەرەسەكتەر قۇراماسىنا قوسىلدىم.
– قۇرامانىڭ باس باپكەرى بولعانىڭىزعا كوپ بولعان جوق قوي؟
– ءيا, 1,5 جىل بۇرىن قۇراما تىزگىنىن ۇستادىم. ماعان دەيىن مارات عالي ۇلى قۇربانوۆ باس باپكەر بولدى. ول كىسى قازىر زەينەتتە. باپكەرلىك مانسابىم 2009 جىلى باستالدى. جەكە شاكىرتتەرىمنەن قازىر قۇرامادا باحودير جالولوۆ عانا قالدى. قالعاندارى كاسىپقوي بوكسقا اۋىستى. بۇعان دەيىن ازيا چەمپيونى, ريو وليمپياداسىنىڭ قولا جۇلدەگەرى, بۇگىندە كاسىپقوي بوكستا تابىسقا جەتىپ جۇرگەن مۋرودجون احماداليەۆ, الەم چەمپيوناتىنىڭ قولا جۇلدەگەرى, كاسىپقوي بوكسشى سانجار تۇرسىنوۆ, ازيا چەمپيونى, الەم چەمپيوناتىنىڭ قولا جۇلدەگەرى, قازىر اقش-تا ءجۇرىپ 10 كەزدەسۋ وتكىزگەن قازاق ەلنۇر ابدۋرايموۆ, 2017 جىلعى ازيا چەمپيونى يسرايل مادريموۆ سىندى شاكىرتتەرىم وزبەكستان نامىسىن ابىرويمەن قورعادى. بۇلاردىڭ بارلىعى دا شىرشىق سپورت مەكتەبىندە ءبىلىم الدى. سىزدەرگە جاقسى تانىس الەم چەمپيونى رۋسلان ابدۋللاەۆقا دا بەس جىل ءتالىم بەردىم. كەزىندە رۋسلاندى ماعان بىلىكتى باپكەر ەرعالي ابۋباكىر ۇلى الىپ كەلگەن ەدى. ول تالانتتى بوكسشى. رۋسلاننان زور ءۇمىت كۇتەمىز. جالپى, وزبەكستان چەمپيوناتىندا رۋسلان ابدۋللاەۆتان بولەك, ءتورت بىردەي قازاق بالاسى جۇلدەگەرلەر قاتارىنان كورىندى. ەندى ولار قۇراماعا الىنىپ, حالىقارالىق جارىستاردا سىنعا تۇسەدى.
– تاباقسايعا بارار جولدا ءسىز ايتقان شىرشىق سپورت مەكتەبىنە دە سوققان ەدىك. توپجارعاندار توپتاسقان شاڭىراق ەكەن.
– ءيا. مەكتەپ جاقسى ناتيجە كورسەتكەندىكتەن, قازىر جاڭا نىساندار سالىنىپ جاتىر. بوكس, گاندبول, كاراتە, اۋىر اتلەتيكا سەكىلدى سپورت تۇرىنە ءۇيىر ورەندەر ءۇشىن بىرنەشە عيمارات سالىنىپ, پايدالانۋعا بەرىلدى. بۇل جەردە دارىندى قازاق بالالارى دا كوپ. شىرشىق سپورت مەكتەبىندە مەن وقىعان جىلدارى 50 بوكسشىنىڭ جارتىسىنان استامى قازاقتار بولاتىن. بارلىعىمىز تاتۋ-ءتاتتى ءومىر سۇردىك. قازىر دە تىعىز بايلانىستامىز. ماسەلەن, ىشكى چەمپيوناتتا ءۇشىنشى ورىن العان سايات ءىلياسوۆتىڭ اكەسى سامات سول كەزدە توبىمىزدىڭ ۇلكەنى سانالاتىن. سولاردىڭ ىزىمەن ءجۇرىپ, تاربيەسىن الدىق. جامان بولعان جوقپىز. وزبەكستان دا قازاقستان سەكىلدى كوپۇلتتى مەملەكەت. سوندىقتان قۇرامانىڭ كوپۇلتتى بولۋى دا زاڭدىلىق.
– بيىلعى وليمپيادادا كىمدەرگە ءۇمىت ارتاسىز؟
– قازىرگى ماقساتىمىز – وليمپيادا ليتسەنزياسىن تولىق يەمدەنۋ. سودان كەيىن عانا مەدالدىڭ جايىن ويلاستىرۋعا بولادى. البەتتە, بارلىعىنىڭ جولىنا ۇمىتپەن قارايمىز. دۋسماتوۆتىڭ وليمپيادادا توپ جاراتىنداي قابىلەتى بار. جالولوۆ تا بىلگەنىنەن جاڭىلا قويماس. ابدۋللاەۆ تا جەرگە قاراتپايدى دەپ سەنەمىز. 80 كيلودا ونەر كورسەتەتىن حابيبۋللاەۆ تا جاھاندىق جارىستا جارق ەتە قالسا دەيمىز. پاريج وليمپياداسىنا دەيىن ەكى ليتسەنزيالىق جارىستان بولەك بولگارياداعى «ستراندجا» كۋبوگىنە قاتىسامىز.
– اڭگىمەڭىزگە راحمەت.
اڭگىمەلەسكەن –
الماس ماناپ,
«Egemen Qazaqstan»
استانا – تاشكەنت – استانا
