فوتو: ەرلان ومار
«قازاق گازەتتەرى» جشس-ءنىڭ باس ديرەكتورى ديحان قامزابەك ۇلى قازىر بۇقارالىق اقپارات قۇرالدارىنىڭ جاڭا كەزەڭگە ءوتۋ ءۇردىسى ءجۇرىپ جاتقانىن ايتتى.
«سىزدەر بۇل قاراشاڭىراقتا ۇلكەن سىننان ءوتىپ, مول تاجىريبە جينايسىزدار. جۋرناليست قوعام اعىمىنا وراي, تالابىنا ساي تۇشىمدى دۇنيە ۇسىنا الۋى ءتيىس. گازەت رەداكتسياسىنداعى بىلىكتى, بىلگىر, تاجىريبەلى جۋرناليستەردىڭ قايراۋى مەن شىڭداۋىنان ءوتىپ ىسىلۋ كەرەك. ستۋدەنت كەزدەن ادام ءوزىنىڭ تاڭداعان ماماندىعى بويىنشا دامۋ جولىنا تۇسەدى, كەم-كەتىگىن تۇزەيدى. بۇگىنگى ستۋدەنت – ەرتەڭگى مامان. مەديا الاڭدا وزدەرىڭنىڭ ىزدەرىڭدى قالدىرۋ ءۇشىن ەڭبەك ەتۋ قاجەت» دەگەن د.قامزابەك ۇلى ل.ن.گۋميلەۆ اتىنداعى ەۋرازيا ۇلتتىق ۋنيۆەسيتەتىمەن«Egemen Qazaqstan» گازەتى ەرتەدەن ارىپتەستىك بايلانىس ورناتقانىن ايتتى.
سونىڭ ءبىر كورىنىسى ەسەپتى ەلىمىزدەگى ءىرى مەدياقۇرىلىم مەن ۇلتتىق ۋنيۆەرسيتەت باسشىلىعى اراسىنداعى كەلىسىم ناتيجەسىندە بولاشاق جۋرناليستەردىڭ تەوريالىق ءبىلىمىن وندىرىستە, تاجىريبە جۇزىندە ۇشتاستىرۋعا جاعداي جاسالىپ وتىر.
ەۋرازيا ۇلتتىق ۋنيۆەرسيتەتىندە پراكتيك مامانداردى وقىتۋشىلىق قىزمەتكە شاقىرۋ تاجىريبەسى بۇرىننان بار. ءبىلىم ورداسى مەن ەڭبەك ۇجىمدارى, جۇمىس بەرۋشى مەكەمەلەر اراسىنداعى ۋاعدالاستىق نەگىزىندە ستۋدەنتتەردىڭ وندىرىستىك تاجىريبەدەن ءوتۋى دە جۇيەلى جولعا قويىلعان. بۇعان قوسا رەداكتسيادا جۇمىس پروتسەسىمەن تانىسا وتىرىپ, بىلىكتى مامانداردىڭ ءدارىسىن تىڭداۋ, تۇراقتى تۇردە تاجىريبەلىك ساباقتار وتكىزۋدىڭ دە ستۋدەنتتەر ءۇشىن پايداسى مول بولارى انىق.
«جۋرناليستيكا جانە ساياساتتانۋ» فاكۋلتەتىنىڭ دەكانى قايرات ساق گازەت رەداكتسياسىمەن ۋنيۆەرسيتەتتە فاكۋلتەت قۇرىلعان كەزدەن باستاپ ارىپتەستىك بايلانىس ورناتىلعانىن ايتتى. ەكىجاقتى مەموراندۋم اياسىندا بىرلەسكەن جۇمىستار اتقارىلعانىن, سول ءۇردىس جالعاسىن تاباتىنىن جەتكىزدى.
«فاكۋلتەتىمىزدىڭ پراكتيكالىق ساباعىن گازەت رەداكتسياسىندا وتىكىزۋگە قولداۋ كورسەتكەن «قازاق گازەتتەرى» جشس باسشىلىعىنا العىس بىلدىرەمىز. ستۋدەنتتەرىمىز ءۇشىن 105 جىلدىق تاريحى بار اعا باسىلىمنىڭ رەداكتسياسىندا تاجىريبەدەن ءوتىپ, ءتالىم الۋى زور بەدەل, ۇلكەن مەكتەپ بولماق دەپ سانايمىن», دەدى ق.ساق.
«قازاق گاازەتتەرى» جشس باس ديرەكتورىنىڭ ورىنباسارى قامبار احمەت كەيىنگى تولقىن ءۇشىن باق سالاسىندا ءورىس كەڭەيگەنىن, جۇمىس تابۋ اسا قيىندىق تۋدىرمايتىنىن, بىراق باسەكەگە توتەپ بەرۋ, زامان اعىمىنا ىلەسۋ قاجەتتىگىن ايتتى. الەۋمەتتىك جەلىنىڭ كۇش الىپ تۇرعان شاعىندا ءداستۇرلى باق-تىڭ دا دارەجەسى تومەندەمەۋى ءتيىس ەكەنىن, ءجۋرناليستىڭ كاسىبيلىگى ىزدەنىس پەن بەيتاراپتىق كوزقاراسىنان دا ايقىندالاتىنىن جەتكىزدى
جۋرناليستيكا جانە ساياساتتانۋ فاكۋلتەتى ءباسپاسوز جانە باسپا ءىسى كافەدراسىنىڭ مەڭگەرۋشىسى امانگەلدى شۇرەنتاەۆ ستۋدەنتتەردىڭ اعا باسىلىم رەداكتسياسىندا تاجىريبەدەن ءوتىپ, ءبىلىمىن شىڭدايتىنىنا سەنىم ءبىلدىردى. جوعارى كۋرس ستۋدەنتتەرى ءۇشىن وقۋ تاجىريبەسىن رەداكتسيا ۇجىمىندا وتكىزۋ كەلەشەكتە جۇمىسقا ورنالاسۋىنا دا زور مۇمكىندىك ەكەنىن اتاپ ءوتتى.
رەداكتسيادا وتەتىن «قازىرگى مەديانىڭ مەنەدجمەنتى جانە ماركەتينگى» تاقىرىبىنداعى العاشقى پراكتيكالىق ساباقتى «Egemen Qazaqstan» گازەتىنىڭ ينتەرنەت رەداكتسيا جەتەكشىسى قۋات اۋەسباي وتكىزەدى.
