ورىس وتباسىندا دۇنيەگە كەلگەن تاتيانا بۋرميستروۆانىڭ كاسىبي مۋزىكالىق ءبىلىمى جوق. ول بويىنداعى بۇل ونەرىن تاڭىردەن بەرىلگەن ۇلكەن سىي دەپ بىلەدى. وزىنە بەرىلگەن تاۋداي تالانتتى تارىداي شاشىپ الماي, جىلدار بويى شىڭداپ, ەڭبەكتەنىپ جۇرگەنىنىڭ ارقاسىندا حالىقتىڭ سۇيىكتىسى اتانىپ وتىر.
«جاستايىمنان قازاقتىڭ ءان-كۇيىنە, دومبىراعا عاشىق بولدىم. مەنى ونەرگە جەتەلەپ اكەلگەن دە وسى قۇشتارلىق. ايتپەسە, وسى كۇنگە دەيىن نوتا بىلمەيمىن, ياعني مۋزىكالىق ساۋاتىم جوق. مەنىڭ قازاق انىنە دەگەن ەرەكشە ىقىلاسىما ءوزىمنىڭ انام دا تاڭعالۋشى ەدى. وتباسىدا ءتورت قىزبىز. انام دا, اجەم دە ءان سالاتىن. ورىس, ۋكراين اندەرىن تىڭداپ ءوستىم. بىراق ماعان قازاقتىڭ اندەرى مەن تەرمەسى جاقىن ەدى. بۇل ماعان قۇدايدان بەرىلگەن سىي شىعار», دەيدى تاتيانا بۋرميستروۆا.
ونىڭ نەگىزگى ماماندىعى دارىگەر ەكەنى كوپكە ءمالىم. الايدا ونىڭ جۇرەك قالاۋى ونى ونەرگە قايتا-قايتا اكەلە بەرگەن.
ء«بىر كەزدەرى ءان سالۋدى توقتاتىپ, دارىگەر بولىپ قىزمەت ەتكەنىم بار. سوندا ءبىر اقساقال ماعان: «سەن ادامداردىڭ ءتانىن ەمەس, انىڭمەن جانىن ەمدە» دەپ ەدى. سوندا حالىقتىڭ مەنى دارىگەر ەمەس, ءانشى تاتيانا رەتىندە جاقسى كورەتىنىن, ىزدەيتىنىن ءتۇسىندىم. سودان باستاپ شىعارماشىلىعىمدى قايتا قولىما الدىم», دەيدى ءانشى.
ساحنانىڭ كيەسىن جەتە ۇعىنعان ول ءار كونتسەرتىنە تىڭعىلىقتى دايىندالادى. تىڭدارمان الدىنداعى جاۋاپكەرشىلىك ول ءۇشىن بارىنەن دە بيىك. ءانىمدى تىڭداۋعا كەلگەن ادام ەستى ءان تىڭداپ, عيبراتتى دۇنيە الا السا, مەنىڭ ماقساتىمنىڭ ورىندالعانى دەيدى ول.
ءداستۇرلى ءانشىنىڭ ساحناعا ۇلتتىق كيىممەن شىعۋى زاڭدى. بىراق تاتيانا بۋرميستروۆا ۇلتتىق كيىمدى تەك ساحنالىق كيىم دەپ سانامايدى. ول كۇندەلىكتى ومىردە دە ۇلتتىق كيىم كيىپ, قازاقتىڭ ءداستۇرىن وزگەلەرگە دارىپتەپ جۇرەدى.
«زامان وزگەرسە دە, مەنىڭ ۇلتتىق كيىمگە دەگەن ماحابباتىم وزگەرگەن جوق. ءار ايەلدىڭ گاردەروبىندا ەڭ بولماعاندا ءبىر ۇلتتىق كيىم بولۋى كەرەك دەپ ويلايمىن. ۇلتتىق كيىم ناۋرىز مەرەكەسىندە عانا ەمەس, ءار كۇنى كيىلىپ جۇرسە, قانداي ادەمى بولۋشى ەدى», دەدى ت. بۋرميستروۆا.
بۇگىندە ونىڭ سۋداي قازاقشاسىنا وزگە ۇلت وكىلدەرى قىزىعا قارايدى. ال تاتيانا بۋرميستروۆا ءتىل ۇيرەنگىسى كەلەتىندەرگە كومەك قولىن سوزۋدان ايانىپ قالمايدى.
ءانشىنىڭ ونەردەگى ەڭبەگى ەلەۋسىز قالعان جوق. بۇعان دەيىن ول «پاراسات», III دارەجەلى «بارىس» وردەندەرىمەن ماراپاتتالعان, قازاقستاننىڭ ەڭبەك سىڭىرگەن قايراتكەرى اتاعىنا يە بولعان. كۇنى كەشە مادەنيەت جانە ونەر قىزمەتكەرلەرىنىڭ كاسىبي مەرەكەسى قارساڭىندا ءتول مادەنيەتىمىزدىڭ ءورىسىن كەڭەيتىپ, حالقىمىزدىڭ رۋحاني دۇنيەتانىمىن بايىتۋ جولىندا جەمىستى ەڭبەك ەتىپ جۇرگەنى ءۇشىن مەملەكەت باسشىسىنىڭ جارلىعىمەن ەڭ جوعارى «وتان» وردەنىمەن ماراپاتتالدى.
«مەملەكەت باسشىسىنىڭ ونەر ادامدارىن جوعارى ناگرادالارمەن ماراپاتتاپ جاتقانى قۋانتادى. ۇمىتىلىپ كەتكەن, زەينەتكە شىققان ارىپتەستەرىمىز دە ۇمىت قالماي, ماراپاتتالىپ جاتقانىنا قۋانىشتىمىز. ەڭبەكتىڭ ەلەنىپ جاتقانى ءبىز ءۇشىن اسا ماڭىزدى. مەن وسى ۋاقىتقا دەيىن ءوز ءىسىمدى ماحابباتپەن جاساپ كەلدىم. جۇمىسىڭدى جاي قاجەتتىلىك رەتىندە ەمەس, شىن ىقىلاسىڭمەن جاساعاندا ەڭبەگىڭ وسىلاي جوعارى دارەجەدە باعالانادى. ءتۇرلى جاعدايلار بولدى, وتىز جىلداي مۇلدەم ساحناعا شىقپاي, ەلەۋسىز, ەسكەرۋسىز قالىپ قويعان كەزدەرىم دە بولدى. جالعىز مەن ەمەس, ءالى ءوز ۋاقىتىن كۇتىپ جۇرگەن قانشاما ءداستۇرلى انشىلەر بار. «وتان» وردەنىن وتانىما ادال قىزمەت ەتىپ جۇرگەنىمنىڭ بەلگىسى دەپ بىلەمىن», دەدى تاتيانا بۋرميستروۆا.
ماراپاتتاۋ راسىمىندە پرەزيدەنت ءانشىنىڭ جارتى عاسىرعا جۋىق ۋاقىت بويى قازاقتىڭ ءداستۇرلى ونەرىن بەلسەندى تۇردە كەڭىنەن دارىپتەپ, جاس دارىندارعا ۇلگى-ونەگە كورسەتىپ جۇرگەنىن ەرەكشە اتاپ ءوتتى.
